To a tamne (18.07.18)
Chcyše so připołdnišej horcoće wuwinyć a je tak kedźbnosć policije zbudźił: 60lětny je minjenu nóc w Eisenachu na twarnišću molerske dźěła wukonjał. Policisća, kotřiž swěcu wuhladachu, tukachu na paducha a sej objekt bliže wobhladachu. Dźěłaćer jim rozłoži, zo bě w třoch dźěłać započał, zo by horcoty dla hižo připołdnju hotowy był. Zastojnicy njemějachu žanu přičinu, na tym dwělować, a dachu molerja dale dźěłać.
Chłostanka wjacorych tysac eurow hrozy runje slubjenemu porikej z Awstriskeje. Wonaj staj w Italskej dospołnje nahaj do Gardaskeho jězora skočiłoj, po tym zo běštaj sej mandźelstwo slubiłoj. Při tym wšak njejstaj dołho za někajkim schowanym městnom pytałoj, ale skočištaj hnydom njedaloko hosćenca do wody. Někotrym pak so to docyła njelubješe, a tak zawołachu policiju.
Söder: Berlin je wina
Mnichow (dpa/SN). Bayerski ministerski prezident Markus Söder (CSU) je sej wěsty, zo leža přičiny za špatnu nahladnosć strony mjez wolerjemi předewšěm na zwjazkowej runinje. Je to „wuslědk Berlinskich rozsudow“, rjekny Söder Mnichowskim nowinarjam. „Tohodla dyrbimy so sylnišo na Bayersku wusměrić.“ Woprašowanja minjenych měsacow su wunjesli, zo je CSU na najlěpšim puću, při wólbach krajneho sejma 14. oktobra tuchwilnu absolutnu wjetšinu w krajnym sejmje přisadźić.
Žonu k jastwu zasudźili
Moskwa (dpa/SN). Sudnistwo w Moskwje je jednu ze štyrjow žonow, kotrež běchu na finalnej hrě swětowych koparskich mišterstwow njedźelu w Moskwje na trawnik běželi, k 15 dnjam jastwa zasudźiło, kaž punkrockowa band Pussy Riot internetnje zdźěla. „Chcych pokazać, kak wšelako so struktury mocy nałožuja“, žona w sudniskim jednanju rjekny. To rozprawja powěsćernja Interfax. Pussy Riot twjerdźi, zo su žony, kotrež běchu na hrajnišću, čłonojo skupiny.
May so přesadźiła
Bywši minister: Kónc brunicy by zahubny był
Magdeburg (dpa/SN). Bywši hospodarski minister Saksko-Anhaltskeje Horst Rehberger je před hospodarskimi sćěhami kónca wudobywanja brunicy warnował. Klimopolitisce by so kónc zmilinjenja lědma wuskutkował, rjekny politikar FDP powěsćerni dpa w Magdeburgu. Potrjechenym kónčinam předewšěm na wuchodźe Němskeje pak hrozy zničenje dźěłowych městnow a tak hospodarska a socialna katastrofa.
Swoje wobmyslenja je Horst Rehberger w lisće předsydam wuhloweje komisije zwjazkoweho knježerstwa formulował. Politikar bě wot lěta 1990 hač do 1993 a wot 2002 hač do 2006 hospodarski minister Saksko-Anhaltskeje. W spisu skedźbnja Rehberger na tójšto planowanych nowotwarow wuhlowych milinarnjow w Aziskej. Jeničce China a Indiska planujetej milinarnjowe kapacity wjace hač 800 gigawattow. Cyłkowna němska kapacita wučinja 21 gigawattow.
Trump wulku rozhorjenosć zbudźił
Helsinki (dpa/SN). Po wjerškowym zetkanju z ruskim prezidentom Wladimirom Putinom ma prezident USA Donald Trump ruce połnej dźěła, zo by kritikarjow w swojej domiznje zaso změrował. Mjeztym zo w Ruskej wustupowanje Trumpa chwala, zběha so w USA žołma rozhorjenosće, samo w rjadach Trumpowych republikanow. Jedyn z jeho najwjetšich podpěraćelow New Gingrich rěčeše wčera wječor wo najchutnišim zmylku prezidenta po přewzaću zastojnstwa před połtřeća lětom. Trump dyrbjał swoje wuprajenja wo tajnej słužbje USA hnydom korigować, sej Gingrich žadaše. Dalši politikarjo wopisowachu zadźerženje Trumpa ze słowami kaž „wohańbjace“, „blamabelne“, „přeradne“, „strašne“ abo „słabe“.
Wladimir Putin bě na nowinarskej konferency kóždežkuli nutřměšenje do wólbneho boja USA prěł. Najwjetšu rozhorjenosć bě Donald Trump zbudźił, jako informacije tajneje słužby USA w tym nastupanju do prašenja staješe. „Dowěrjam tajnej słužbje, dementi prezidenta Putina pak bě jara sylne a mócne.“
AfD chce klětu najsylniša być
Drježdźany (dpa/SN). Sakska AfD chce so k wólbam krajneho sejma 2019 z najsylnišej politiskej mocu w swobodnym staće stać a móhła sej zhromadne knježerstwo z CDU předstajić. Je wažne, zo AfD z jasnym předskokom dobudźe, zo by koaliciske zrěčenje jeje rukopis měło, rjekny stronski předsyda Jörg Urban wčera w Drježdźanach. Stronski a knježerstwowy šef CDU Michael Kretschmer wšak bě koaliciju z AfD wospjet wuzamknył. Při wólbach zwjazkoweho sejma 2017 bě AfD w Sakskej 27 procentow hłosow docpěła, CDU 26,9 proc. Po najnowšim woprašowanju k wólbam krajneho sejma by AfD ze 24 procentami za CDU z 32 proc. druha najsylniša móc była.
Sakscy zapósłancy AfD z krajneho a zwjazkoweho sejma schadźowachu so njedawno w Berlinje, zo bychu swoje postupowanje we woběmaj parlamentomaj lěpje wothłosowali. Wčera předstajichu woni k tomu dźesaćdypkowy program, kotryž tež wólbnobojowe temy wobsahuje. Tak chcedźa mjez druhim rozhłosowy a telewizijny popłatk wotstronić, raznišo přećiwo kriminelnym postupować a mjezy Sakskeje lěpje škitać.
Stawk pola Amazon
To a tamne (17.07.18)
Na třěše cyrkwje wisajo wostał je 16lětny ze swojim płujadłom za płachtakowanje. Wohnjowa wobora dyrbješe jeho wuswobodźić. Młodostny so při misnjenym lěće w Mühlenbachu na noze zrani. Njesćerpny młodostny bě bjez kóždehožkuli nazhonjenja na tym polu při bliskim lěsu na prěni tajki paragliding startował. Po něhdźe 300 metrach pak so jeho płujadło w cyrkwinej třěše zapopadny a tomu zadźěwa, zo 16lětny na zemju padny.
Zamołwiteho za rumowanje kutlow (Pferdeäpfel) pytaja na kupje Hiddensee w Baltiskim morju. Tamniše kurowe zarjadnistwo je wotpowědne dźěłowe městno wupisało. Na kupje je lědma awtow, konjace zapřahi njejsu tuž ničo njewšědneho. Nowy sobudźěłaćer měł nimo přećelneho wustupowanja a techniskeho zrozumjenja zwólniwy być, zo tež kónc tydźenja a swjate dny dźěła.
Krajny biskop w Ruskej
Drježdźany (B/SN). Krajny biskop Carsten Rentzing bě spočatk julija na kołojězbje po Ruskej. Wón přebywaše tam ze swojej sydomwosobowej delegaciju ze Sakskeje a wopyta Ewangelsko-luthersku cyrkej europska Ruska (ELKER) na wšelakich městnach. Na programje stejachu Pětrohród, Moskwa, Orenburg na južnym Uralu a město Ufa. ELKER wobsteji wot lěta 1992 a je ze 170 wosadami a gmejskimi skupinami zjednoćena do jědnaće propstownjow. Tak je wona najsylniša regionalna cyrkej w Zwjazku Ewangelsko-lutherskeje cyrkwje w Ruskej, Ukrainy, Kazachstana a srjedźneje Azije.
Sakscy fararjo wupomhaja
W hladarnjach tarify přesadźić
Berlin (dpa/SN). Zwjazkowe knježerstwo chcyło přesadźić, zo sobudźěłaćerjow starownjow a hladarnjow přichodnje po tarifje płaća a powołanje tak atraktiwniše sčinja. To je minister za strowotnistwo Jens Spahn (CDU) dźensa připowědźił. „80 procentow wšitkich hladarnjow starych njeje na tarif wjazanych, štož chcemy změnić“, rjekny Spahn w rańšim magacinje ZDF. Po jeho měnjenju „dyrbjał hladar 2 500 do 3 000 eurow zasłužić. To měło móžno być.“
Bomba dźesać ludźi moriła
Kabul (dpa/SN). Při sebjemordarskim nadpadźe na ministerstwo w afghaniskej stolicy Kabulu je dźensa znajmjeńša dźesać ludźi žiwjenje přisadźiło. Atentatnik bě so před zachodom ministerstwa za wjesne wuwiće rozbuchnył, jako sobudźěłaćerjo po dźěle twarjenje wopušćichu. Dotal njeje nichtó zamołwitosć přewzał. Hakle 11. junija bě so sebjemordar před samsnym ministerstwom rozbuchnył a 13 ludźi sobu do smjerće storhnył. Tehdy bě so teroristiska milica Islamski stat k njeskutkej wuznała.
Wukubłuja posudźowarjow
