Z wudaća: srjeda, 17 januara 2018

Za 3. februara přeprošeja zapósłancaj krajneho sejma Frank Hirche a Alojs­ Mikławšk a zapósłanc europskeho parlamenta Hermann Winkler (wšitcy CDU) zhromadnje z Młodej uniju Budyšin na halowy koparski turněr CDU za mło­dźinske a wólnočasne mustwa. Přizjewić smědźa so cyłki z regiona stareho wo­krjesa Kamjenc a města Wojerec. Turněr wotměje so wot 13 do 18 hodź. we Worklečanskej sportowni. Hrać ma so w mustwowej sylnosći 1:3. Přizjewjenja su hač do 25. januara pola Alojsa Mikławška pod 03578-305383 abo A.Mikwauschk@ online.de móžne. Jurij Bjeńš

Kompromis Korutanskim Słowjencam wjetše zrozumjenje njewunjesł

Hnydom dwě njewjedrje stej srjedź decembra nad małej słowjenskej gmejnu w Korutanskej Žitara vas (Sittersdorf) howriłoj: Wichorisko Yves bě štomy złamała a hobersku škodu tež na domskich činiło. A w gmejnskej radźe bě lódzymna, wšitke politiske strony přesahowaca fronta přeće słowjenskeje mjeńšiny, připrawić dwurěčnu wjesnu taflu, pod rozbitki nadźije wotnjesła. Kompromis wo wjesnych taflach z lěta 2011 měješe so wo to postarać, zo so němska wjetšina a mjeńšina Słowjencow přibližitej.

Ličba Korutanskich Słowjencow je so po oficialnych podaćach w minjenych sto lětach wot něhdźe 60 000 na 12 000 pomjeńšiła. Při čimž pak běchu so při lud­ličenju skerje za wšědnej wobchadnej rěču prašeli. Nimo toho bě k njewujasnjenym chabłanjam dóšło, kotrež zwisuja z metodu naprašowanja, kaž rěkaše. Słowjency sami – w Korutanskej mjenuja jich jednorje ludowu skupinu – pak wuchadźeja z toho, zo maja hišće něhdźe 50 000 přisłušnikow.

Němcy abo Słowjency: Hač do 19. lětstotka njebě w Korutanskej wažne, hač sy Němc abo Słowjenc. Nimale kóždy třeći měješe tam słowjensku/němsku wowku abo němskeho/słowjenskeho dźěda. Přiběracy nacionalizm pak zhromadne žiwjenje wobeju ludow za­mući. Po Prěnjej swětowej wójnje je nowe kralestwo Słowjencow, Chorwatow a Južnych Serbow spytało sej južnu Korutansku zdobyć. Korutanojo pak so wobarachu.

Wobchod na pospyt, tak mjenowany test-shop, je tele dny Gordian Kral při Budyskim hotelu „Best Western“ wotewrěł. Najprjedy raz tři měsacy předawa wón tule pod hesłom „Helmheld“ kolesowanske a sněhakowanske nahłowniki. Hromadźe z Timom Döku­ je Serb z Chelna před lětomaj pod samsnym mjenom internetny wobchod wutworił, kiž derje běži. Z toho wšak nastawa problem, zo trjebataj młodaj mužej wjace městna za skład. Tón nětko hromadźe z předawanišćom mataj. Swoje inowatiwne nahłowniki­ předawataj Kral a Döke wot póndźele do pjatka stajnje wot 16 do 18 hodź. Jeli wšitko derje poběhnje, móhło z pospytneho­ wobchoda­ stajne předawanišćo nastać. Foto: Carmen Schumann

Towarstwa najwšelakorišeho razu prěnje tydźenje lěta wužiwaja, zo bychu swoje dotalne dźěło bilancowali a so čłonam za skutkowanje dźakowali. Wčera bě tomu we Worklecach tak.

Worklecy (aha/SN). W juniju 2016 wopušćichu sotry rjadu Božeje předwidźiwosće – sydom jich tehdy hišće bě – Worklecy a podachu so do maćerneho domu w Münsteru. Tak njeje so jenož wobraz wsy změnił, ale tež jich ­zamołwite hladanje wjesneje kapałki so zakónči. Mnozy wěriwi Worklečenjo sej wuwědomichu, zo je zwučeny wopyt Božeje mšě njedźelu we wsy wohroženy. Zo pak njeby k tomu dóšło, běchu njeposrědnje do wopušćenja rjadniskich sotrow załožili Towarstwo kapałki Marije maćerje Božeje Worklecy, kotremuž dźensa 53 čłonow přisłuša.

Gmejnscy radźićeljo Łaza so z wjelkami Minakałskeje črjódy zaběrali

Łaz (AK/SN). W normalnym padźe so wjelki w přirodźe čłowjeka zdaluja. „W Sakskej wjelk hišće ženje čłowjeka nadpadnył njeje. Přiwšěm njesměmy jeho podhódnoćić. Wjelk je strašne dźiwje zwěrjo. To dyrbjeli wobkedźbować“, podšmórny referentka Rěčičanskeho kontaktneho běrowa „Wjelki w Sakskej“ Jana Endel na wčerawšim­ posedźenju Łazowskeje gmejnskeje rady.

Wojerecy. Zymske prózdniny steja nimale hižo před durjemi. Za wonej dwaj tydźenjej wot 12. hač do 23. februara změja na Wojerowskej dźěćacej a młodźinskej farmje w nošerstwje Křesćansko-socialneho kubłanskeho skutka tójšto zajimawych poskitkow. Wotewrjena budźe farma za čas prózdnin wot póndźele hač do pjatka wot 10 do 18 hodź., nimo róžoweje póndźele. Poskitk w tym času saha wot póstniskeje party přez wosebity dźeń wo wjelkach hač k cirkusowej šuli. Paralelnje k tomu změja w druhim tydźenju dźěłarničku za bubnarjow. Dospołny program nadeńdu zajimcy pod internetnej adresu www.csb-miltitz.de.

Budyšin (SN). Wosebity bus Budyskeje měšćanskeje biblioteki budźe tež lětsa w sprjewinym měsće a w někotrych gmejnach Budyskeho wokrjesa po puću. Wotpowědny plan je měšćanske zarjadnistwo nětko wozjewiło. Bus pojědźe w tydźenjach z runej a z njerunej ličbu po dwěmaj čaromaj. W runych tydźenjach pozastanje bus na přikład stajnje wutoru wot 13.30 do 14.15 hodź. při wjesnej šuli w Bórku, srjedu wot 12.45 do 14 hodź. při Budyskim šulskim a zetkawanskim centrumje a pjatk wot 15.15 do 16.45 hodź. w Małym Wjelkowje na Zinzendorfskim naměsće. W njerunych tydźenjach su předwidźane mjez druhim stacije wutoru wot 15.30 do 16 hodź. w Hrodźišću, wot 16.15 do 16.45 hodź. we Worcynju a wot 17 do 18 hodź. na Wósporskim torhošću. Srjedu pozastanje bus w 14.15 hodź. w Chwaćicach, w 15 hodź. we Wulkej Dubrawje, w 16.15 hodź. při wohnjowobornej gratowni w Klukšu a w 17.15 hodź. na nawsy w Zdźěri.

Ćeknjeneho spěšnje lepili

Kamjenc. Ćeknjeneho zawinowarja wobchadneho njezboža je policija zawčerawšim rano w Kamjencu spěšnje lepiła. 29lětny bě ze swojej Mazdu při tankowni na Sewjernej hasy wróćo jěł a při tym do za nim stejaceho Forda storčił. Město toho zo by škodowanemu swoje personalije a zawěsćenske daty přewostajił, stupi wón na płun a ćekny. Informowani policisća namakachu awto krótki čas pozdźišo na parkowanišću a jeho wobsedźerja wuslědźichu. Tón činješe, kaž njeby wo ničim ničo wědźał. Bórze na to pak dóńdźe k njewočakowanemu zasowidźenju z wodźerjom wobškodźeneho Forda. 42lětny mjenujcy wuhlada policajske awto a jemu znateho zawinowarja. 29lětnemu ničo njezby, hač swoju winu přiznać a přilubić, zo škodu ně­hdźe 400 eurow zaruna. Hač pak to dosaha so chłostanju wuwinyć, je dwělomne.

Brězowski jězor je hižo dlěje hač 35 lět dowolowa idylka wšitkim, kotřiž lubuja měr a so rady kupaja. Tež tu profituja wo wuwiću, zo dale a wjace ludźi swój dowol w Němskej přežiwja. Jost Schmidtchen je so wo tym z jednaćelom zaměroweho zwjazka Lotharom Ahrom rozmołwjał.

Knježe Ahro, kak su so ličby wopytowarjow loni při Brězowskim jězoru wuwili?

L. Ahr: Z dokładnje 19 463 přenocowanjemi na přibrjohomaj za tekstil a FKK mějachmy loni stopnjowanje wo 400. Docpěli pak smy stopnjowanje jeničce na přibrjohu za FKK, hdźež mamy kupanišćo, stanowanišćo a předawanišći zakuskow. Tónle wobłuk je dźeń a woblubowaniši. Cyłkownje smy tam 5 931 přenocowanjow zličili.

Zwotkel kupacy, stanowarjo a dalši dowolnicy su?