Wupad „wuchodneho wjerška“

Wojerecy. „Krótkodobneho schorjenja dla“ wupadnje dźensa, pjatk, w 20. hodź. planowany zazběh noweho dialogoweho rjadu „Grit mit ...“ we Wojerowskej kulturnej fabrice. Hdy „wuchodoněmske wjerškowe zetkanje“, na kotrymž awtorka a režiserka Grit Lemke a spisowaćel Dirk Oschmann wo aktualnym zhladowanju na „nowe zwjazkowe kraje“ debatujetaj, nachwataja, hišće jasne njeje. Zajimcy njech informuja so pod www.kufa-hoyerswerda.de.

14. Budyska bursa symjenjow

Budyšin. Mjeztym je z tradiciju, zo wotměje so stajnje 2. njedźelu w februaru měnjenska bursa za symjenja w Budyšinje. Po „zahajacym přednošku móža zajimcy samoćehnjene symjenja zeleniny, zelow a kwětkow wuměnić. Družiny su ‚krute‘, štož rěka, zo hodźa so z nich zaso symjenja dobywać. Z tym móže so kóžda zahroda abo balkon z družinami wobohaćić, kotrež hewak na předań njejsu.“ Zarjadowanje w ewangelskej wosadnicy w Budyskej Strowotnej studni je zdarma přistupne a započnje so w 13 hodź.

„Wjesoły spěwny wječor“