Z wudaća: srjeda, 17 januara 2018

Praha (ČŽ/K/SN). Tydźenja přestorčene wothłosowanje wo dowěrje mjeńšinowemu knježerstwu předsydy ANO Andreja Babiša je čěski sejm wčera nachwatał. Hač na mandatnikow ANO su po wočakowanju zapósłancy wšěch tamnych stron jeho kabinetej dowěru zapowědźili. Knježerstwo dyrbi tuž wotstup zapodać, wostanje pak dale w słužbje. Prezident Miloš Zeman bě wospjet rjekł, zo Babišej znowa nadawk da wutworić dalše knježerstwo. Z tym wšak ma jenož hač do 8. měrca chwile – tón dźeń so jeho prezidentstwo skónči. Jiří Drahoš je w padźe swojeho dobyća we wurisanskej wólbje připowědźił, zo wón Babiša njepowoła a zo měło ANO někoho druheho za premiera namjetować.

Drježdźany (dpa/SN). Sakska ministerka za integraciju Petra Köpping (SPD) so za to wupraja, wjele lět wobstejace mě­šćanske partnerstwa mjez wuchodnej a zapadnej Němskej znowa wožiwić. To samsne płaći za styki šulow a towarstwow, rjekny Köpping w Drježdźanach. Wažne, zo sy w tymle prašenju wćipny. Tež wuměnu šulerjow mjez wuchodom a zapadom, kaž bě to durinski minister za kubłanje Helmut Holter (Lěwica) namjetował, ma wona za zmysłapołne. To móhło pomhać so lěpje zeznać a z respektom mjez sobu wobchadźeć.

„Znowazjednoćenje bě wulke zbožo w němskich stawiznach. Na to smy minjene 27 lět trochu pozabyli“, Köpping wobžaruje. Na wuchodźe a zapadźe su so klišeje wo „tych tamnych“ zahnězdźili, štož so młódšim generacijam dale dawa a towaršnostnu zhromadnosć wohroža.

W Drježdźanskej cyrkwi Našeje knjenje chcedźa wo přichodźe rěčeć

Drježdźany (dpa/SN). Załožba Drježdźanskeje cyrkwje Našeje knjenje chce ze swojim lětušim forumom pod hesłom „Hdyž so Će Twoje dźěćo jutře praša ...“ do přichoda zhladować. „Hdyž so dźěći prašeja, to dorosćenym častodosć dych wotrazy“ praji farar mjenowaneje cyrkwje Sebastian Feydt k pozadkam jutře zahajaceho so zazběhoweho podija w Drježdźanach. Fenomen mjelčenja chcedźa přewinyć a wotmołwy namakać, kotrež generaciju rozsudźerjow daloko přesahuja. „Mamy ćeže, prawe wotmołwy na aktualne problemy namakać, dokelž na dołhodobne wuskutki swojich rozsudow njemyslimy.“ Tole pokazuje so w pobrachowacym dalewuwiwanju demokratiskich strukturow, w pobrachowacym dialogu mjez nabožinami, we wobchadźe ze zemskimi pokładami a w někotrych wěstotnopolitiskich prašenjach. „Trjebamy změnu dotalneje perspektiwy.“ Dźe wo dołhodobne sćěhi tuchwilnych zasadnych politiskich rozsudow.

Pomoc! Takle je tuchwilu ze wšěch kóncow słyšeć, dźe-li wo to, zaručić wučbu na sakskich šulach. Tež nawodźa serbskich kubłanišćow hladaja do njewěsteho přichoda. Wšako lěto wot lěta wjace wučerjow na wuměnk dźe, hač so za dźěło přizjewi. Derje tuž, zo mamy zajimcow z wukraja. Iniciatiwa Serbow, čěskich wučerjow nawabić, je tomu dopomhała. Nětko­ pak klaca na tym, dobre předewzaće přesadźić. Něštožkuli je so nimokuliło. Lěpje by było, bychu-li so runočasnje z wabjenjom wšitke wuměnjenja za při­stajenje Čechow wutworili. To ma so nětko krok po kroku zdokonjeć. Derje, zo je zapósłanc krajneho sejma Marko Šiman (CDU) z potrjechenymaj wučerjomaj dr. Šárku Blažkovej a Pavelom Šlechtu rěčał. Bjezdwěla je wón puć rubał za rozmołwu wučerki­ ze zamołwitymi Budyskeho wotrjada Sakskeho krajneho zarjada za šule a kubłanje. Milenka Rječcyna

Rüsselsheim (dpa/SN). Awtotwarc Opel so z pjenježnych přičin na Mjezynarodnym awtowym salonje w Genfje w měrcu njewobdźěli, kaž wotnožka francoskeje skupiny PSA w Rüsselsheimje zdźěla. Prawdźepodobnje liča ze snadnym za­jimom kupcow, ćim bóle, dokelž nimaja žadyn nowy model w poskitku.

Na němskim wotrězku přichodneje transeuropskeje železniskeje magistrale do směra na Chinu nětko we Łužicy zaměrnje dźěłaja. Sobudźěłaćerjo předewzaća SPL­Powerlines­ Germany montuja blisko Niskeje jězbny grót. Z dwukolijowym wu­twarom a elektrifikaciju čary mjez Hórnikecami a Hórku ma so poslednja dźěra płatać, zo móhli­ nakładne ćahi z Rólan přichodnje přez Wojerecy a Hórku pólsku mjezu docpěć.­ Němska a Pólska běštej so we wobłuku rozšěrjenja Europskeje unije na wuchod do­jednałoj, mjezu překročace kolijowe zwiski wutwarić. Foto: Joachim Rjela

DOŽIWIĆ na Staroměšćanskim naměsće fungowanje astronomiskeho wěžneho časnika radnicy z wustupowacymi japoštołami wopytowar Prahi lědma skomdźi. Tónle sobu najbóle wobdźiwany pomnik wšak poł lěta mjelči. Tak mjenowany „orloj“ mjenujcy cyle wobnowja. Po tym zo je časnik přestał dźěłać, su jón fachowcy rozebrali a kóždy jednotliwy dźěl a dźělčk woznamjenili. Restawracija mechanizma unikatneho časnika a japoštołow inkluziwnje drjewjanych plastikow płaći něhdźe 7,5 milionow krónow. Dalšej milionaj krónow nałoža za wšelke dalše korektury, mjez druhim za zhotowjenje noweho kalendarija. Posledni króć bu nastroj lěta 2011 sporjedźany. Dotalny mechanizm, instalowany po Druhej swětowej wójnje – při Praskim zběžku w meji 1945 poćerpje časnik přez woheń wulke wobškodźenja – wuměnja z nowym, podobnym tomu ze srjedź 19. lětstotka. Wěžowy astronomiski časnik staroměšćanskeje radnicy bě 1412 zhotowił čěski časnikar Mikuláš z Kadanje. Pozdźišo je jón mišter Hanuš z Růže wudokonjał.

Na wosebitym zarjadowanju spočatk lěta štyri prapremjery zaklinčeli

Zwosebitym koncertom k nowemu lětu, renoměrowanym a etablěrowanym zarjadowanjom, předstaja rodźena Budyšanka, pianistka Heidemarja Wiesnerec, mjeztym hižo 22. raz serbsku hudźbu w mjezynarodnym konteksće. Za wot Załožby za serbski lud spěchowany a přez krajnoradny zarjad kaž tež Wojerowske wuměłstwowe towarstwo podpěrany rjad su komponisća w minjenych lětach prawidłownje nowe twórby pisali. Tež lětsa zaklinča cyłkownje štyri kruchi jako prapremjery. Składnostnje swojich njedawnych 90. narodnin steji Klětnjan Hinc Roj w srjedźišću, štož so w hesle „ROY 90!“ wotbłyšćuje. Tři z planowanych pjeć koncertow su hudźbnicy dotal wuspěšnje zmištrowali a připosłucharjow w Choćebuzu, Budyšinje a Wo­jerecach zahorili.

Štyri prapremjery a překwapjacej nowosći

Koparske mustwo Sportoweho towar­stwa Horni kraj-Sprjewja, kotrež hraje w krajnej klasy, je swó­j titul na 6. S-mobil-cupje w Kamjencu zakitowało.

Před něhdźe 300 přihladowarjemi w sportowni při Kamjenskim lětanišću, mjez nimi tójšto Serbow, překwapi cyłk znowa wšitkich faworitow a so suwerenje přesadźi. Halowy turněr, na kotrymž so wosom koparskich mustwow wobdźěli, wotmě so tradicionalnje dźeń po Budyskim Landskron-cupje. Tón bě lětsa Jednota Kamjenc dobyła. Tež na swójskim turněrje pokazachu chowancy trenarja Franka Ričela dobry wukon a zawěsćichu sej 3. městno. Mjez nimi bě hrajer Serbskeje koparskeje wubranki Patrik Woko. Rodźeny Šunowčan je so w běhu 1. połserije 2017/2018 k stajnemu hrajerjej Jednoty we wyšej lize wuwił.

Lětuši kickerowy turněr Wotrowskeje młodźiny O² budźe sobotu, 17. měrca. Maksimalnje 48 dwójkow smě sobu hrać. Nimale štyrceći je so po Facebooku hižo přizjewiło. Startowy pjenjez wučinja sydom eurow na hrajerja. Zwučować móža cyłki wot 14.30 hodź., prěnja hra započnje so w 16 hodź. Městnosć wubědźowanja budźe znowa stara šula we Wotrowje. Jurij Bjeńš