Merkel z kralom telefonowała
Hessenska koalicija wohrožena
To a tamne (26.10.18)
Motorizowany piwowy kašćik je policija w badensko-württembergskim Berglenje zadźeržała. Młody pasler bě nastroj z dźesać PS sylnym motorom na štyrjoch koleskach tak konstruował, zo móžeše z nim hač do 50 km/h spěšnje jěć. Wězo njeměješe žanu dowolnosć za nadróžny wobchad, kaž policija w swojej rozprawje piše. 21lětny dyrbješe swoju jězbu ze spěšnym piwowym kašćikom přetorhnyć. Nimo toho hrozy jemu chłostanske jednanje.
Zemske worješki su prěni króć w Tirolu žnjeli. Horce a suche lěćo wšak je plahowanje subtropiskeje rostliny zmóžniło. Žně na 300 kwadratnych metrach wulkej pospytnej płoninje njedaloko Innsbrucka pak njeběchu scyła tak jednore, dokelž dyrbjachu kóždu jednotliwu rostlinu wuryć a pod zemju narosćene worješki wotšćipać. Přiwšěm nažnjachu 200 kg.
Namołwjeja awtotwarcow
Berlin (dpa/SN). Zwjazk městow Němskeje je awtowu industriju k wjetšim napinanjam přećiwo hrožacym zakazam dieselowych awtow namołwjała. „Dlijenja a komdźenja maja so najspěšnišo skónčić“, rjekny hłowny jednaćel zwjazka Helmut Dedy powěsćerni dpa. „Awtowa industrija dyrbi skónčnje wotućić, zo by strowotu ludźi škitała a wodźerjam dieselowych awtow perspektiwu skićiła.“ Runja druhim městam dyrbja so nětko tež w Mainzu na to nastajić, zo dieselowym awtam jězdźić zakazaja.
Bomby kritikarjam Trumpa
New York (dpa/SN). Njeznaty je wjacorym prominentnym kritikarjam prezidenta USA Donalda Trumpa runočasnje rołowe bomby pósłał. Potrjecheni běchu mjez druhim bywši prezident Barack Obama, něhdyša wonkowna ministerka Hillary Clinton a bywši direktor CIA John Brennan. Pakćiki su podobne listowej bombje, kotruž běchu póndźelu w póšće miliardara Georgea Sorosa našli. Tón bě runja tamnym mjenowanym Trumpa stajnje zaso zjawnje a zdźěla dosć raznje nadběhował.
Žada sej niše dawki
Bartsch zasudźa manewer NATO
Berlin (dpa/SN). Předsyda frakcije Lěwicy w Němskim zwjazkowym sejmje Dietmar Bartsch jako signal wottrašenja Ruskeje mysleny wulkomanewer NATO w sewjernej Europje raznje kritizuje. „Je błazne, strašne a prowokantne napřećo Ruskej, w tuchwilnej klimje najwjetši manewer NATO w Norwegskej zahajić“, rjekny Bartsch nowinarjam. „Strach wójny je tak wulki kaž hižo dołho nic. Prezident USA hrozy Ruskej a Chinje z nowym jadrowym brónjenjom a wupowědźa zrěčenja wo wotbrónjenju. Kołwrótne!“
Najwjetši manewer NATO po kóncu zymneje wójny zahaji so minjenu nóc. Na nim wobdźěla so něhdźe 50 000 wojakow, mjez nimi 10 000 přisłušnikow Zwjazkoweje wobory. Woni maja dwaj tydźenjej w Norwegskej a wokolnych powětrowych a mórskich kónčinach zhromadnje zwučować. Nimo wojakow je 10 000 jězdźidłow kaž tež wjace hač 300 lětadłow, helikopterow a łódźow pódla. Zaměr manewra je, hladajo na Rusku, wotwobaranje nadpada na jedyn z 29 čłonskich statow aliancy zwučować.
Tysacy za brunicu na dróhu šli
Demonstracije na kromje schadźowanja wuhloweje komisije
Bergheim (dpa/SN). Wjace hač 10 000 přistajenych wuhloweje branše a industrije je wčera do schadźowanja wuhloweje komisije w porynskim rewěrje dosć wótře za zachowanje dźěłowych městnow demonstrowało. Z plakatami a transparentami ćehnjechu wobdźělnicy po dróhach Bergheima a Elsdorfa. Jenož něšto kilometrow dale zhromadźi so w samsnym času wot zwjazkoweho knježerstwa zasadźena komisija „Rozrost, strukturna změna a dźěło“, kotraž ma plan za kónc zmilinjenja brunicy zdźěłać. Zwjazk chce němskim wuhlowym kónčinam z pomocnym programom 1,5 miliardow eurow přewostajić, zo bychu strukturnu změnu zmištrowali. We Łužicy je so brunicowa komisija hižo zešła.
Na protestnym ćahu přećiwo spěšnemu kóncej wudobywanja brunicy je so po informacijach policije něhdźe 16 000 ludźi wobdźěliło. Dźěłarnistwo IG BCE rěčeše wo 40 000 demonstrantach, kotřiž su na dróhu šli. Na plakatach stejachu hesła kaž „Hambi dyrbi preč“ abo „Baggi wostanje“, poćahowace so na konflikt nastupajo pušćenje Hambachskeho lěsa na dobro brunicoweje jamy.
Normalny manewer?
To a tamne (25.10.18)
Ze swojej mortwej mandźelskej, připasanej na zadnjej ławce awta, je Rusa spytał do Ukrainy jěć. Zastojnicy tamnišeho namjezneho škita pak muža na přechodźe Hoptiwka na wuchodźe kraja zajachu. Šofer bě spočatnje hišće twjerdźił, zo žona jeno spi. Při kontroli pak pokaza hranicarjam smjertne wopismo swojeje dwaj dnjej do toho zemrěteje žony. Zhromadnje ze swojim ukrainskim synom chcyše muž mandźelsku na Ukrainje pochować. Ruscy hranicarjo běchu jeho bjez problemow přepušćili, ukrainscy přepytuja nětko přećiwo njemu morjenja dla.
Wjele wusměšowanja žněje nowa kolesowarska šćežka w Berlinje. Runje dotwarjena čara w Friedrichshainje přicpěwa kolesowarjam chětro horbaty asfalt. Njedostatki bě měšćanske zarjadnistwo na přepodaću šćežki zwěsćiło. Twarska firma ma čaru přichodne tydźenje zrunać, přiwšěm wostanje wona tak dołho wotewrjena. „Dobra ideja to, prohi za pomjeńšenje spěšnosće tež na kolesowanskich šćežkach zatwarić“, wužiwar interneta žortuje.
Serbja w SPD: Poskitk sejma swětej wotewrjeny
W aktualnej debaće wo Serbskim sejmje je so tež dźěłowy kruh SPD „Serbja“ słowa jimał. Jeje 1. rěčnik Benedikt Dyrlich pisa w nadawku kruha:
Tuchwilu kursěruja w zjawnosći dosć rozdźělne měnjenja k wólbam prěnjeho, swobodneho a tajnje woleneho serbskeho ludoweho zastupnistwa Serbski sejm. Mjeztym zo tójšto wuznamnych Serbow, kotřiž maja zasłužby hladajo na serbsku rěč a kulturu a so dale za to angažuja, naležnosće sejma podpěruja, spytaja někotři wodźacy zastupnicy Domowiny a politiki w Drježdźanach a Podstupimje kaž tež we Łužicy nowe reformowe hibanje mjez nami Serbami za wjace demokratije a sobupostajowanje zaborzdźić, rysujo je jako „njerealistiske“ a „přećiwo Domowinje“ měrjace so. Ignoruja při tym, zo běchu nimale wšitcy iniciatorojo a podpěraćeljo „Njebjelčanskeho apela“ a kandidaća a kandidatki za 1. sejm wjelelětni a jara aktiwni čłonojo Domowiny abo to hišće su, hdźež so w bazowych towarstwach konkretnje na polu kultury a kubłanja angažuja.
Chłostanske naprawy zahajili
Washington (dpa/SN). Po namócnej smjerći žurnalista Jamala Khashoggija zahajichu USA dźensa w nocy prěnje chłostanske naprawy přećiwo 21 sawdiskim podhladnym. Wonkowny minister USA Mike Pompeo rjekny, zo su podhladnych sobudźěłaćerjow tajnych słužbow, knježerstwa, wonkowneho a dalšich sawdiskich ministerstwow identifikowali. Jich wizumy budu sćazane abo woni budu postajeni jako wosoby, kotrež za USA hižo žadyn wizum njedóstanu.
Putin chce z Trumpom rěčeć
Moskwa (dpa/SN). Wo wosudźe wažneho wotbrónjenskeho zrěčenja z časa zymneje wójny měłoj prezidentaj USA a Ruskeje rozsudźić. To je ruski statny šef Wladimir Putin dźensa w Moskwje namjetował. W nowembrje by so wón z prezidentom USA Donaldom Trumpom w Parisu zetkać chcył. Ruska chce so dale na zrěčenje dźeržeć. Wěstotny poradźowar USA John Bolton je připowědź Trumpa na rozmołwach w Moskwje hišće raz wobkrućił a twjerdźił, zo je zrěčenje přestarjene.
Wulki hłód so přiwótřa
