Z wudaća: štwórtk, 21 junija 2018

Swójbu trochu powjetšić a prěnjorodźenemu synkej Vojtěchej snano sotřičku přidać bě wotpohlad mandźelskeju Josefa a Heleny N., zrazom wšak rozrosće wona na sydom hłowow. W Praskej uniwersitnej klinice Motol porodźi mać štwórniki – dźowčički Anežku, Moniku a Klaru kaž tež synka Ondřeja. Naposledk běchu so štwórniki w Čěskej před 15 lětami narodźili, wot 1950 su to 22te.

Nadróžneho dealera ze 70 kokainowymi kulkami w spódnich cholowach je policija w Düsseldorfje zajała. Dalše dźesać kulkow, tak mjenowane bubblesy, nańdźechu zastojnicy w hubje muža. 39lětny bě zastojnikam njedaloko hłowneho dwórnišća napadnył, jako runje drogi předawaše. Tuž jeho dokładnišo přepytachu. Při tym namakachu małe do celo­fana zawite kulki.

Berlin (dpa/SN). Zakitowanska ministerka Ursula von der Leyen (CDU) je sej zjawne powučenja a kritiku z Běłeho domu w zwisku ze zwadu němskeho zakitowanskeho etata dla zakazała. Němskej je wažne, zo swoje zaměry ze swójskej mocu docpěje. „Komentary na kromje hrajnišća tym njepomhaja, kotřiž na hrajnišću steja“, rjekny wona na wopyće we Washingtonje. Je rozsudne, zo spontanje „wot jednoho tweeta k přichodnemu“ njereagujemy, ale zo přiwšěm na transatlantiske partnerstwo njezabudźemy. Mjez USA a zwjazkarskimi krajemi jewja so přiběrajcy napjatosće zakitowanskeho etata dla. Při tym bě Trump wospjet němske knježerstwo šwikał.

Drježdźany (dpa/SN). Sakska Lěwica je kritisce na namjet ministerskeho prezidenta Michaela Kretschmera (CDU) reagowała, zarjadować we Łužicy „wosebite hospodarske pasmo“, zo móhli strukturnu změnu po zakónčenju wudobywanja brunicy lěpje zmištrować. „Myslička ­njeje nowa a je zdobom jasne znamjo bjezradnosće“, rjekny Nico Brünler, za­pósłanc Lěwicy w Sakskim krajnym sejmje. Předewzaće, na wuchodźe swobodneho stata dźěl płaćiwych hospodarskich, dawkowych a socialnych zakonjow zběhnyć, njeje ničo druhe hač „wuznaće hospodarskopolitiskeho zaprajenja“. Brünler poćahowaše so na wuprajenja Kretschmera minjeny pjatk na wobydlerskim forumje we Wojerecach. Nowinarjo běchu jeho ze słowami citowali: „Znižiš-li dawki, přiwabiš tych, kotřiž chcedźa porjadnje pjenjezy zasłužić. To wšak je to, štož chcemy: Zo wuspěšni ludźo do Łužicy přińdu a tu swoju mzdu dóstawaja.“ Štóž chcył z tajkimi wupra­jenjemi wulkoinwestorow do Łužicy wabić, za­haji „dumpingowe wubědźowanje mjez regionami, kotrež na kóncu wšitke přěhraja, zapósłanc Lěwicy rjekny.

Minister Dulig železnisku čaru Drježdźany–Praha w Brüsselu předstajił

Drježdźany (dpa/SN). Sakski hospodarski minister Martin Dulig (SPD) je předwčerawšim, wutoru, komisiju Europskeje unije w Brüsselu wopytał. Tam prezentowaše w swojej funkciji jako wobchadny minister plany za nowotwar železniskeje čary z Drježdźan do Prahi. Wobchadne předewzaće, kotrež su kónc lěta 2017 do lisćiny wažnych projektow zwjazkoweho wobchadneho plana zapisali, je tuchwilu w zažnej fazy planowanja. Nazymu liča z tym, zo Němska železnica projektej doskónčnje přihłosuje. „Jedna so wo generaciski projekt europskeho wuznama. Trjebamy tuž podpěru EU.“

Němska ma šěsnaće zwjazkowych krajow. Jedyn z nich, Bayerska, so na zwjazkowej runinje chětro wupěra. Strona CSU twori ze swojej sotru CDU uniju a sedźi tuž w knježerstwje. Samozrozumliwje ma tak zdobom prawo na ministerstwa. Tři z cyłkownje pjatnaće tuž tuchwilu kruće w horšći dźerži. Hladajo na docpěte hłosy při wólbach zwjazkoweho sejma ze 6,2 procentomaj je to wjele. Nětko pak wosebje nutřkowne ministerstwo z Horstom Seehoferom chětro wótrje nastupajo ćěkancow wustupuje. Seehofer a bayerski mi­nisterski prezident Markus Söder (CSU) zastupujetaj raznu liniju, a to cyle w zmysle bayerskeje filozofije „Mia san Mia“– my smy my. Ke kompromisam njejstaj zwól­niwaj, wšitcy měli so po nimaj měć. Mje, sprawnje prajene, njezadźiwa, zo daloki wukraj Němcow z kožanymi cholowčkami a dirndlemi zwjazuje. Runje tajki wobraz z bayerskimi akterami na čole tuchwilu na cyły swět skutkuje. Bianka Šeferowa

W rozprawje „SCS swoju prěnju CD předstajił“, we wudaću Serbskich Nowin ze 4. junija, jewitej so zmylkaj. Prawje ma rěkać: „Sydom spěwarjow … zanjese wšitke na zynkonošaku zwěčnjene pěsnje, kotrež su zwjetša wobdźěłanja ... kaž tež swójske a cuze kompozicije kaž drje najznaćiši hit ćělesa ‚Jen běły šwon‘.“ W předposlednjej sadźe měło stać: „Spisałoj staj pěsnje mjez druhim Jan Cyž a Tadej Nawka.“ Awtor prosy wo wodaće za misnjenje. redakcija SN

Portugal je w swojej druhej skupinskej hrě prěnje dobyće docpěł, a to 1:0 přećiwo Marokku. Hižo w 4. min. trjechi Cristiano Ronaldo. Po krótko wuwjedźenym róžku zhłójčkowa portugalski superstar bul do syće. Wón nawjeduje nětko lisćinu najlěpšich třělcow ze štworymi wrotami z dweju hrow na aktualnych swětowych mišterstwach a je dotal wšitke wrota za swoje mustwo třělił.

Tež wubranka Uruguayja je kaž wočakowano swoju druhu skupinsku hru dobyła. Chowancy trenarja Óscara Tabáreza přewinychu Sawdi-Arabsku z 1:0. Třělc bě něhdyši „kusak“ Luis Suárez. Wón steješe w swojej stotej hrě za narodne mustwo na prawym městnje a je bul po róžku do prózdnych wrotow sunył (23.). Kwalifikowanej za wosmifinale w skupinje A wubědźujetej so Uruguay a Ruska tuž póndźelu wo stafloweho dobyćerja.

Wjacore tydźenje nas wjedro z lětnimi temperaturami zapleńča, tak zo knježi kaž tule při Budyskim spjatym jězoru a při wjele dalšich kupanišćach čiłe žiwjenje. Ratarjo, zahrodkarjo, rybarjo a mnozy dalši wšak mjeztym wulkeje suchoty dla skorža. ­Poprawny započatk lěća wšak je hakle dźensa, ale hižo jutře ma so chětro wuchłódnić. Foto: SN/Maćij Bulank

Róžant (AK/SN). „Carpe diem“ rěka napis, kotryž ma Tilo Žur w swojim domje w Róžeńće wisajo. „Wužiwaj dźeń,“ to je za njeho wšědna motiwacija. Wot kónca meje je 49lětny – spřisahany wot sudnicy na Kamjenskim zarjadniskim sudnistwje Susanny Kühnel – zastupowacy změrc w pjeć gmejnach zarjadniskeho zwjazka Při Klóšterskej wodźe. Jako naměstnik je wón loni spřisahanemu změrcej Eduardej Luhmannej ze Smjerdźaceje poboku. „Chcu čestnohamtske dźěło skrućić a so na dobro towaršnosće zasadźeć“, Róžeńčan podšmórnje.

Starši a dźěći chcedźa zadźěwać, zo dyrbi přidružnik šulu wopušćić

Łaz (CK/SN). Sakska pyta młodych a zahorjenych wučerjow. Za tajkeho maja šulerjo a starši Daniela Volkmera, kiž na Łazowskej wyšej šuli hudźbu a němčinu podawa. W přichodnym šulskim lěće 2018/2019 pak to po wšěm zdaću hižo njebudźe, znajmjeńša nic na samsnym kubłanišću. Přećiwo tomu su starši a šulerjo spočatk tydźenja protestowali a při haće napřećo šuli demonstrowali.

Daniel Volkmer je germanistiku a hudźbu studował. Wón je kantor w Rěčicach a skutkuje wot lońšeho decembra na Łazowskej šuli jako přidružnik. Na dnju ­wotewrjenych duri w februaru bě nawodnica šule Margit Hypko hišće ­rjekła, zo z nim škałobu začinja a „zo so wjesela, zo tu je“.