Jako štwórty syn serbskeho superintendenta a Njeswačanskeho fararja Gerharda Wirtha narodźi so 23. nowembra 1954 Měrćin Wirth jako dwójnikowy porik zhromadnje z dźowku Madlen. Nětko w Budyšinje-Třělanach bydlacy, wjelelětny bywši předsyda Serbskeho ewangelskeho towarstwa, je sobotu swoje sydomdźesaćiny woswjećił.

Po wopyće Njeswačanskeje šule chcyše Měrćin Wirth kaž jeho starši bratřa Pawoł, Arnošt a Handrij Serbsku wyšu šulu wopytać. Politiskich přičin dla pak so jemu to znjemóžni. Jubilar nawukny tuž w Lutobču powołanje ratarskeho zamkarja z abituru. Po słužbje w armeji delegowaše zawod Měrćina Wirtha na štyri­lětny studij na inženjera za ratarsku techniku do Berlina. Tam spožčichu jemu, kotrehož njeběchu na rozšěrjenu wyšu šuli přiwzali, za wurjadne wukony jako student čestny Wilhelma Pieckowy stipendij.

Lubin/Budyšin (SN/mb). „Z tym su wšitke za twar trěbne ležownosće zaručene.“ Tuta sada je w meji była dobre poselstwo, kotrež je załožbowa rada nastupajo plany za „Serbski forum wědy“ na Lawskim arealu w Budyšinje wozjewiła. Ale nětko je wšitko hinak. Na kóncu wuradźowanja gremija zašły štwórtk bě jasne: Wuslědk wubědźowanja architektow a z tym model nowych twarjenjow na nětčišim ladźe wosrjedź Budyšina je z wobzamknjenjom čo. 722 makulatura. Časowy plan za zwoprawdźenje najwjetšeho inwesticiskeho projekta w stawiznach Serbstwa je rada faktisce cofnyła.

Kandidat CDU wólbneho wokrjesa 155 za wólby zwjazkoweho sejma je so minjeny pjatk oficialnje nowinarjam předstajił. Přichodne tydźenje chce so dospołnje na wólbny bój koncentrować.

Budyšin (SN/BŠe). Předewzaćel Steffen Roschek je kandidat CDU wólbneho wokrjesa 155 za wólby zwjazkoweho sejma. Jeho zaměr je direktny mandat z ruki AfD za CDU wróćo zdobyć. Wjele chwile za to njeje. Hižo 23. februara wolimy w Němskej nowy zwjazkowy sejm. Čas za wólbny bój je tuž krótki a w zymskim počasu, štož njejsu runjewon najlěpše wuměnjenja. Roschek chce tuž wjele składnosće wolerjam poskićić, hdźež móhli jeho lěpje zeznać. Jedyn tajki termin je wólbny forum Zwjazka dźěłarnistwow w januarje. „Chcemy so z teamom předewšěm tež na socialne medije koncentrować“, Roschek rozkładźe.

Berlin (dpa/SN). Zwjazkowy minister za hospodarstwo Robert Habeck (Zeleni) kritizuje zmylki Němskeje při podpěrje na dobro wot Ruskeje nadpadnjeneje Ukrainy. Němska je při dodawanju brónjow „stajnje přepozdźe była“, rjekny wón wčera w sćelaku ARD. Kanclerski kandidat Zelenych pokaza na spočatne wahanje Němskeje, Ukrainje scyła brónje dodawać. Pozdźišo traješe předołho, tanki Leopard II přewostajić. Wahanje so z debatu wokoło rakety Taurus pokročuje.

Pomoc z Jemena za Rusku

Moskwa (dpa/SN). Po informacijach nowiny Financial Times podpěruja milicy Huthi w Jemenje nawabjenje młodych muži, kotřiž móhli poboku ruskeho wójska přećiwo Ukrainje wojować. Pječa su po tutym puću hižo sta jemenskich zóldnarjow nawabili. Mužam lubja w jich domiznje dobru mzdu a wuhlad na ruske staćanstwo. Na kóncu pak jich hnydom na frontu w Ukrainje sćelu, ručež su do Ruskeje dojěli, nowiny rozprawjeja.

Tójšto raketow na Israel