Debata wo etaće 2025 zakónčena
Putin: To by charakter wójny změniło
Pětrohród (dpa/SN). Ruski prezident Wladimir Putin by zasadźenje daloko sahacych brónjow zapadnych krajow ze stron Ukrainy přećiwo objektam hłuboko w ruskim teritoriju jako wójnske wobdźělneje Nato wobhladował. „To by rěkało, zo wojuja kraje Nato, USA a europske kraje, z Ruskej“, rjekny Putin na prašenje žurnalista w statnej telewiziji w Pětrohrodźe. Putin rozłoži, zo by tole charakter wójny změniło. „Potom wotpowědnje rozsudźimy, wuchadźejo z wohroženjow, kotrymž smy z tym wustajeni.“
Ukraina sej hižo dlěje žada, daloko sahace rakety přećiwo Ruskej zasadźić směć, zo by ruske wojerske zepěranišća a wažne logistiske centry nadběhować móhła. Tole je jej dotal zakazane. Wonkowny minister USA Antony Blinken je na swojim wčerawšim wopyće we Waršawje rjekł, zo su USA zwólniwe, wojersku pomoc na dobro Ukrainy „po potrjebje přiměrić“. Jeho pólski kolega Radosław Sikorsky sej w tym zwisku cyle jasnje žadaše, wobmjezowanja zasadźenja daloko sahacych brónjow přećiwo Ruskej zběhnyć.
Nowe měritka stajił
Porjedźenka
Grjekska šwika němske kontrole
Athen (dpa/SN). Grjekski ministerski prezident Kyriakos Mitsotakis kritizuje rozsud zwjazkoweho knježerstwa, wot přichodneho tydźenja zaso kontrole při mjezach Němskeje přewjesć. Wotmołwa na njeregularnu migraciju njemóže być, Schengenske zrěčenje jednostronsce wotstronić, rjekny konserwatiwny politikar grjekskim rozhłosownikam. Taktiku bul na hrajnišćo druhich krajow ćisnyć, „njemóžemy tolerěrować“. Schengenski rum zmóžnja něhdźe 420 milionam ludźi w 29 krajach, swobodnje a bjez pomjeznych kontrolow mjez krajemi pućować.
Zwjazkowa nutřkowna ministerka Nancy Faeser (SPD) bě wukazała, wot přichodneje póndźele na wšitkich mjezach ludźi kontrolować. Potrjechene su Francoska, Danska, Belgiska, Nižozemska a Luxemburg. Při mjezach Awstriskeje, Pólskeje, Čěskeje a Šwicarskeje tajke kontrole hižo přewjeduja. W Schengenskim rumje njeje tole poprawom scyła předwidźane.
Sypnjeny dźěl mosta wottorhaja
To a tamne (13.09.24)
Unija ze swójskim namjetom
Berlin (dpa/SN). Po zwrěšćenym migraciskim wjeršku knježerstwa a CDU/CSU chcyše frakcija unije dźensa swójski namjet k tutej temje w zwjazkowym sejmje zapodać. Kaž parlamentariski jednaćel frakcije CDU/CSU, Thorsten Frei zdźěli, chce frakcija CDU/CSU na kromje wuradźowanja wo wěstoće swójski namjet zapodać a wo nim diskutować. W nim w prěnim rjedźe wo tym póńdźe, migrantow na mjezach Němskeje wotpokazać.
Digitalne projekty přesadźić
Berlin (dpa/SN). Hladajo na tuchwilne wohroženja za Němsku a přidatne nadawki na přikład na škit mjezow, žada sej dźěłarnistwo policije (GdP) wjace pjenjez za wěstotu. „Štóž chce wjace policistow na dróhach widźeć, dyrbi wulke digitalne projekty policije hnydom přesadźić. Tak móhli zastojnikow za druhe nadawki wuswobodźić“, rjekny zwjazkowy předsyda GdP Jochen Kopelke do wuradźowanjow wo etaće zwjazkoweho nutřkowneho ministerstwa w zwjazkowym sejmje.
Trump hišće njerozsudźeny
