Z wudaća: pjatk, 19 oktobera 2018

Koparski derby w Radworju

Runje w najnjepřijomnišim wokomiku přijědu do Radworja na serbski derby Sokol­jo z Ralbic, dokelž njeje młody Ra­dworski cyłk dotal w aktualnej hrajnej dobje žanu z wosom hrow dobyć móhł. Nimo toho nastupi z Ralbičanskim cyłkom w Radworju mustwo, kotrež je so zašłu njedźelu přećiwo Bukecam blamowało. Sudnik Robert Heinrich zahwizda duel njedźelu w 15 hodź. Dale hraja:

20.10. 15:00  Módro-běli Kulow –

  SG Großnaundorf

20.10. 15:00  Rakečanske ST –

  TSV Połčnica

21.10. 12:30  SJ Chrósćicy II –

  Wojerowski FC II

21.10. 14:00  ST Marijina hwězda –

  HZ Rakecy II/Šćeńca

21.10. 15:00  SJ Chrósćicy –

  TSV Rotacija Drježdźany

21.10. 15:00  SJ Njebjelčicy –

  SV Haselbachtal

21.10. 14:00  ST Hlinowc –

  SJ Njebjelčicy II

Serbski derby při zelenych blidach

Druhe blidotenisowe mustwo Viktorije Worklecy, kotrež hraje w prěnjej wo­krjesnej klasy stafla 4, nastupi wutoru, 23. oktobra, w 19.30 hodź. doma we Worklecach přećiwo rezerwje ST 1922 Ra­dwor. Wobaj cyłkaj staj dotal štyri króć hrałoj. W tabulce steja Worklečenjo na poziciji šěsć, Radworčenjo na wosmej. Dalše blidotenisowe hry:

25.10. 19:00  DJK Konjecy III –

  SZ Ullersdorf II

26.10. 19:30  MB Njeswačidło –

  DJK Konjecy

29.10. 19:30  ST 1922 Radwor –

Spočatk pytanych słowow je wupokazany.

1 počas, 2 wysoka tem­peratura ćěła, 3 twaršćizny, 4 kraj Srjedźneje Ameriki, 5 princip, 6 hora w Kawkazu, 7 hudźbna skupina, 8 data namołwa k spjelnjenju, 9 wuzamołwjenja

Z přiwzaćom nowych čłonow, zhromadnej wječerju a zabawu je Lipšćanske studentske towarstwo Sorabija tele dny w swojim inter­naće kermušku swjećiło. Mjez hosćimi běchu zastupjerjo spřećeleneho studentskeho towarstwa Destille. Jich wosebity darik­ bě drjewjana tafla, do kotrejež běchu dźěrki točili a tak emblem Sorabije z rapakom stworili. Foto: Matej Dźisławk

Dźensa před 60 lětami podaštaj so Jan Wowčerk ze Šunowa a Marja Wjacławkec z Konjec do Ralbic na stawnistwo a zwěrowaštaj so hamtsce. 21. oktobra 1958 spožči jimaj farar Jakub Žur w Ralbičanskej wosadnej cyrkwi sakrament mandźelstwa. Zajutřišim zhladujetaj zhromadnje z přiwuznymi a mnoho přećelemi na žadnym dejmantnym kwasnym jubileju na to rjane a spomóžne minjenych šěsć lětdźesatkow. Někotružkuli će­žu­­ staj na nic přeco hładkim žiwjenskim puću w mjezsobnej lubosći a dowěrje jedy­n druhemu pomhajo přewinyłoj.

Dźensa z dejmantami pyšena jubi­larka Marja narodźi so 5. awgusta 1935 do Wjacławkec swójby w Konjecach, hdźež zastupi 1941 do šule. Za čas dźěćatstwa dožiwi surowosć wójny. Kajkosće kaž skromnosć, agilnosć, přećelne wustupowanje a runje tak swój kruty narod­ny a nabožny rjap je sej do dźensnišeho zachowała. Wuchodźiwši šulu dźěłaše w domjacym ratarstwje a něšto časa tež w Budyskej chorowni swj. Bena, hdźež je sej warjenje přiswojiła.

Gmejna Pančicy-Kukow wobsedźi drohoćinku a so wo nju stara

Wotrow (SN/MWj). Mjeztym zo zasa­dźeja komuny swoje inwesticije zwjetša za ponowjenje komunalnych pućow abo hrajkanišćow, chce gmejna Pančicy-­Ku­kow klětu pjenjezy za starožitnu dro­hoćinku wudać. Na swojim posedźenju wče­ra we Wotrowje gmejnscy radźićeljo jednohłósnje wobzamknychu, postawu swjateho Bosćana w Swinjarni restawrować dać. Wona steji na gmejnskej ležownosći. Kak pak je wona do wobsydstwa gmejny přišła, tež wjesnjanosta Markus Kreuz (CDU) rjec njemóže. Na kóždy pad je z lěta 1635 pochadźaca postawa ze zornowca w špatnym stawje, tak zo dyrbi so na njej nuznje něšto změnić.

Při rjanym babylěćnym wjedrje je tójšto čitarjow našu nazymsku křižowku wu­hódało a nam prawu wotmołwu „Hosćo du na kermušu“ připósłało. Z kartow, listow a mailkow je redakciska fortuna slědowacych dobyćerjow zwěsćiła. Nad swójbnym zastupnym lisćikom do Wojerowskeje Łužiskeje kupjele smě so Kušec swójba z Chrósćic wjeselić. Dobropis za Bu­dyski hosćenc Wjelbik přewostajimy Christinje Metašowej ze Sulšec pola Kulowa. A CD „Hura prózdniny“ smě nětko Lea Zopic z Haja pola Radworja słuchać. Dobyćerjam wu­prajamy wjele zboža a wjele wjesela z mytom. Wšitcy druzy změja za dźewjeć tydźenjow z hodownej křižowku znowa šansu na dobyće.

Mać wupomhać dyrbjała

Budyšin. Dokelž bě ze swojim kolesom bjez swěcy po puću, napadny 35lětny muž zawčerawšim wječor w Budyskej Strowotnej studni wobsadce policajskeho awta. Při kontroli zwěsćichu, zo so za nim­ hižo z přikazom zajeća pyta, dokelž pjenježne chłostanje 1 125 eurow dotal zapłaćił njeje. Nětko hrožachu jemu połtřeća měsaca jastwa. Dokelž telko pjenjez njeměješe, jeho mać za njeho zaskoči, sumu policiji přepoda a swojeho syna tak před jastwom zachowa.

Smochćicy. Na koncert z duwom „acuerdo“ pod hesłom „Tango – Musette – Klezmer“­ přeprošuje Smochčanski Dom ­biskopa Bena jutře w 19.30 hodź. Berlinskej hudźbnikaj Anja Dolak (akordeon) a Bernhard Hariolf Suhm (wioloncello) zanjesetaj mjez druhim tra­di­cionelny ar­gen­­­tinski tango, francoski ludowy walčik a klezmerowe kruchi. Při tej składnosći móža sej wopytowarjo foto­wu wustajeńcu Andreasa Varnhorna „Heimat/Domi­zna“ wobhladać. Po Bu­dyskim Serbskim domje je wona nětko w Smochćicach widźeć, a to we hłownym domje, w bróžni kaž tež w cyrkwi swja­teho Bena.

Zmije a swinjorězanje

Čorny Chołmc. Zmijowy swjedźeń ze swi­­njorězanjom wotměje so njedźelu w Čornochołmčanskim Krabatowym młynje. Wot 11 hodź. móža sej zajimcy tam ku­linariske słódnosće swinjorězanja k wobjedu popřeć. Hromadźe z dźěćimi chce Čorny młynk potom zmije pušćeć. A hdyž wětřik raz tak prawje njeduje, chcedźa na łuce na dworje młyna 2 000 krokusowych cyblow tykać, kotrež klětu nalěto nadźijomnje pisany wobraz tworja.

Kniha a jubilej

Na wopyće pola organista Chrystofa Mikławška w Serbskich Pazlicach

Kralownu instrumentow wobknježić je wulki dar. Dobry interpret zamóže přez nju ludźom do duše rěčeć, jich emocionalnje pozbudźeć a sensibilizować. Serbske katolske a ewangelske wosa­dy smědźa zbožowne być, zo maja wuběrnych organistow, kotřiž su sej na hudźbnej šuli a w priwatnym wukubłanju přiswojili hraće na krasnje klinčacym instrumenće.

Mjez tymi, kotřiž zamóža jako interpreća technisce a sensibelnje hudźbu pišće­low kemšerjam a připosłucharjam do wutroby rěčeć dać, je bórze 35lětny Chrystof Mikławšk ze Serbskich Pazlic. W dźěłarni jeho rjaneho, nowonatwarjeneho swójbneho domu hnydom začuwaš, zo je młodemu Serbej a nanej třoch dźěći – dźewjećlětneje Heleny, sydom­lětneje Luizy a dwulětneho Gabriela – hudźenje jara wažny žiwjenski eliksěr. Tutón zaćišć zwuraznjeja tam tři keyboardy, na blidźe ležace noty, při blidźe stejacy akordeon, na kamorje tačele a tačelak.

Wustajeja wuměłske twórby Wórše­ Lanzyneje w Budyskej SKI

Lědma druhi wuměłc abo druha wuměłča je před lětdźesatkami serbske tworjace wuměłstwo tak wobwliwowała a k serbskemu wuměłskemu kubłu přinošowała kaž Wórša Lanzyna. Wona je našu este­tiku wšědneho dnja sobu na načasny niwow­ zběhnyła.

Wórša Lanzyna je po studiju na Wy­sokej šuli za nałožowane wuměłstwo w Praze a naslědnje na Wysokej šuli za grafiku a knižne wuměłstwo w Lipsku wot 1956 do 1962 w Ludowym nakładnistwje Domowina serbske knihi wu­hotowała a po tym jako swobodnje skutkowaca wuměłča, zwjetša hromadźe ze swojim mandźelskim Steffenom Langu, tworiła, a to w Kole serbskich tworjacych wuměłcow.

Budyska Serbska kulturna informacija (SKI) je srjedź septembra składnostnje jeje­ 90. narodnin wustajeńcu wotewrěła, za čož sej dźak zasłuža. A čłowjek so dźiwa, zo njejstej so w Budyšinje muzej abo ga­le­rija namakałoj a so tworjenju wuměłče Lanzyneje składnostnje jubileja wote­wrěłoj. (K 75ćinam w Njeswačidle a k 80ćinam w Serbskim muzeju w Choćebuzu bě to hinak.)