Septemberske wudaće telewizijneho magacina Łužyca wěnuje so předewšěm domchowance a łapanju kokota w Depsku. Moderator Christian Mathée rozprawja wo tradicionalnym wubědźowanju z dohromady „dźewjeć jěcharjemi a 17 potencielnymi kralownami“ a rozmołwja so z wjesnjanami a wobdźělnikami swjedźenskeho ćaha. Nimo toho wobswětluja nětko tež delnjoserbšćinu wopřijimacy přełožowanski program „Sotra“ a portretuja Choćebuski Kolektiw Wakuum jako zastupjer „feministiskeje a přiwšěm inkluziwneje subkultury w Delnjej Łužicy“. Z wosebitym přinoškom gratuluja Witaj-pěstowarni „Wila Kunterbunt“ w Choćebuzu, kotraž bu před 20 lětami załožena. Jako kulturnu chłóšćenku pokazaja nowe hudźbne widejo „Co by nadejšła“ delnjoserbskeje šansonety Leny Hauptmann, nahrawane a produkowane wot Erika a Clemenca Syškojc.

Telewizija RBB wusyła „Łužycu“ sobotu, 17. septembra, w 13.30 hodź. Wospjetowanje na samsnym sćelaku slěduje srjedu, 21. septembra, w 3.30 hodź. W mediatece RBB je magacin wot jutřišeho cyłe lěto kóždy čas přistupny.

Maćica Serbska a redakcija Serbskich Nowin přeprošatej

na diskusijny wječor wo serbskej hymnje

štwórtk, 22. septembra, ­w 19 hodź.  do Serbskeho domu w Budyšinje.

W januarje toho lěta je Maćica Serbska pod nadpismom „Su jenož ,mužojo hó­dni wěčnoh wopomnjeća‘?“ přeprosyła na zjawnu diskusiju wo serbskej hymnje a runočasnje podała namjet za mjeńšu změnu jeje druheje štučki. Jako fachowc a znajer twórby Handrija Zejlerja poda dr. Franc Šěn na spočatku krótki přehlad wo tekstowych stawiznach serbskeje hymny.

Na podijowej diskusiji wobdźěla so nimo předsydki Maćicy Serbskeje dr. Anje Pohončoweje mjez druhim basnica Róža Domašcyna, bórzomna studentka Lawrencija Hawšec a FSJnik Maksimilian Gruber.

W druhim dźělu změje publikum składnosć, so wuprajić abo diskutantam prašenja stajeć. Moderatorka wječora budźe dr. Cordula Ratajczakowa, redaktorka Serbskich Nowin. Wšitcy zajimcy su wutrobnje přeprošeni!

Regionalne piwa woptać

Budyšin. Pod hesłom „Total regional – Chmjel & słód“ přeprošuje Budyski Center na Žitnych wikach hišće hač do jutřišeje soboty na akciski program kołowokoło piwa. W 11, 14 a 16 hodź. poskićatej regionalnej piwowaraj Frenzel-Bräu ze sprjewineho města a Dźěłarnja ProBier z Kumwałda swoje produkty we wobłuku tak mjenowaneho tastinga. Přidatnu zabawu lubi „Koło zboža“. Zastup je darmotny.

Što z korony wuknyć?

Budyšin. Towarstwo Kamjentny dom pokaza jutře, sobotu, we wobłuku wosebiteho zarjadowanja „Dajće nam rěčeć – Što móžemy resp. móhli z pandemije wuknyć“ w 19.30 hodź. film Manuela Fenna „Die Welt jenseits der Stille“, dokumentowacy wosobiny za čas korony po cyłym swěće. Slědujetej čitanje „Korona: Změna perspektiwy“ z awtorku Nancy Brandt kaž tež podijowa diskusija z Fennom, Brandt a „hosćemi z lokalneje politiki, hospodarstwa a kultury“. Zastup je darmotny.

Historiske pjenjezy a bankowki

njedźelu hornjoserbsce

11:00 Łužica tutón tydźeń

11:10 Prapremjera „Mór a lubosć“

11:20 Reportaža: Pućowanje po Mon- golskej

11:45 Recensija: Kniha Měrćina Weclicha „Sonić – to tla z hrěchom njej‘“

12:00 Nabožne wusyłanje

(Jadwiga Malinkowa)

po tym zbožopřeća

delnjoserbsce

12:30 Aktualny magacin

13:00 Tematiske wusyłanje: Kruwy a mloko

13:40 Nabožne wusyłanje

(Katharina Köhlerowa)

po tym zbožopřeća