Wjetšina za dočasne wólby
Njespokojnosć ludźi z dźěłom zwjazkoweho knježerstwa přiběra
Berlin (dpa/SN). Amplowa koalicija je po měnjenju snadneje wjetšiny wólbokmanych w Němskej na kóncu. Po woprašowanju sćelaka ARD přeje sej wjace hač kóždy druhi (54 procentow) dočasne wólby zwjazkoweho sejma. Porno tomu je 41 procentow za to, zo měła amplowa koalicija hač k prawidłownemu terminej 28. septembra 2025 dale dźěłać.
Přiwisnicy SPD (77 procentow) a Zelenych (76 procentow) maja pokročowanje zhromadneho knježerstwoweho dźěła přiwšěm za zmysłapołne. Za dočasne nowowólby wupraji so 93 procentow přiwisnikow AfD, 75 procentow Zwjazka Sahry Wagenknecht a 69 procentow wolerjow CDU/CSU. Prašeli su so za měnjenjom přiwisnikow wšěch stron, kotrež docpěwaja při njedźelnym prašenju znajmjeńša pjeć procentow. Z tym FDP wotpadnje, kotraž ma po woprašowanju ARD jenož hišće štyri procenty.
To a tamne (01.11.24)
Swětoznatu studnju Trevi wosrjedź Roma su wotpušćili a z płotom wobdali. Zo móhli turisća najebać to tradiciju pěstować a pjenježki do njeje ćisnyć, su pódla studnje prowizoriski basenk nastajili. Po informacijach zamołwitych wopytowarjo nowu móžnosć, sej zbožo wuprosyć, pilnje wužiwaja. Studnju chcedźa w přihotach klětušeho swjateho lěta 2025 jako jedyn ze symbolow Roma ponowić.
Na wšěch 22 tonow twarožka pokradnyli su paduši ze składa wulkowikowarja w Londonje. Paduši běchu so wikowarskemu předewzaću Neal’s Yard Dairy jako fachowcy z Francoskeje předstajili a 950 pokrutow družiny Cheddar wotewzali. Wospjet wuznamjenjeny Cheddar je we Wulkej Britaniskej jara požadany a dosć drohi: 250 gramow płaći sydom puntow (8,30 eurow). Tukaja na to, zo je twarožk na Bliskim wuchodźe abo w Ruskej.
Wjele woporow w Španiskej
Madrid (dpa/SN). Njewjedra ze sylnymi zliwkami a zapławjenjemi su sej w Španiskej znajmjeńša 51 smjertnych woporow žadali. Tójšto ludźi je zhubjenych. Najhórje potrjechene su mjez turistami woblubowane kónčiny podłu Srjedźneho morja Andaluziska, Murcia a Valencia. Tam su zliwki dróhi, domy a pola zapławili. Ludźo běchu w swojich domach popadnjeni. Tójšto awtow so wot wody prosće sobu storhnychu. Zliwki maja dale trać.
Mortwi při nalětach w Libanonje
Beirut (dpa/SN). W Libanonje je při israelskich nalětach 82 ludźi žiwjenje přisadźiło. Kaž libanonske strowotniske ministerstwo zdźěla, je so při nalětach 180 ludźi zraniło. Israelske wójsko zdźěla, zo měrješe so na zepěranišća a składy brónjow islamistiskeje organizacije Hisbollah. Ciwilnu ludnosć su pječa do toho namołwjeli, potrjechenu kónčinu wopušćić.
Zwučuja z atomowymi brónjemi
Tydźeń do wólbow noweho prezidenta USA je kandidatka demokratow ...
Ukraina poražku wobkrućiła
Scholz chce pakt za industriju
Plany VW „alarmowy signal“
Berlin (dpa/SN). Zwjazk městow a gmejnow Němskeje warnuje po připowědźenym zawrjenju zawodow awtotwarca Volkswagen před masiwnymi sćěhami. „Powěsće, zo planuje VW razny wottwar dźěłowych městnow a zawrjenje zawodow, njejsu jenož za potrjechene komuny drastiske, ale su alarmowy signal němskemu hospodarstwu“, rjekny hłowny jednaćel André Berghegger nowinarjam.
Móžne zawrjenja móhli za potrjechene komuny chutne sćěhi měć. „Hroža masiwne straty přemysłoweho dawka a wosłabjenje městnosće. Tohorunja pak hroža domino-efekty w komunalnych financach a dalše sćěhi za dźěławych.“
Volkswagen a zawodna rada pytatej hižo wjacore tydźenje za wupućemi z krizy awtotwarca. Po informacijach zawodneje rady chce koncern w Němskej znajmjeńša tři ze swojich cyłkownje dźesać twornjow zawrěć. We wšitkich druhich zawodach chcedźa kapacity znižić. Planowane su tež wupowědźenja zawodnych přičin dla, kotrež pola VW wot lěta 1992 wuzamknychu.
