Z wudaća: štwórtk, 13 decembera 2018

Byrnjež runje zymska přestawka była a žane dypkowe koparske hry njebyli, to dawno hišće njerěka, zo nihdźe nichtó­ za bulom njehoni. Tójšto sportowych towarstwow přewjeduje tučasnje halowe koparske turněry. Tak tež minjenu sobotu, jako přeprosy sej FSV Budis­sa Budyšin na wjacore halowe turněry dorostowe mustwa.

Hižo dopołdnja wubědźowachu so cyłki młodźiny F, popołdnju regionalne a nadregionalne mustwa młodźiny E. W tym kole bě jich sydom: FSV Budissa Budyšin, Turbina Drježdźany, SZ Blankenburg, ST 1922 Radwor, ST Horni kraj Sprjewja, Jednota Kamjenc a ST Porchow. Wone hrajachu přeco dźesać mjeńšin, kóždy přećiwo kóždemu.

Wot wšeho spočatka je za Radworskich koparjow jara­ derje běža­ło. Woni dominowachu w nimale kóždej partiji a dobychu někotre samo z tójšto wrotami rozdźěla. Jeničce přećiwo Budissy z Budyšina hrajachu njerozsudnje 1:1. Přiwšěm to dosahaše turněr dobyć.

Młodźi Radworčenjo wjeselachu so nad pokalom, medalju a słódkosćemi. Nimo toho wuznamjenichu Cajusa­ Wi­ćaza jako najlěpšeho třělca wrotow a Johanu Wjeselic jako najlěpšu hrajerku.

Pinca tabulki wokrjesneje wyšeje ligi

10. Motor Kumwałd 14 25 : 31 19

11. TSV Połčnica 15 26 : 35 19

12. ST Hnašecy-Dobruša 15 27 : 33 18

13. SG Großnaundorf 15 28 : 36 13

14. ST Porchow 15 24 : 36 12

15. Zeleno-běli Bukecy 15 18 : 53 11

16. ST Radwor 15 14 : 42 5

ST Porchow – ST Radwor 8:0 (4:0)

Zestawa hosći: Hain – Henke, Reinecke (46. Omran), Bauer (46. Amar), Šěrak, Nuk, Wjeńka, Rachel, Kral (68. Pěčak), Wjacławk, Hančik

Katastrofa a wulka hańba, někak tak hodźi so hra koparjow Radworskeho ST minjenu njedźelu w Halštrowje pře­ćiwo Porchowej wopisować. Jeno sydom dnjow po domjacym wuspěchu přećiwo třećemu tabulki, Póstej Germaniji z Budyšina, su woni direktnemu konkuren­tej w tabulce 0:8 wysoko podleželi. Na čim je zaležało, hodźi so ćežko rjec. Kóžda wotmołwa klinči skerje kaž wurěč. Štóž sej w prěnim połčasu w běhu štyrjoch mjeń­šin troje wrota napraskać da a w druhim w běhu pjeć mjeńšin dalše troje, změje sej ćežko we wokrjesnej wyše lize. Porchowčenjo sami njejsu z tajkim wysokim rezultatom ličili.

Wšěm tym, kotřiž so ze zapakowanjom a porjeńšenjom hodownych darow tróšku ćežko činja a njejsu w tym wulcy mištrojo – předewšěm wšak mužam – poskićeja we wšelakich Budyskich wobchodach znowa wosebity serwis. Za mały fenk wam fachowče kaž Ina Scholze z „Women´S Line!“ na Hłownym tothošću dary wěcywustojnje zawala. Foto: SN/Maćij Bulank

Dźěwin (AK/SN). Gmejna Dźěwin (Groß Düben) je lětsa solidnje a zlutniwje hospodariła. Kónc nachilaceho so lěta wujewja hospodarski plan komuny pozitiwny facit. To podšmórny komornica Carmen Petrick na minjenej gmejnskej radźe, informowaca wo aktualnym stawje etata lěta 2018. Při dochodach docpě komuna dotal 1 398 000 eurow, štož je nimale 156 000 eurow wjac hač w planje wupokazane. „Bjezdwěla pozitiwny to wuslědk. Předewšěm wuwiće dochodow z dawkow je k wjetšim wunoškam přinošowało. Tež z wjac připokazankow Swobodneho stata Sakskeje mamy pozitiwne efekty“, komornica wuswětli.

Přiběrali pak su lětsa tež nałožby. Wone wučinjeja cyłkownje 1 372 000 eurow, něhdźe 24 000 eurow wjac hač planowane. Carmen Petrick skedźbni tohorunja na tuchwilne likwidne srědki Dźěwin­skeje gmejny. Tam maja dotal 523 000 eurow­ k dispoziciji. „Planowali běchmy 362 700 eurow. W podobnym wobjimje so to tež hač do kónca lěta dale wuwije“, wona připowědźi. Zjimajo hodźi so tuž rjec, zo je komuna cyłkownje solidnje, zlutniwje a z disciplinu hospodariła. Masiwnych­ wupadow lětsa njebě.

Njebjelčanska gmejna zasadźa so dale za strowy wobswět

Njebjelčicy (JK/SN). Zo gmejna Njebjelčicy najwšelakoriše iniciatiwy a akcije nastupajo přirodoškit a strowy wobswět nastorkuje a zwoprawdźa, je powšitkownje znate. Z mnohimi akcijemi w tymle wobłuku bě komuna hižo wuspěšna a sta so z partnerom dalšich gmejnow. W Njebjelčicach wobhonjeja so mnohe zajimowane gmejny wo móžnosćach a nazhonjenjach, zwjazać čiłe wjesne žiwjenje z prócu wo strowy wobswět a intaktnu přirodu. Tež politikarjo su prawidłownje na wsach serbskeje gmejny po puću. Předewšěm zastupjerjo sakskeho ministerstwa za ratarstwo a wobswět časćišo w Njebjelčanskej gmejnje přebywaja. Za klětu je so hižo přizjewił sakski minister za wobswět a ratarstwo Thomas Schmidt (CDU), zo by so w Miłoćicach wobhonił wo stawje tamnišeho gmejnskeho projekta „Njebjes“. Tam ma zdobom hić wo dalše spěchowanje wobswětoškitnych naprawow.

Byrnjež Grodkowska Domowinska skupina ze swojimi 20 čłonami skerje mała była, sej jeje předsydka Petra Koark (srjedźa z knihu w rukomaj) stajnje něšto noweho wumysla a tak zhromadnosć čłonow přisporja. Tak wotměchu njedawno zaso swoju adwentničku. Nimo swjedźensce wuhotowaneje kofejoweje tafle překwapi Petra Koark, kotraž Grodkowsku Domowinsku skupinu hižo 28 lět nawjeduje a hromadźe dźerži, wšitkich z čitanjom adwentnych stawiznow kaž tež serbskich bajow. Hižo nětko mysla skupinarjo na přichodne­ swoje předewzaća. Tak wobdźěla so zajutřišim na zhromadnym spěwanju Choćebuskeho Delnjoserbskeho gymnazija ze Serbskim ludowym ansamblom w Choćebuzu, dźeń pozdźišo wopytaja adwentny koncert w Slepjanskim Serbskim kulturnym centrumje. Nowe lěto zahaja z wopytom Choćebuskeho zapusta. Foto: Martin Arlt

We Wojerowskim jězorinowym klinikumje móža nětko z nowej metodu zažneje­ diagnostiki samodruhe žony přepytować a jim sčasom jasnosć wo strowoće jich dźěsća dać.

Wojerecy (SN/JaW). Łužiski jězorinowy klinikum rozšěrja swoje móžnosće diagnostiki w klinice za gynekologiju a porodowu pomoc. To zdźěla nowinski rěčnik klinikuma Gernot Schweitzer w nowinskej zdźělence. To je móžno, dokelž maja tam z dr. Robertom Lachmannom wot oktobra noweho wyšeho lěkarja. Wón poskića w jězorinowym klinikumje wotnětka tež ultrazwukowy screening wot 12. tydźenja samodruhosće. Jednaćel klinikuma Jörg Scharfenberg wopisuje jeho jako „absolutnu koryfeju“. „Dr. Lachmann wuwi ultrazwukowy screening, z kotrymž je něhdźe 90 procentow wšitkich móžnych njenormalnosćow hižo wot 12. tydźenja samodruhosće spóznajomnych. Tak móžemy tajke sčasom wuzamknyć abo je samo wotwobarać. Wjeselu so, zo móžemy tak ze specielnymi rěčnymi hodźinami a intensiwnym poradźowanjom přichodnym maćerjam hižo po 3. měsacu samodruhosće jasnosć wo strowoće jich dźěsća dać“, Scharfenberg wuswětla.

Ćežka zražka na S 101

Jědlica. Ćežke njezbožo sta so wčera popołdnju na S 101 mjez Hornim Wujězdom a Zejicami. Tam stej VW a Ford do so zrazyłoj. Wohnjowa wobora dyrbješe šofera Forda z pomocu hydrawliskich nožicow wuswobodźić. Dwě ćežko zranjenej wosebje dowjezechu do chorownje. Tež helikopter bě na městnje. Dróha bě dlěje hač hodźinu dospołnje zawrjena.

Zjebać so njedali

Radwor. Wobšudnicy su tón tydźeń w Radworju a wokolinje spytali telefo­nisce wobydlerjam pjenjezy wulišćić. Wudawachu so jako přiwuzni, kotřiž pjenjezy­ trjebaja. Zawołani pak njedachu so zjebać a informowachu policiju.

13.12.–19.12.2018 Budyski filmowy palast:­ Geister der Weihnacht: nj 10:00 a 11:30 Tabaluga: wšědnje 13:45 (nimo srj) Tabaluga w 3 D: so a nj 11:45 Der Grinch: wšědnje 14:45 a 16:15 | nj 10:00 Der Grinch w 3 D: so a nj 12:30 100 Dinge: wšědnje 18:15 a 20:30 | pj a so 22:45 | nj 10:00 Phantastische Tierwesen 2: wšědnje 16:45, 19:45 (nimo nj a pó) | nj 20:15 | pj a so 22:30 Der Nussknacker: so a nj 12:00 | srj 13:30 Bohemian Rhapsody: wšědnje 20:00 (nimo srj) Die Unglaublichen 2: nj 10:00 Mary Poppins’ Rückkehr: srj 19:45 Der Vorname: wšědnje 18:15 (nimo srj) Elliot, das kleinste Rentier: so a nj 12:15 Mortal Engines: Krieg der Städte w 3 D: wšě­dnje 14:30, 17:15 a 20:15 (nimo srj) | pj a so 23:00 | srj 20:00 Spider-Man: A New Universe: wšědnje 14:15 Spider-Man: A New Universe w 3 D: wšědnje 15:45 (nimo srj) | srj 16:00 Halloween: pj a so 22:45

Kino-ekstra: Werk ohne Autor: nj 16:45 | pó 16:45 a 20:15

Wojerowski CineMotion: