Z wudaća: pjatk, 09 nowembera 2018

Dopominaja na hrózbny podawk

Smochćicy. Při pomniku Cyrila a Metoda pola Smochćic chcedźa jutře, so­botu, w 14 hodź. wopomnjenski kamjeń ze šty­rjomi taflemi poswjećić. Serbsce, němsce, jendźelsce a hebrejsce je na nich wopisane, kak běchu nacionalsocialisća kolonu židowskich žonow ze Słoneje Boršće do Miłkec honili. Jedna ze žonow je při tym žiwjenje přisadźiła. Po­swje­ćenskemu nyšporej přizamknje so swa­čina w Smochčanskim Domje biskopa Bena.

Brigada dwójce koncertuje

Slepo/Bukecy. W rjedźe lětušich nazymskich koncertow wotmějetej so dalšej jutře, sobotu, w 17 hodź. w Slepjanskim Serbskim kulturnym centrumje a zajutřišim, njedźelu, w 16 hodź. w Bukecach. Wobaj wuhotuje 1. serbska kulturna brigada. Chór, muzikanća a rejwarjo předstaja pod nawodom Friedemanna Böhmy pisany program, wopřijacy spěwy wot Korle Awgusta Kocora hač k Beatlesam. W Bukecach poskića wot 15 hodź. kofej.

Pokaza cyklus wobrazow

Pjatk 9.11. 18:00 Wopominanska straža při kopolaku Pawliny Krawcoweje we wobłuku 28. Choćebuskeho filmo­weho festiwala na Žandowskej hasy w Choćebu­zu

  18:00 Wotewrjenje fotoweje wustajeńcy Jana Zawadzkeho w Budyskim Kamjentnym domje

  18:00 Wotewrjenje wustajeńcy pawkow Wolfganga Kotise­ka w Slepjanskim Serbskim kulturnym centrumje (SKC)

  21:00 Ü30-party z kapału Jolly Jumper w Chróšćanskim Hórnikowym domje

Sobotu 10.11. 6:00 Safari po biosferowym rezerwaće Hornjołužiske hola a haty; zetkanje w Stróžanskim Domje tysac hatow

  9:00 Wodźenje po recyglingowej připrawje w Drobach

  14:00 Hornčerska dźěłarnička na Rěčičanskim Erlichtec dworje

  14:00 Přednošk prof. dr. Könitza (Uniwersita Lipsk) w Hodźijskim towarstwowym domje wo wuznamje městnych mjenow

  14:00 Poswjećenje wopomnjenskeho kamjenja při pom­niku swjateju Cyrila a Metoda k wopominanju na židowske wopory smjertneho pochoda ze Słoneje Boršće do Miłkec

  14:30 Serbske wosadne popołdnjo w Bukecach

  15:00 Přaza na Rownjanskim Njepilic statoku

  17:00 Nazymski koncert z chórom 1. serbskeje kulturneje brigady w Slepjanskim SKC

Wjele rukow, spěšna pomoc

Za jutře, sobotu, wot 9 hodź. je w Ra­dworskim sportowym centrumje dźěłowe zasadźenje planowane. Konkretne nadawki rozdźěla zamołwići na městnje. Zo by wšo spěšnje zrumowane a wurjedźene było, su wšitcy čłonojo, fanojo a přećeljo ST Radworja přeprošeni.

Wolejbulowe hry

Wolejbulistki Hrajneho zjednoćenstwa Pančicy-Worklecy hraja jutře doma we Worklecach přećiwo Ochranowskim wolejfantkam a přećiwo druhemu mustwu VV Žitawy. Prěnja partija započnje so w 14 hodź., dalša w 16 hodź. Na ćežki wonkowny nadawk podadźa so wolej­bulisća Viktorije Worklecy. Woni nastupja w 14 hodź. pola druheho wobwodneje ligi Volleys Koblicy. Za tydźeń změja „młodźi dźiwi“ potom domjacu lěpšinu, hdyž přijědu do Worklec MSV Budyšin II a Módro-běli Wojerecy II.

Koparske partije

Wodorunje: 3 wón porjedźa wobuće, 5 špatny čłowjek, 6 norwegska stolica, 7 lud, 10 čorny ptak, 13 ćopły napoj w zymje, 14 chorosć dycha dla, 15 pomocny pačenski srědk

Padorunje: 1 zapal, 2 nócny wotpočink, 3 typ čěskich awtow, 4 rěka w Ruskej, 8 jutrownik, 9 nutř­kowny dźěl ćěła, 11 mać ćipkow, 12 zběhadło

Na Rownjanskim pohrjebnišću chcedźa nětko 50 historiskich narownych kamjenjow nastajić. W přihotach na planowane přesydlenje­ běchu kamjenje restawrowali a składowali, zo móhli je na nowym městnje stajić. Dokelž pak Rowno po nowym koncepće LEAG tola njewotbagruja, tež pohrjebnišćo přenjesć njetrjebaja. Sobudźěłaćerjo Čornochołmčanskeho krajinotwar­skeho zawoda twarja nětko fundamenty, na kotrež narowne kamjenje pozdźišo staja. Foto: Joachim Rjela

Worklecy (aha/SN). Hdyž hakle 34lětny nawoda Worklečanskeje wohnjoweje wobory Bosćij Riedel zajutřišim, njedźelu, swojich kameradow a jich mandźelske do Hórčanskeho hosćenca wita, změje to wosebitu přičinu. Tam chcedźa na 75lětne spomóžne skutkowanje swojeje wohnjoweje wobory zhladować.

Stawizny Lemišowa a Stróže su zawčerawšim wječor mnohich zajimcow do přednošowarnje biosferoweho rezerwata w Stróžanskim Domje tysac hatow přiwabili. Rodźeny Stróžan a tam dźensa hišće bydlacy Sieghard Kozel (naprawo) předstaji manuskript swojeje knihi „Stróža a Lemišow – po lětstotkach, před lětdźesatkami“. W njej zwjazuje dohlad do stawiznow wobeju wsow ze swójskimi dopomnjenkami. Wulku rólu hraje při tym serbske žiwjenje na wsomaj, kotrejž běštej před lětstotkom hišće serbskej. Kniha nastawa na próstwu domizniskeho towarstwa Radiška. Po čitanju wopytowarjo z awtorom bjesadowachu. Foto: Jurij Helgest

Dźěwinscy gmejnscy radźićeljo dwójny hospodarski plan rozjimali

Brězowka (AK/SN). Gmejna Dźěwin přihotuje dwójny hospodarski plan za lěće 2019 a 2020. Inwestować chcedźa předewšěm do pěstowarnjow, do dobrowólneje wohnjoweje wobory a do wuhotowanja wsow. To podšmórny komornica Carmen Petrick na wčerawšim posedźenju Dźěwinskeje gmejnskeje rady w Brězowce. Hižo tydźenja běchu radźićeljo wo tym njezjawnje wuradźowali.

W Brězowskej pěstowarni chcedźa klětu krosnowanski nastroj natwarić a lěto pozdźišo škit před słóncom připrawić. W Dźěwinskej pěstowarni klětu pincu wusuša. Za wobě kubłanišći je předwidźane klimowu připrawu instalować, dokelž je w nimaj w lěću přećopło. Brězowsku gratownju wohnjoweje wobory planuja přichodne lěto přetwarić. To je wuměnjenje za to, zo móža tam pozdźišo nowe hašenske awto kupić. Hinak, hač dotal planowane, porno tomu w Dzěwinje najprjedy raz žane nowe jězdźidło njekupja.

Rakecy. K połčasej tuchwilneje spěchowanskeje doby programa Leader wotměje so wutoru, 20. nowembra, wot 12 hodź. zjawna regionalna konferenca w Rakečanskej bibliotece. Tam podadźa rozprawu regionalneho managementa. W 13 hodź. započnje so ekskursija z busom k projektam, kotrež buchu z pomocu spěchowanskeho programa Leader zwoprawdźene. Jězba powjedźe do gmejnow Ralbicy-Róžant, Worklecy a Chrósćicy. Kónc budźe w klóštrje Ma­rijinej hwězdźe w Pančicach-Kukowje. Zajimcy móža so na konferencu a busowu jězbu přizjewić, a to pod telefonowym čisłom 035931/ 165 60.

Paducha awta lepili

Słona Boršć. Zwjazkowa policija je wčera rano na awtodróze A 4 pokradnjene awto zawěsćiła a paducha zajała. Při Porchowskej wotbóčce napadny policistam do směra na Zhorjelc jěducy BMW z Lipšćanskim čisłom. Krótko do Hornjowujězdźanskeje wotbóčki zastojnicy wo­dźerja BMWja napominachu, za nimi jěć a awtodróhu wopušćić. Tón pak je na płun stupił a dale smalił. Blisko wotpočnišća pola Słoneje Boršće policajske awto jeho zaso dosćahny. Nadobo ćěkacy zaborzdźi a chcyše so pěši zminyć. Tomu pak policisća zadźěwachu a móžachu tak 20lětneho z Großschönauwa zajeć. Wón při­zna, zo bě BMW w Lipšćanskim zahrodnišću pokradnył.