Z wudaća: pjatk, 14 junija 2019

Kaž k lětušemu dnjej maćerje su šulerjo 1. lětnika Worklečanskeje šule tež k dnjej nana pisane postrowne karty paslili.Foto: Anja Nowakowa

Foće: Tobias Šěn
Štó wšak to njeznaje: Chodźo po zahrodźe widźiš přeco zaso wšelake dźěła, za kotrež by sej skónčnje jónu dyrbjał chwile wzać. Tak je tomu tež w Něm­čan­skej Witaj-pěstowarni „Pumpot“, kotraž je w nošer­stwje Serbskeho šulskeho towarstwa. Tamniše kubłarki startowachu tuž z wulkim wuwěškom namołwu staršim, zo bychu pomhali. Wulkotnje, hdyž so w tajkim padźe wjele zwólniwych rukow namaka, kotrež so tež po swjatoku hišće połne elana a dobreje nalady do dźěła dadźa. Zhladujemy tuž na wuspěšnu akciju. Na njej je so njedawno něhdźe 15 nanow a maćerjow wobdźě­liło. Zhromadnje su cyłe popołdnjo pilnje hrjebali, kopali a wu­sywali – haj, samo betonowali a plestrowali! Naj­wutrobniši dźak wšitkim podpěraćelam! Woni su ze swojej pomocu pěstowarsku zahrodu porjeńšili a dźěći jara zwjeselili. Team Witaj-pěstowarnje „Pumpot“ Němcy

Fota: Alfons Handrik

Před 24 lětami za­ło­žichu w Miłoćicach towarstwo, ko­trež mjenuje so Miło­čanska žaba. Towarstwo ma 66 čłonow, a jeje před­syda je Marko Kowar. Wjele lět njejsu w Miłoćicach meju stajeli a mjetali. Towarstwo je so wo to postarało, zo po zało­ženju na­łožk zaso pěstuja.

Srjedu do Božeho spěća zetka­chu so Miłočenjo k mejemje­tanju. Čłonka předsydstwa Hanka Šwejdźina bě z dźěćimi a mło­dostnymi wjele znatych serbskich rejkow nazwučowała, kotrež je 14 porow předstajiło. Lětsa běchu wšitke holcy w serb­skej narodnej drasće. Mjez młodostnymi bě Ławrjenc Bobka mejski kral a Xenija Špitankec kralowna. Najspěšnišej hólcaj běštaj Lukas Žur a Noah Šuster. Wonaj wuzwolištaj sej Maju Lochec a Lenu Metzgerec za kralownje. Wonej kaž tež lońša mejska kralowna Jolanta Klugec sedźachu na kóncu na Bobkec konju. Kralowski por z rjadu młodostnych konja wjedźeše a za nim podachu so wšitke dalše pory, kotrychž Daniel Cyž na akordeonje pře­wodźeše, na rjany swjedźeń do domu Křesćansko-socialneho kubłanskeho skutka.

Alfons Handrik

Njedawno su w Pěskecach meju mjetali. Na to so tam wšitcy wjeselachu. Kóždy wšak bě wćipny a chcyše widźeć, kak su so dźěći na to přihotowali. Wone běchu z Patrikom Šołtu a Křesćanom Bejmakom pilnje zwučowali. Zo su wjele nawuknyli, pokaza dźewjeć porow. Lóštnje a eksaktnje rejwachu Katyržinku, Hory módre, Šewca a samo modernu rejku. Škoda zo njebě jich wjac hólcow, tak by hišće wjac porow było. Wšitke holcy běchu katolsku narodnu drastu zhotowane. Najmłódšej běštaj šěsćlětnaj Lukas Smoła a Sofija Šwejdźic. Jenož wo lěto starša bě Livien Heblakec. Wjele přikleska dóstachu mali rejwarjo za swój rjany program. Michał Šefer bě najspěšniši a docpě jako prěni wjeršk meje, po tym zo bě padnyła. Za kralownu wuzwoli sej wón Emiliju, kotraž ze swójbnym mjenom připadnje tež Kralec rěka. Kralowski por na čole tamnych porow spěwajo po wsy ćehnješe. Na akordeonje hrajo přewodźeštaj rjany ćah Beno Buk a Michał Šołta. Za rjany mejski swjedźeń dźakuja so wšitcy młodźinskemu klubej, kotryž nawjeduje hižo nimale tři lěta Aleksander Wałda. Alfons Handrik