Berlin (SN/at). Zwjazkowe knježerstwo planuje liberalizaciju restriktiwnych rjadowanjow nastupajo mjena w zakonju wo změnje mjeńšinowych mjenow. Na to skedźbnja sakski zapósłanc zwjazkoweho sejma Torsten Herbst (FDP), złožowacy so na wotmołwu knježerstwa na swójske małe naprašowanje. Z njeho dale wuchadźa, zo ma powołana dźěłowa skupina reformowe namjety zdźěłać. Tak chcedźa zmóžnić, zo serbske žony po zmandźelenju swójbnemu mjenu koncowku kaž na přikład „-owa“ přidadźa.

Po měnjenju Herbsta je připowědźenje knježerstwa, wobstejace rjadowanja zakonja pruwować chcyć, „wšitkim Serbowkam w Sakskej a Braniborskej dobra powěsć“. Zapósłanc so při tym pozitiwneho wuslědka jara nadźija. Njeje pak to je­nož politikar FDP, kiž swoje njezrozumjenje nad tym wupraja, čehodla njejsu serbske žónske formy mjena „-owa“, „-ina“­ abo „-yna“ za oficialne podaće při­pó­znate. Tež z frakcijow Zwjazka 90/Ze­lenych a Lěwicy bě hižo kritika na wobstejacym njedostatku słyšeć.

Torsten Herbst chce so zaměrnje wo mjenowane žadanje Serbow starać.

Budyšin (SN/at). Krajny dźěłowy kruh Serbja sakskeje SPD je štyri wosoby za wól­by Serbskeho sejma namjetował. Kaž gremij zdźěli, chcedźa so kandidaća w pa­dźe wuzwolenja po skonstituowanju zaměrnje na wobsahowym dźěle Serbskeho sejma wobdźěleć. Wo tym dorozumichu so kandidaća w rozmołwje z čłonami dźěłoweho kruha a wokrjesnymi radźićelemi SPD w Budyskim wokrjesnym sejmiku minjeny pjatk w sprjewinym měsće. Wobdźělnicy maja za wažne, zdźěłać a wobzamknyć hnydomny program za nawuknjenje serbšćiny. Za to je trjeba so dorozumić ze wšěmi akterami a zajimcami, kotrymž su dwurěčnosć kaž tež kulturna a rěčna mnohotnosć w pomjeznym regionje Němskeje, Pólskeje a Čěskeje naležnosć wutroby. Zdruha měł sejm nanajspěšnišo ze sakskim kultusowym ministerstwom plan nastajić, kak hodźi so rjadowanje sakskeho šulskeho zakonja „na wšěch šulach swobodneho stata zakładne znajomosće ze stawiznow a kulturu Serbow sposrědkować“ praktisce a skutkowanje zwoprawdźić. A střeća namjetuja wobdźělnicy iniciatiwu za ko­njunkturny program „Łužica“.

Barcelona (dpa/SN). Lěto po ludowym wothłosowanju wo njewotwisnosći Katalonskeje wot Španiskeje su demonstranća z blokadami a dalšimi akcijemi na referendum dopominali. Nimo toho su žadanje za samostatnosću regiona znowa wobkrućili. Nimo akcijow na mnohich dalšich městnach demonstrowachu wčera wječor tež tysacy ludźi w Barcelonje, k čemuž běchu wšelake organizacije namołwjeli. W centrumje metropole wisaše wulki plakat z napisom: „Samopostajowanje je čłowjeske prawo.“

Skónčnje so dojednali

Berlin (dpa/SN). Nawodźa koalicije CDU, CSU a SPD su so po šěsćhodźinskim wuradźowanju na tak mjenowanym dieselowym wjeršku wčera w Berlinje skónčnje dojednali a „koncept wo čistym powětře a zawěsćenju indiwidualneje mobility w našich městach“ wobzamknyli. Po wuprajenju šefiny SPD Andreje Nah­les dźěše zdobom wo dodatnu techniku za dieselowe awta. Detaile dojednanja chcychu zamołwići fachowi ministrojo dźensa připołdnju předstajić.

Ličba woporow jasnje wjetša

Berlin (SN/MiR). „Běše to dobra rozmołwa, tež hdyž dyrbjachmy dołho na nju čakać“, rjekny nawodnica Berlinskeho mjeńšinoweho sekretariata Judit Šołćina po prěnim zetkanju mjeńšinoweje rady ze społnomócnjenym zwjazkoweho knježerstwa za naležnosće wusydlencow a narodne mjeńšiny dr. Berndom Fabritiusom. Politikar je zajim za naležnosće mjeńšin pokazał, so jako jich „prawiznik a rěčnik“ wuznał a zdobom zwuraznił, zo ma Němska naležnosće mjeńšin dale chutnje brać. Minjeny pjatk běchu so zastupjerjo štyrjoch awtochtonych narodnych mjeńšin w Berlinje zetkali. Mjez wobdźělnikami běchu serbscy čłonojo mjeńšinoweje rady Bjarnat Cyž, Dawid Statnik a Kito Ela kaž tež sobudźěłaćerce mjeńšinoweho sekretariata Judit Šołćina a Madlenka Kowarjec. Na dźěłowym wuradźowanju w zwjazkowym ministerstwje za nutřkowne, twar a domiznu (BMI) běše jedne ćežišćo, kotrež wobdźělenych Serbow zaběraše, rjadowanje wo změnje swójskeho mjena. Rozmołwa wo zapřijeću „Domizna“ po kotrymž je wotrjad BMI pomjenowany, wuwabi dalšu diskusiju.