Na duchownym a politiskim polu dźěłał
Serbski superintendent Jan Malink poda so na wotpočink
Serbski superintendent Jan Malink poda so po 37 lětach duchownstwa na wuměnk. Zajutřišim, njedźelu, chce swoje zastojnstwo we wobłuku swjedźenskich kemšow w Budyskej tachantskej cyrkwi oficialnje přepodać. Rodźeny Budyšan je za čas towaršnostneho přewróta tež na serbskim politiskim polu skutkował.
W 11. lětniku na Serbskej rozšěrjenej wyšej šuli w Budyšinje, dźensnišim Serbskim gymnaziju, bě Janej Malinkej jasne, zo chce teologiju studować a zo stanje so z ewangelskim duchownym. Tak zaběraše 1956 rodźeny młody muž jasne stejišćo, byrnjež so do tehdyšeho wobraza socialistiskeje wosobiny njehodźał. Na tamnym boku njetrjebaše so tehdy praktikowanych „přesłyšowanjow“ bojeć, jako dyrbjachu maturanća šulskim nawodam rozłožić, čehodla nochcedźa so z oficěrom stać abo znajmjeńša tři lěta do wójska hić.
Přez nóc wšitke dotalne přemyslowanja zbytne byli Zhladowanje na lěta přewróta – 16
„Znowazjednoćenje Němskeje – són a woprawdźitosć“ rěka kapsna kniha z pjera Waltera Leonharda. Rodźeny Durinčan je 40 lět we Wětrowskej šamotowni dźěłał. Serbske Nowiny wozjewjeja jeho trochu wudospołnjene, wot Arnda Zoby a Friedharda Krawca z přećelnej dowolnosću nakładnistwa DeBehr zeserbšćene dopomnjenki.
Zawěsće budźe tón abo tamny z was, lube dźěći, tež lětsa ...
Zawěsće budźe tón abo tamny z was, lube dźěći, tež lětsa w prózdninach něhdźe na dowolu přebywać a maće sej wačok přihotować. Dźěćiznak je sej wěcy hižo hromadu znosył, kotrež chce na kóždy pad sobu wzać.
Přirunajće wobrazaj a namakaće wosom zmylkow!
ilustracija: Christin LukašowaWjele wjesela a dožiwjenjowpołne prózdniny přeje wam Dźěćiznak!
Słuchajo a paslo sej rěč wotkrywać
Wotchadnička přiwšěm była
Foto: Daniela ĆemjerowaDźěći, kotrež nowe šulske lěto do 1. lětnika póńdu, swjeća kónc pěstowarskeho časa stajnje wotchadničku. Tomu najebać koronapandemije na zbožo tež lětsa tak je. Přichodni ABC-dźěći Chróšćanskeje pěstowarnje podachu so minjeny tydźeń do Čorneho Chołmca, hdźež su sej Krabatowy młyn wobhladali. Tam je předšulska skupina z kubłarkami Danielu Ćemjerowej, Janu Kralowej a Petru Hubrichec wjele zajimaweho zhoniła. Nazornje je jim Magdalena Schaffer wšitko rozkładowała. Hakle popołdnju so dźěći zaso do „Chróšćan kołća“ nawróćichu. Kerstin Šołćina
Wjele poskitkow na farmje
Lětnje prózdniny steja před durjemi, a dźěći kaž młodostni smědźa zaso na Wojerowsku farmu přińć. Zarjadnišćo w nošerstwje Křesćansko-socialneho kubłanskeho skutka ma wotydźenja stajnje wot 9 do 12 hodź. a wot 14 do 17 hodź. wotewrjene. Dopołdnja a popołdnju smědźa na farmje maksimalnje 40 dźěći a młodostnych witać. Štóž ma potajkim zajim, dyrbi so sčasom přizjewić.
Kompletny program prózdninskich poskitkow je na internetnej stronje www.csb-miltitz.de wozjewjeny. Ute Große
Šulerjo za dobry skutk běhali
Wuknjacy Chróšćanskeje zakładneje šule „Jurij Chěžka“ maja wulku wutrobu. Dopokazali su woni to minjenu póndźelu a wutoru na sponsorskim běhu. Kóždy šuler bě sej sponsora wupytał a z nim wučinił, kelko pjenjez za jedne koło wokoło sportnišća wuda. A dźěći smalachu jedne koło po druhim, wědźo zo su naběžane fenki za dobry skutk sobušulerce 4. lětnika Měrce Bulankec z Prawoćic. Wona ma rědku chorosć, při kotrejž jej słónčne pruhi jara škodźa. Wotpowědnje maja rjadowniske rumnosće wuhotowane być, hdźež móže dale wuknyć. We Worklečanskej šuli je runje přihotuja. Zo móhli wšitke trěbne naprawy za škit Měrce zwoprawdźić, su pjenjezy trěbne. Dźěl z nich su nětko potajkim tež Chróšćanscy šulerjo z „běhom z wutrobu“ nazběrali. Bianka Šeferowa
Cyła swójba z wulkej zahoritosću pomha
We Łazu štrusy přirodnje a bjez stresa plahuja, štož smědźa sej zajimcy rady wobhladać
Čile ćipki štrusow napřemo piwča, zas a zaso pak so wusko hromadu sydaja. „Runje w prěnich dnjach dźě wone wjele ćopłoty a hladanja trjebaja. Wjac hač tři měsacy tu wostawaja. Přidatnje k lampje, kotraž ćipki wohrěwa, smy tepjenje w špundowanju instalowali“, Wilfried Gabel rozłožuje. Dźeń wote dnja stara so wón w nowym kurjencu Łazowskeje farmy štrusow wo młodźata wulkich ptakow. Pelety, kotrež za nje přihotuje, wobsteja ze zorna, witaminow, mineralijow a balastowych maćiznow. Wot lěta 2005 štrusowa farma we Łazu wobsteji. Syn Enrico a jeho mandźelska Manuela ju připódla wobhospodarjeja. Něhdźe 50 skoćatow tam mjeztym maja.
Z Wudworskeje kobłarnje něhdy
Wudworčan Eckhard Kliemann bě do wuměnkarskeje staroby wučer na wšelakich kubłanišćach. Připódla je so hižo stajnje za lokalne stawizny zajimował. Lěta 2001 swjećeše Wudwor 700. róčnicu prěnjeho naspomnjenja we wopismje klóštra Marijineje hwězdy. Tehdy Eckharda Kliemanna prošachu, něšto wo stawiznach wsy napisać. W tym zwisku započa so wón tež za stawizny Wudworskeje kobłarnje zajimować a je wo njej wjele dotal njeznateho wuslědźił. Mjeztym je telko materiala zezběrał, zo wo kobłarni samo přednošuje. Za Serbske Nowiny wón tule swoje slědźerske dopóznaća zjima.
Čehodla bu runje w skerje njewuznamnym Wudworju kobłarnja załožena, móžeš na zakładźe faktow jenož tukać. Alfons Porak jun. – jedyn ze synow wuspěšneho fabrikanta Alfonsa Poraka, kiž měješe w Hajnicach blisko Budestec předźernju ze 700 přistajenymi – bě wulki lubowar koni. Po smjerći nana přewza Alfons Porak jun. ze swojimi třomi bratrami wjednistwo fabriki.
Tež na rěčnym kursu móže swoje znajomosće serbšćiny wobstajnje ...
Rentnar a što potom – wuměnkarsku swobodu wužiwać abo wužadanje přiwzać (26)
Někotři njemóža so toho časa dočakać, tamni zaso nochcedźa scyła na njón myslić – na zastup do renty. Kajke maja wuměnkarjo wjesela abo starosće, to ze seriju „Rentnar a što potom?“ bliže wobswětlamy.
Hdyž steješe nazymu 1948 kolebka dźensa 71lětneho Dietera Stoppela na Horach sewjernje Wojerec, bě wjes hišće nimale ryzy serbska. Jako dźěćo je wón wjele pola dźěda přebywał, kiž měješe tam kowarnju. A tam přiswoji sej kajkosće kaž wutrajnosć, pilnosć a lubosć do dźěła, kotrež je sej hač dodźensa wobchował. Stajnje je z dźědom serbsce rěčał, a rady słuchaše na ludźi, kotřiž sej do kowarnje dóńdźechu a z jeho dźědom runje tak serbowachu. Staršej staj z nim a wo sydom lět młódšim bratrom porno tomu serbšćinu mjenje wužiwali.
