Ze spektakularnej pućowanskej šćežku po swětoznatych skałach Blue Mountains zapadnje Sydneyja chcedźa dalšich turistow do tuteje kónčiny Awstralskeje nawabić. Nowy „Grand Cliff Top Walk“ je 19 kilometrow dołhi a je dźesać milionow awstralskich dolarow (šěsć milionow eurow) płaćił. Šćežka skići wopytowarjam „nowu a na dyrdomdejach bohatu składnosć, so z přirodu zwjazać“, zamołwići za turizm zdźěleja.
Kradnjene cholowy woblečeny je so paduch do wobchoda w Bayerskim Coburgu nawróćił, w kotrymž bě cholowy hodźiny do toho spakosćił. Předawar muža spóznawši, jeho zadźerža a zawoła policiju. Hodźinu do toho bě 31lětny dwoje cholowy w kabinje wuspytał ale so z jenož z jednymi zaso nawróćił. Jeansowe cholowy za 140 eurow tykny wón do tity a so z nimi z wobchoda zminy.
Brüssel (dpa/SN). Europska unija je wobzamknyła, zahajić z Bosniskej-Hercegowinej jednanja wo přistup kraja k EU. Tole je prezident Rady EU Charles Michel po rozmołwach ze statnymi a knježerstwowymi šefami čłonskich krajow EU zdźělił. Prěnju konferencu wo přistupje chcedźa pak hakle organizować, hdyž je Bosniska-Hercegowina wuměnjenja spjelniła. K tomu słuša bój přećiwo korupciji a organizowanemu złóstnistwu w kraju.
Raketowy škit Němskeje twarić
Berlin (dpa/SN). Generalny inspektor zwjazkoweje wobory Carsten Breuer žada sej spěšny natwar rakety wotwobaraceje syće přećiwo móžnemu wohroženju ze stron Ruskeje. „Mamy pjeć do wosom lět chwile. W tymle času dyrbimy wotwobaranje raketow natwarić. To je bjez alternatiwy“, rjekny Breuer nowinarjam. Ruska móhła za pjeć do wosom lěta kmana być, wójnu přećiwo krajam NATO zahajić. „Hač do toho dyrbjała Němska přihotowana być, tajki nadpad wotwobarać.“
Unesco: Pitnu wodu škitać
Saporiššija (dpa/SN). Při najćešich ruskich raketowych nadpadach minjenych měsacow na milinowe zastaranje Ukrainy su dźensa mjez druhim milinowód atomoweje milinarnje Saporiššija trjechili, zdźěla nawodnistwo wot ruskeho wójska wobsadźeneje milinarnje. Wěstota milinarnje je přiwšěm zaručena.
Powětrowy alarm knježeše minjenu nóc we wjacorych dźělach Ukrainy. Ruska bě po informacijach ukrainskeho wójska swoje rakety w strategiskich bombowcach typa TU-95 nad Kaspiskim morjom startowała. Pozdźišo zasadźichu tež balistiske rakety. Při tym měrjachu so Rusojo na Lwiw na zapadźe kraja runje tak kaž na Donjeck na wuchodźe, Charkiw a Sumy na sewjeru a Odessu a Mykolajiw na juhu. Oficialne ličby woporow a zranjenych rano hišće njepředležachu.
New York (dpa/SN). Bjezstrašnostna rada UNO chcyše dźensa wo rezoluciji wothłosować, kotraž žada sej hnydomny a trajacy přiměr w Gazaskim pasmje. Wuradźowanje wo tym planowachu w popołdnišich hodźinach. Dyrbjeli-li rezoluciji přihłosować, by to prěni króć po zahajenju israelskeje ofensiwy přećiwo islamistiskej Hamas w oktobru było, zo so najwyši gremij UNO za přiměr wupraja.
Pozadk je změnjena pozicija USA přećiwo Israelej. Po zahajenju wójny běchu so USA wospjet přećiwo přiměrej wuprajili a rezolucije UNO wotpokazali. Hladajo na přiběracu ličbu ciwilnych woporow a hrožacu hłodowu katastrofu pak USA nětko ćišć na Israel zesylnjeja.
Zwoprědka njebě jasne, hač rezoluciju schwala. Ruska jako kraj z prawom na weto bě so naposledk kritisce wuprajiła, dokelž njeje wuraz „přiměr brónjow“ po jeje měnjenju jasnje dosć definowany. Rezolucija žada sej „hnydomny a trajacy přiměr k zastaranju ciwilneje ludnosće“.
Hamburg (dpa/SN). W Drježdźanach rodźeny spisowaćel Ingo Schulze wupraja so hladajo na wójnu w Ukrainje za to, za móžnosćemi jednanjow z Ruskej pytać. „Perspektiwa za jednanja dyrbjała tola móžna być“, rjekny 61lětny časopisej Stern. „Hórje hač nětko móže tola lědma hišće być. Tutomu zabiwanju a rozdrěwanju njemóžemy dlěje přihladować“, Schulze rjekny. „Prajimy jednorje, zo dyrbi Ukraina dale wojować. Štóž pak tole rjeknje, dyrbjał tež zwólniwy być, swoje dźěći do tuteje wójny pósłać.“
Schulze bě wčera na Lipšćanskich knižnych wikach. Tam rěčeše wón ze zwjazkowym prezidentom Frankom-Walterom Steinmeierom wo stawje demokratije. Spisowaćel widźi zwisk mjez socializaciju wuchodnych Němcow a jich strachom před wójnu. „Na wuchodźe bě nimale kóždy muž we wójsku. Štóž je raz wulke zymske wojerske zwučowanje sobu dožiwił, tón znaje začuće dospołneje bjezmocy jednoreho wojaka.“ Tuž widźa mnozy na wuchodźe wójnu z cyle wosobinskeho wida a so prašeja: „Kak drje by było, bych sam do wójny dyrbjał?“, spisowaćel w tym zwisku praji.