Směrodajne jednanje w Münsteru nastupajo zastopnjowanje strony

Münster (dpa/SN). Na sewjerorynsko-westfalskim wyšim zarjadniskim sudnistwje (OVG) su dźensa sudniske jed­nanje w druhej instancy wo zastopnjowanju AfD přez wustawoškit zahajili. Zwjazkowy zarjad (BfV) z hłownym sydłom w Kölnje bě stronu a jeje młodźinsku organizaciju Młodu alternatiwu (JA) jako prawicarsko-ekstremistiski podhladny pad zastopnjował. Zarjadniske sudnistwo w Kölnje bě lěta 2022 tute nastajenje wobkrućiło. Wotpowědujo tomu ma wustawoškit prawo, stronu a jeje młodźinsku organizaciju ze srědkami tajneje słužby wobkedźbować. Přećiwo wusudej w Kölnje bě AfD znapřećiwjenje zapodała. Sudnicy najwyšeho zarjadniskeho sudnistwa dyrbja nětko rozsudźić, hač je posudk zwjazkoweho zarjada za wustawoškit prawnisce w porjadku.

Zo přińdźetaj předsydaj strony Alice Weidel a Tino Chrupalla na jednanje, njewočakowachu. Připowědźił bě so bywši zapósłanc zwjazkoweho sejma Roman Reusch jako zastupnik AfD ze Sewjerorynsko-Westfalskeje.

„Jutry ze serbskej paradu“ – křižerjo? Ně! Serbske drasty, kotrež po měsće poćahnu. Budu Serbja w tutej drasće? Ně! Němcy. Prašam so stajnje zaso, čehodla sebi fachowcy a fachowče marketinga mysla, zo je to dobra ideja. Zaso raz redukuje marketingowy wotrjad města Budyšin Serbow na stereotypy: drasta, jejka a křižerjo. Awtentisce to wšo njeje. Zaso raz reprodukuje so wobraz wo Serbach, kotryž je poprawom dawno zestarjeny. Smy wjace hač drasta, jejka a křižerjo. Snadź by spomóžne było, bychu-li so tež Serbja do planowanjow ­zapřijeli. Hdyž wupjeku lući Němcy, kak móhli serbski podźěl města reprezentować, wuskoči najčasćišo tajkele něšto: Tupy a jara njeakuratny wobraz wo nas. Hdy bychu so zamołwići raz hłubšo z našim ludźikom rozestajili, bychu pytnyli, zo njepřinošuje jich dźěło k žanomu polěpšenju našeho imaga. Njezadźiwa mje, zo so serbske swójby k tomu zwól­niwi njewupraja, so na paradźe zastarskosće wobdźělić! Maximilian Gruber

Dokładnje 15 637 městnow za komu ličby Pi je Frankfurtska policistka Susanne Hippauf loni naličić móhła a je tak nowy němski rekord nastajiła. Kónc tydźenja chce 42lětna swój titul zakitować a gigantiski rjad ličbow znowa z hłowy přednjesć. Wot januara wona intensiwnje zwučuje. Předewzała sej je, 18 000 ličbow za smužku bjez zmylka pruwowarjam naličić. To traje dlěje hač tři hodźiny.

Na wšěch 107 893 króć su šoferojo awtow loni w Sakskej pomocnu słužbu ADAC wołali. Bě to 3 593 króć wjace hač 2022. Najčasćišo wołachu pomocnikow defektnych baterijow dla (44,1 procent). Tola tež skóncowane motory, defektne generatory a startowaki běchu přičina nuzowych telefonatow. Najhusćišo trjebachu šoferojo pomoc wot awgusta hač do decembra 2023. Rekordny dźeń bě 4. december ze 18 378 zasadźenjemi.

Vatikan (B/SN). Bamžowska teologiska akademija je podšmórnyła, štož je 1738 bamž Clemens XII. (1730–1740) hižo wobzamknył, zo njehodźi so swobodnomurjerstwo na zakładźe předstawow wo Bohu z katolskej cyrkwju zjednoćić. Tež rozdźělne koncepty wo přećelstwje, lubosći k blišemu a ezoteriske praktiki přisłušnosć katolikow k swobodnomurjerstwu znjemóžnjeja, kotrež ma po cyłym swěće tři do pjeć milionow čłonow.

Tři křižiki

Hamburg (B/SN). Tradicija, so do čitanja ewangelija trójce pokřižować, bu w 11. lětstotku spočatnje jenož za měšnikow zawjedźena. Wosada z pokřižowanjom signalizuje, zo chce ewangelij z rozumom zapřimnyć, z ertom wozjewjeć, we wutrobje nosyć a po nim žiwa być.

Proces zahajeny

Kijew (B/SN). Nimale sydom lět po smjerći woblubowaneho grjeksko-katolskeho kardinala Lubomyra Huzara je nětko jeho naslědnik, wulkoarcybiskop Swjatosław Šewčuk, proces zbóžnoprajenja zahajił. Ukrainska grjeksko-katolska cyrkej je najwjetša na wuchodźe z ně­hdźe 4,5 do 5,5 milionami křesćanow.

Škódna propaganda