Z wudaća: pjatk, 15 septembera 2023

Wutwar infrastruktury za wobchad, nowe dźěłowe městna, zwadny tepjenski zakoń a wjac wěstoty za kolesowarjow – tute temy su zapósłancej Markej Šimanej (CDU) tuchwilu wosebje wažne.

Zwickau (dpa/SN). Awtotwarc Volkswagen wottwarja sta městnow w swojej tworni elektroawtow w Šwikawje. 269 ­časowje wobmjezowanych dźěłowych zrěčenjow, kotrež so bórze skónča, nochcedźa hižo podlěšić. Tole je předewzaće po wčerawšej zawodnej zhromadźiznje zdźěliło. Hłowna přičina je „aktualne połoženje na wikach“. Hladajo na inflaciju a woteběrace premije za nakup kupuja ludźo dale a mjenje elektroawtow. W Šwikawje twarja jenož hišće elektroawta.

Rěča wo ponowjenju kolijow

Frankfurt n. M. (dpa/SN). Nuznje trěbne ponowjenje kolijoweje syće němskeje steji w srjedźišću dźensnišeho „kolijoweho wjerška“. Wobchadny minister Volker Wissing (FDP) je zastupnikow železnicy a twarskeje industrije na Frankfurtske wiki přeprosył, zo móhł z nimi najefektiwniše postupowanje wotrěčeć. Železnica chce přichodne lěta wažne wotrězki dospołnje ponowić a je za to měsacy dołho za­wrěć. Tole by wulke wobjězdki a wobšěrne změny jězbnych planow zawinowało.

Syn Bidena wobskorženy

Što njewšědne wobsydstwo za gmejnu scyła woznamjenja?

Njeswačidło (UM/SN). Štó drje wo tym njesoni, měć swójski hród? Za Njeswačansku gmejnu je tónle són woprawdźitosć. Wona wobsedźi daloko znaty hród z parkom, kiž wjele wopytowarjow do gmejny sewjernje Budyšina přiwabja. Lětsa swjeći barokna připrawa, do kotrejež słušeja tohorunja wjacore pawiljony, 300. róčnicu. Wo tym swědči mjez druhim z wjele prócu zestajena wustajeńca w domizniskim muzeju. Što pak za mału wjesnu gmejnu kaž Njeswačidło woznamjenja, hród wobsedźeć? „Je to wjeselo a zdobom brěmjo“, wjesnjanosta Gerd Schuster (CDU) wuznawa, jako wón durje hrodu wotamknje. Wopytowar hnydom do dawnych časow zastupi. Na wulkej žurli jako žro hrodu je wjele pychi widźeć. Wot wulkeho swěčnika pućuje wóčko k wjerchej a sćěnam, kotrež su ze stukom a mólbami wudebjene.

Dobrowólni aktiwisća wobswětoškitneje organizacije „Earth Island Institute“ zběraja symbolisce plastowe wotpadki na předwječoru mjezynarodneho zetkanja skupin, kotrež so za čiste pobrjohi zasadźuja, w philippinskej stolicy Manila. Skupiny sej ­žadaja, masowe wužiwanje plasty a druhich kumštnych maćiznow po wšěm swěće skónčić, štož je mjeztym globalnu wob­swětowu katastrofu zawinowało a mori wšědnje zwěrjata w morju. pa/EPA/Francis R. Malasig

Berlin (dpa/SN). Po z pomocu AfD wobzamknjenym zniženju dawkow w Durinskej steji CDU w srjedźišću kritiki. SPD, Zeleni a Lěwica reagowachu rozhorjeni. Opozicionelna CDU bě wčera w krajnym sejmje zniženje dawka za nakup ležownosćow přesadźiła, dokelž běchu AfD, FDP a zapósłancy bjez frakcije přihło­sowali. Ministerski prezident Bodo Ramelow (Lěwica) nima ze swojej koaliciju Lěwicy, SPD a Zelenych w krajnym sejmje žanu wjetšinu a je zasadnje na sobudźěło opozicije pokazany. Dawk žadaja sej při nakupje ležownosće. Tón je w Durinskej sobu najwjetši a je nětko wot 6,5 na pjeć procentow zniženy.

Nutřkowna ministerka SPD Nancy Faeser CDU wumjetuje, zo „wohnjowu murju“ přećiwo AfD sama wotstronja. Generalny sekretar SPD Kevin Kühnert rěči wo „pakće z djabołom“. Stronska a frakciska předsydka AfD Alice Weidel porno tomu so wjeseli: „Wohnjowa murja je powalena. A to je hakle započatk.“

Berlin (dpa/SN). Z demonstracijemi na 250 městnach w Němskej chcyše sej klimu škitace hibanje Fridays for Future dźensa wot politiki wjace napinanjow w boju přećiwo woćoplenju zemje žadać. Po wšej zemi planuje hibanje zarjado­wanja a tak mjenowane klimowe stawki w šulach. Při tym žadaja sej skónčenje zmilinjenja wuhla, wolija a płuna. „Ni­hdy njebě jasnišo widźeć hač w tutym ­lěće: Dožiwjamy wšědnje přiwótřenje klimoweje krizy a runočasnje knježerstwo bjez klima-politiskeho plana“, rjekny aktiwistka Anika Rittmann nowinarjam.

Jednaćel Ludoweho nakładnistwa Domowina Syman Pětr Cyž (naprawo) je wčera wudawaćelce Marce Maćijowej (srjedźa), lektorce Weronice Žurowej (nalěwo) kaž tež awtorkomaj Měrce Mětowej a Andreji Chěžcynej (wotlěwa) nowu zběrku „Prěni raz“ w Smolerjec kniharni přepodał. Kniha wopřijima dźesać powědkow runje telko načasnych pjerow. Foto: SN/Bianka Šeferowa

Zhromadne zetkanje serbskeju radow ze Sakskeje a Braniborskeje

Drježdźany (SN/MG). W frakciskej sydarni CDU schadźowachu so štwórtk radźićelki a radźićeljo serbskeju radow zwjazkoweju krajow Sakskeje a Braniborskeje. Je to zetkanje, kotrež wotměwaja kóžde lěto, zo bychu sej wo tym rozprawjeli, kajke běchu dźěłowe nadawki w poslednim času, ale tež zhromadne naležnosće steja stajnje na agendźe.

Wčerawše zetkanje wotewri prezident Sakskeho krajneho sejma Matthias Rößler­. W zawodnych słowach wuzběhowaše wón wažnosć serbskeju radow. We wšědnym politiskim dźěle, wosebje potom, hdyž zaběra so ze Serbami, njeńdźe mjenujcy jenož wo symbole, ale wo čiłu zhromadnosć, wo žiwu demokratiju, kotraž stajnje tež na mjeńšiny kedźbować dyrbjała.

Serbski ludowy ansambl hotuje so na prěnju wulkoprodukciju hrajneje doby 2023/2024. Dźensa, pjatk, předstaja wšitke šparty domu a hóstny Chór Budyšin prapremjerne inscenowany oratorij „Wójna a ...“ Bjarnata Krawca a Michała Nawki na žurli SLA. Jutře kaž tež za tydźeń pokazaja jón hišće dwójce w Budyšinje kaž tež raz w Choćebuzu. Foto: Martin Pižga

Serbski derby w Ralbicach

Nowowutworjene hrajne zjednoćenstwo druheho mustwa Sokoła Ralbicy/Hórki a rezerwy ST Marijineje hwězdy změje njedźelu připołdnju prěni serbski koparski derby, a to w Ralbicach přećiwo cyłkej Sportoweje jednotki Njebjelčicy. Prěnje mustwo Sokoła wočakuje we wo­krjesnej wyše lize stafloweho faworita z Biskopic.

16.09.  13:00  Budissa Budyšin –

  VfB Auerbach

16.09.  15:00  Módro-běli Kulow –

  ST Radwor

17.09.  12:30  SJ Chrósćicy II –

  SZ Steinigtwolmsdorf

17.09.  12:30  HZ Ralbicy/Pančicy II –

  SJ Njebjelčicy

17.09.  14:00  ST Marijina hwězda –

  TSV Wjazońca

17.09.  15:00  Sokoł Ralbicy/Hórki –

  Biskopičanske KT II

17.09.  15:00  SJ Chrósćicy – Sebnicy

17.09.  16:00  FC Energija Choćebuz –

  FSV Zwickau

Worklečanki w Žitawje

Druhe wolejbulowe mustwo holcow Viktorije Worklecy změje jutře swój za­zběh do noweje hrajneje doby 2023/24. W Žitawje, w tak mjenowanej Hłownej sportowni, hraja wone we wobwodnym pokalnym kole dwójce wo zaćah do finala.

16.09.  14:00  VV Žitawa II –

  V. Worklecy II (ž, pokal)

16.09.  14:00  Ochranow. Wolejfantki –

  V. Worklecy II (ž, pokal)

23.09.  14:00  Viktoria Worklecy –

  VfL Pirna-Copitz (m)

23.09.  16:00  Viktoria Worklecy –

  Wolejs Koblicy (m)

Jěchanski sport