To a tamne (12.11.24)
Na wšěch 590 kilogramow kokaina su sobudźěłaćerjo wulkowikowarja sadu a zeleniny w Grimmje pola Lipska w bananowych kistach namakali. Wopojny jěd je wjace hač dźesać milinow eurow hódny, krajny kriminalny zarjad zdźěla. Zawod bě policiju informował, po tym zo běchu mjez bananami podhladne pakćiki wuhladali. Drogi běchu na 33 kistow rozdźělene. Cłownicy kokain sćazachu. Wotkal drogi pochadźeja, hišće njewědźa.
Wuměłski wikowar, kotryž steji předawanja falšowanych mólbow dla před Berlinskim sudnistwom, je wumjetowanja wotpokazał. Statne rěčnistwo twjerdźi, zo je muž mólby pólsko-francoskeho wuměłca Louisa Marcoussisa a toho mandźelskeje Alice Halička-Marcoussisy falšował a za dohromady 91 000 eurow předał. Wikowar twjerdźi, zo je mólby na přesadźowanju kupił.
Swětowa synoda zakónčena
Vatikan (B/SN). Na kóncu swětoweje synody katolskeje cyrkwje su wobdźělnicy wo 155 wotrězkach kónčneho dokumenta wothłosowali. Hnydom po tym jón bamž Franciskus w italšćinje zjawnosći oficialnje přepoda. Dokument je tež w nachwilnym němskim přełožku internetnje přistupny. Do kónčneho wobzamknjenja wotměchu so konferency a naprašowanja na lokalnej, kontinentalnej a globalnej runinje cyrkwjow.
Swjedźeń swjateho Měrćina
Mišno (B/SN). Kaž w biskopstwje Drježdźany-Mišno přewjeduja tež we wjacorych regionach Němskeje, Awstriskeje, Šwicarskeje, Luxemburga, we wuchodnej Belgiskej, Južnym Tirolu a w Šleskej swjedźeń swjateho Měrćina z lampionowym ćahom a na čole z jěcharjom na konju. W ewangelskej cyrkwi wopominaja tón dźeń mjeniny a křćeńcu reformatora Martina Luthera.
Nas wjace wjaza hač dźěli
Nowy předsyda Budyskeje wokrjesneje CDU
Chrósćicy (SN/MkWj). Na swojim zjězdźe je Budyski wokrjesny zwjazk minjenu sobotu w Chrósćicach 52lětneho předewzaćela Steffena Roscheka za noweho wokrjesneho předsydu wuzwolił. Nimo toho wuzwoli něhdźe sto delegatow w Chróšćanskej wjacezaměrowej hali Roscheka za noweho direktneho kandidata CDU we wólbnym wokrjesu 155 k wólbam zwjazkoweho sejma. Roschek je woženjeny, ma dwě dźowce a je wot lěta 2017 z čłonom CDU. Wón dźěła na polu informaciskich technologijow.
Jako nowy předsyda Budyskeho wokrjesneho zwjazka dósta Roschek nimale 97 procentow hłosow. Dotalny wokrjesny předsyda, krajny rada Udo Wićaz, njeje wjace kandidował, dokelž chce so na nadawki jako krajny rada koncentrować.
Při wólbach direktneho kandidata CDU we wólbnym wokrjesu dósta Roschek samo sto procentow hłosow. W swojej narěči 52lětny rjekny, zo pochadźa politisce z časa 90tych lět, jako bě Helmut Kohl zwjazkowy kancler. Dźensa bědźi so kraj z ideologiskimi dogmami. „Dokal to wjedźe, wšědnje widźimy“, Roschek hladajo na zwrěšćenu amplowu koaliciju w Berlinje rjekny.
Nowy etat móže trać
Berlin (dpa/SN). Porjadny zwjazkowy etat za přichodne lěto nastajić, móhło so po měnjenju předsydy etatoweho wuběrka zwjazkoweho sejma Helge Brauna hač do lěća abo samo nazymy 2025 ćahnyć. Politikar CDU rjekny sćelakej MDR, zo mjeńšinowe knježerstwo tole njezdokonjało, po tym zo je amplowe knježerstwo zwrěšćiło. „Tež nowe knježerstwo tajki problematiski etat bjeze wšeho njezmištruje, dokelž dyrbi wšitko znowa wobličić a za rozrisanjemi pytać.“
Klimowa konferenca zahajena
Baku (dpa/SN). Zastupnicy nimale 200 statow wuradźuja wot dźensa na swětowej klimowej konferency UNO w Azerbaidźanje wo móžnosćach, woćoplenje zemje wobmjezować. Nimo toho chcedźa wo fatalnych wuskutkach horcoty, wichorow a zapławjenjow rěčeć. Wobswětoškitne organizacije wočakuja pjenježne přilubjenja bohatych krajow na dobro chudych. Klimowi aktiwisća žadaja sej dawk, kiž měli bohaći ludźo płaćić.
Baerbock za wjace pomocy
Tysacy ludźi su minjenu sobotu w španiskej metropoli Valenciji ...
Prašenje dowěry nětko tola hižo prjedy
Berlin (dpa/SN). W ćahańcy nastupajo nowowólby zwjazkoweho sejma nětko za tym wupada, zo staji zwjazkowy kancler Olaf Scholz (SPD) prašenje dowěry nětko tola prjedy hač hakle srjedź januara, kaž dotal planowane. „Zo stajam hišće do hód prašenje dowěry, njeje za mnje scyła žadyn problem“, rjekny Scholz wčera wječor w sćelaku ARD. Wón wočakuje w tymle prašenju dojednanje mjez frakciskim šefom SPD Rolfom Mützenichom a frakciskim předsydu CDU Friedrichom Merzom.
Předsyda CDU Merz sej žada, zo měł Scholz po najspěšnišim puću prašenje dowěry stajić, po móžnosći hižo zajutřišim, srjedu. Tak móhli so nowowólby hišće w januara přewjesć. Mützenich chce do toho hišće pruwować, kotre projekty móhła SPD do nowowólbow přesadźić. Jako přikłady mjenowaše wón zwyšenje dźěćaceho pjenjeza, zaručenje financowanja cyłoněmskeje jězdźenki, podpěra industrije a škit wustawoweho sudnistwa.
Merz wobstawa na druhim wotběhu a rjekny nowinarjam: „Wo tym móžemy rěčeć, po tym zo je Olaf Scholz w zwjazkowym sejmje prašenje dowěry stajił.“
Hišće žadyn telefonat z Trumpom
Washington/Moskwa (dpa/SN). Přichodny prezident USA Donald Trump a ruski prezident Wladimir Putin njejstaj minjeny tydźeń po informacijach z Moskwy telefonowałoj. Rěčnik Krjemla Dmitrij Pjeskow je dźensa wotpowědne informacije nowiny Washington Post wotpokazał, po kotrychž staj Putin a Trump minjeny tydźeń telefonisce mjez sobu rěčałoj. „Tajkeje rozmołwy njeje było. To su prosće wopačne informacije“, Pjeskow rjekny. Putin bě minjeny štwórtk na zjawnym wustupje w Sočiju nad Čornym morjom Trumpej k wólbnemu dobyću gratulował a rjekł, zo by wosobinsku rozmołwu z nim witał.
Na to bě Washington Post pisała, zo staj wobaj statnika telefonowałoj. Při tym je Trump Putinej pječa radźił, wójnu přećiwo Ukrainje dale njepřiwótřić. Nowina citowaše w tym zwisku tež Pjeskowa ze wšelakimi wuprajenjemi.
Trump bě we wólbnym boju wospjet rjekł, zo chcył wójnu w Ukrainje spěšnje skónčić a zo planuje wotpowědny „deal“ z prezidentom Putinom.
Nowe knježerstwo do hód?
CDU a SPD w Sakskej móhłoj zhromadnje koaliciju mjeńšiny wutworić
Drježdźany (dpa/SN). Po tym zo stej stronje BSW a CDU w Sakskej sonděrowanske rozmołwy minjenu srjedu bjez wuslědkow zakónčiłoj, chcetej CDU a SPD w běhu tydźenja wo wutworjenju mjeńšinoweho knježerstwa rěčeć. Wotpowědny poskitk rozmołwy CDU socialdemokraća zawčerawšim přiwzachu. „Zamołwitosć za naš kraj a wobydlerjow stej najwažnišej“, zwurazništaj předsydka sakskeje SPD Kathrin Michel a předsyda Henning Homann. Hižo štwórtk maja frakcija SPD krajneho sejma a krajne předsydstwo kaž tež wotpowědne gremije CDU wo wuslědkach rozmołwow wuradźować.
Kretschmer je stabilita
Wobchodnicy optimistiscy
Drježdźany (dpa/SN). Sakscy wobchodnicy zhladuja najebać wšu kupnu zdźeržliwosć ludźi optimistiscy na zahajacy so hodowny wikowanski čas. Byrnjež wuchadne połoženje skerje njewěste było, je so tak mjenowany konsumowy barometer naposledk tola trochu polěpšił, rjekny René Glaser, hłowny jednaćel sakskeho wikowanskeho zwjazka. „Tole zbudźa nadźiju na wuspěšny dohodowny čas.“
Za měsacy nowember a december liči zwjazk wikowarjow, zo wobrot wo 1,3 procenty rozrosće. Z tym drje hibaja so dochody na niwowje minjeneho lěta. „Tež w lěće 2024 přińdu ludźo do hodownje wupyšenych a wobswětlenych městow, zo bychu tam tradicionalne dohodowne wiki wopytali a hodowne dary nakupowali“, Glaser rjekny.
Wobchody Sakskeje maja po informacijach wikowanskeho zwjazka poslednjej měsacaj lěta něhdźe pjeć miliardow eurow wobrota. Po tutym puću nadźěłaja wobchody w tymle času hač do štwórćiny swojeho cyłolětneho wobrota. Tež w internetnym wikowanju wočakuja wobroty na niwowje lońšeho lěta. Wulke impulsy rozrosta pak njenastanu.
