Z wudaća: pjatk, 13 julija 2018

Pokradnjeny pulower je muža w Kotmarjecach w Zhorjelskim wokrjesu do jastwa přinjesł. Paduch bě so srjedu wječor w koloniji małozahrodkarjow do dźewjeć lawbow zadobył. Tam spakosći nimo kapsneje lampy tež čerwjeny pulower. Muž sej jón přez hłowu sćahny a nóžkowaše tajki woblečeny woměrje po wsy z 2 800 wobydlerjemi. Tak wšak wobsedźerjej napadneho pulowra napadny. Přiwołani policisća zwěsćichu, zo přećiwo 40lětnemu konsuma drogow dla hižo dlěši čas wukaz zajeća předleži.

Wot koparskeje euforije Chorwatskeje natyknjene je tež knježerstwo kraja, po tym zo je so mustwo do finalneje hry w Ruskej dóstało. Kompletny kabinet ministerskeho prezidenta Andreja Plenkovića je wčera w Zagrebje w trikotach narodneho mustwa na posedźenje přišło a wobrazy wo tym wozjewiło.

Berlin (dpa/SN). Zwjazkowe knježerstwo chce we wšitkich wulkoměstach Němskeje přizjewjernje antisemitiskich njeskutkow zarjadować, tež za tajke, kotrež njejsu chłostajomne. „Njesměmy w towaršnosći liwkosć napřećo antisemitistiskim skutkam akceptować. Tohodla dyrbimy tež podawki tematizować, kotrež njejsu chłostajomne, rjekny społnomócnjeny zwjazkoweho knježerstwa přećiwo antisemitizmej Felix Klein nowinarjam. Wón chcył sej přehlad stworić wo njeskutkach pod hranicu chłostajomnosće, kaž su to na přikład móranja abo njepřećelskosće. Nastork akcije bě nadpad na młodeho ­Israelčana w Berlinje. Jeho běchu atakowali, dokelž měješe kipu na hłowje.

Budyšin (SN/MkWj). Serbski zapósłanc CDU w Sakskim krajnym sejmje Marko ­Šiman je so wčera w diskusiji wo dwu­rěčnych napisach na taflach słowa jimał. „Zakonske rjadowanje je cyle jasne: Serbske a němske pismo ma jenak wulke być. Dźiwam so, zo so tute rjadowanje přeco hišće tak mało wobkedźbuje“, rjekny Šiman na wčerawšej nowinarskej rozmołwje w Budyšinje. Wón skedźbni w tym zwisku na praksu w druhich krajach. Tak je w Šwicarskej runje tak kaž w Južnym Tirolu abo w Montenegru samozrozumliwe, zo je pismo wšitkich ludowych skupin na taflach jenak wulke. Samo w Israelu, hdźež knježa hoberske napjatosće mjez židowskimi a palestinskimi wobydlerjemi, su jenak wulke napisy w hebrejšćinje, arabšćinje a jendźelšćinje wšědna praksa.

Skónčnje so woni hibaja. Tak abo podobnje su wčera zawěsće tež starši myslili, kotřiž běchu na wuradźowanje gmejnskeje rady Ralbicy-Róžant přišli. Ta bě mjenujcy architekturne wubědźowanje za nowu pěstowarnju w Ralbicach wotprajiła a wobzamknyła, zo móža skónčnje twar kubłanišća planować započeć. Te wšak je hižo wjacore lěta tema w Delanach, jenož hibało so dotal ničo tak prawje njeje. Derje, zo su radźićeljo wubědźowanje wotprajili. Tak njelutuja jeno čas, ale tež šwarny fenk, kotryž budu za twar pěstowarnje trjebać. A staršim bě to zdobom jasny signal – za dorost, za dźěći a přećiwo wotchadej młodźiny. Sprawnje prajene móhli wubědźowanje hižo dawno wotprajić, mjenujcy na posedźenju 24. meje. Hižo tam bě jasne, zo dyrbi so najručišo něšto stać. A jasne tež bě, zo wubědźowanje naležnosć njetrjebawši dliji. Hejatosće někotrych zamołwitych dla pak je komuna ­nimale měsacaj zhubiła a dyrbi so nětko do spěcha měć. Janek Wowčer

Demonstranća předsydku najwyšeho sudnistwa Pólskeje na dźěło přewodźeli

Waršawa. Wjerškowe zetkanje 29 čłonskich statow NATO w Brüsselu je tež w Pólskej wusahowaca tema. Jara dokładnje medije kóždu kročel pólskeho prezidenta Andrzeja Dudy sćěhuja. Tak su registrowali, zo je so wón na kromje wjerška dwójce z prezidentom USA Donaldom Trumpom zetkał. Tón wšak bě ze swojim žadanjom njeměr zbudźił, zo měli čłonojo NATO znajmjeńša dwaj procentaj swojeje hospodarskeje wukonliwosće za brónjenje wudawać. Z wulkej hordosću Pólska na to pokazuje, zo je mjez tymi kra­jemi, kotrež žadanja ame­riskeho prezidenta spjelnjeja. Raznu kritiku Trumpa na adresu Němskeje, kotraž runje 1,2 procentaj za wójsko nałožuje, we Waršawje ze spokojenjom registruja. Hižo tam rozmysluja, kak měli reagować na žadanje Trumpa, zwyšić wudawki ­za brónjenje na štyri procenty: Snano móhło knježerstwo přichodnje 2,5 procentow do wójska inwestować.

Praha (ČŽ/K). Čěska ma 264 dnjow po wólbach zaso knježerstwo z dowěru. Procedura zeskutkownjenja bě tež hišće raz ćežki porod – 16 hodźin su zapósłancy kontrowersnje diskutowali, prjedy hač móžachu wothłosować. Po połnocy wupraji potom 105 zapósłancow dowěru premierej Andrejej Babišej a jeho kabinetej, wobstejacemu z dźesać ministrow Hibanja njespokojnych wobydlerjow (ANO) a pjeć ministrow ČSSD. Přihłosowali su mandatnicy ANO a socialdemokraća kaž tohorunja komunisća, kotřiž běchu so z wosebitym dorěčenjom k tomu zawjazali. Dowěru zapowědźiło je 91 zapósłancow stron ODS, Piraća, SPD, KDU-ČSL, TOP 09 a STAN. Štyrjo za­pósłancy njejsu so wšelakich přičin dla ­na wotumje wobdźělili.

Njetraješe dołho, a mexiski fotograf powěsćoweje agentury AFP Yuri Cortez bě na swětowych koparskich mišterstwach w Ruskej nadobo mały star. Koparjo chorwatskeho narodneho mustwa su so po dobyćerskich wrotach Marija Mandžukića w połfinalu přećiwo Jendźelskej tak wjeselili, zo fotografa, kiž steješe na kromje hrajnišća, bjez wotpohlada ­powalichu. Cortez, fotograf powěsćoweje agentury Agence France Presse, ležeše nadobo zhromadnje z hejsowacymi Chorwatami na zemi, při čimž pak dale fotografowaše. A tak nastachu najrjeńše wobrazy wječora. Jako bě třělc wrotow Mandžukić pytnył, zo su wón a sobuhrajerjo Corteza powalili, zawda fotografej ruku, zo by jemu stanyć pomhał. Ivan ­Rakitić a Domagoj Vida staj so pola Mexičana samo z hubku zamołwiłoj.

London (dpa/SN). W dotal njesłyšanym interviewje składnostnje swojeho prěnjeho wopyta jako prezident USA ­we Wulkej Britaniskej je Donald Trump w krizy tčacu britisku premierministerku Theresu May jeje strategije brexita dla nadběhował. Dojednanje, wo kotrež so May z EU prócuje, njewotpowěduje tomu, za čož su Britojo w referendumje hłosowali, rjekny Trump bulwarnej nowinje The Sun. „Bych to cyle hinak činił. Sym Theresy May woprawdźe rjekł, kak ma so to činić, ale wona njeje na mnje słuchała“, cituje nowina Trumpa. Zdobom chwaleše wón kontrahenta premierministerki, něhdyšeho wonkowneho ministra Borisa Johnsona, kotrehož wotstup je pječa „z wulkim wobžarowanjom“ na wědomje wzał. Trump zwura­zni, zo nochcył Johnsona a May mjez sobu wuhrać. Rjekny pak: „Myslu sej, zo by Johnson wulkotny premierminister był.“

Po informacijach The Sun bě so rozmołwa nowinarjow z Donaldom Trumpom hižo tydźeń do wjerška NATO w Brüsselu wotměła. Wurězki wozjewichu wčera wječor, krótko po tym zo bě May Trumpa na galadinner witała.

Zajutřišim, 15. julija, je zaso tak daloko: Twjerdźizna Königstein přeměni so njedźelu wot 12 do 17 hodź. na swět bajkow. Na swje­dźenju stawiznow dožiwja dźěći ze swojimi staršimi pod hesłom „Běše jónu“ najwšelakoriše dyrdomdeje znatych bajkowych­ postawow. Prěni króć změja na jónkrótnym zarjadowanju krasny marokkoski kralowski stan. Foto: Sebastian Thiel

Kaž je skoro wšudźe přate, knježi tež w lektoraće LND wěsty porjad. Njeměnju z tym, zo leži kóžda akta na swojim městnje, ale rěču wo kompetencach a zamołwitosćach. Kóždy z nas lektorow je spe­cializowany na wěsty žanr, w kotrymž so wosebje derje wuznawa, hdźež ma naj­lěpši přehlad wo wot­powědnej literaturje, hdźež znaje swojich awtorow, fotografow, ilustratorow a wě wo wosebitych paslach nastupajo produkciju swojich knihow.