Swjedźeń na sydom dworach

Ćisk. Kónc tydźenja swjeća Ćiskowčenjo na sydom dworach swój dworowy swjedźeń. Po tym, zo su zarjadowanje dźensa na Lohrec/Ludwigec dworje z „Hudźbu w změnje časow“ zahajili, je jutře w 9 hodź. na Schrapelec statoku dworowa Boža mša ze superintendentom na wuměnku Friedhartom Vogelom. Wot 10 do 18 hodź. su wšitke dwory wotewrjene, na kotrychž tójšto zajimaweho poskićeja. Zaklinči serbska a dalša hudźba, předstaja burske rjemjesła a tež kulinarisce změja za wopytowarjow tójšto chłóšćenkow.

Čitanska turneja LND

Njeswačidło. Swoju tradicionelnu nazymsku čitansku turneju zahaji Ludowe nakładnistwo Domowina lětsa sobotu, 21. septembra, z 25. literarnej kermušu w Njeswačidle. Wot póndźele pokročuja čitanja w Hornjej a Delnjej Łužicy, mjez druhim w Pančicach-Kukowje, Ralbicach, Brjazynje, Wětošowje a Žylowje. Pjeć knižnych premjerow je planowanych. Róža Domašcyna předstaji swoju nowu zběrku „W času zeza časa“ a Michał Anders a Pětr Lipič nowostku „Z Lipicy do hole“. Na dźesać zarjadowanjach čitaja awtorki a awtorojo z nowych knihow.