Wostrowc hotuje so na koncert neonacijow a zdobom na měrowy swjedźeń

Zhorjelc (AK/SN). Planowany koncert prawicarjow přichodny kónc tydźenja a runočasnje planowany pisany měrowy swjedźeń wšelakich wobydlerskich a politiskich skupin we Wostrowcu stej Zhorjelskej policajskej direkciji wulke wužadanje. Tole je rěčnik direkcije na wčerawšej nowinarskej konferency w Zhorjelcu hišće raz potwjerdźił. Policija budźe z wjacorymi stotkami zastojnikow ze wšeje Němskeje prezentna, zo njeby k zražkam mjez prawicarjemi a přećiwnymi demonstrantami dóšło. Wočakuja wjace hač tysac wobdźělnikow z prawicarskeje sceny Němskeje kaž z cyłeje ­Čěskeje a Pólskeje. Prawicarjo chcedźa so pjatk zhromadźić, zo móhli sobotu koncert přewjesć. Policija prosy wo zrozumjenje za wobšěrne wěstotne naprawy. Při tym chcedźa zastojnicy tež z woby­dlerjemi do rozmołwy přińć.

Budyšin (CS/SN). Tradicionelne čitanje „Łužiske literarne dopołdnjo“ Němsko-Serbskeho ludoweho dźiwadła je so minjenu sobotu wuwzaćnje jako wječorne zarjadowanje wotměło. Z hosćom rjada bě žurnalist a spisowaćel Hans-Jörg Schmidt. Wot lěta 1990 je wón korespondent wjacorych němskich medijow w Praze – tež za Serbske Nowiny je wottam rozprawjał – a awtor mnohich knihow, kotrež Čěsku wobswětluja.

Nócny spěwar je susodam w badensko-württembergskim Lörrachu dny dołho spar rubił, doniž njeje policija přijěła. Ludźo běchu zastojnikow wołali, dokelž 29lětny stajnje zaso w nócnych hodźinach swoje arije zanošowaše. Policisća na to pola spěwarja klinkachu a jemu do swědomja rěčachu. 29lětny hnydom přilubi, zo swoje nócne spěwanje přichodnje wostaji a dźěše spać.

Žónske koleso z motorom trawusyčawy wudospołnił je 37lětny w mecklenburgskim Groß Teetzlebenje. Policisća jeho zadźeržachu, jako runje nimo smaleše. „Tak je z kolesa motorizowane jězdźidło nastało, za kotrež nima muž ani jězbnu ani wužiwansku dowolnosć“, policija piše. Kolesowarjej dalejězbu zakazachu. Test zastojnikow měrješe spěšnoć 52 km/h. Kreatiwny muž dóstanje nětko skóržbu jězdźenja bjez dowolnosće dla.

Braniborske serbšćinje přichilene komuny w Lubinje mytowane

Lubin (SN/at). Třeće krajne wubědźowanje „Rěči přichilena komuna – serbska rěč je žiwa“ w Braniborskej bě dotal najwuspěšniše. 17 městow a gmejnow kaž tež Bórkowski zarjad – zarjady smědźachu so prěni raz wobdźělić – stej so ze swójskim přinoškom wo myto požadałoj. Štož bě čłonam jury wulke wužadanje, wopokaza so komunalnym zastupjerjam jako překwapjenje: Wšitcy su wu­znamjenjenske zarjadowanje minjeny pjatk w Lubinskim „Domje Bórklin“ z jednym mytom wopušćili.

„Wjacerěčnosć je dar za identitu regiona“, podšmórny wiceprezident Krajneho sejma Braniborskeje Dieter Dombrowski (CDU). „Mnohotnosć 60 regionalnych a mjeńšinowych rěčow po cyłej Europje chcemy za zhromadnosć a wuměnu město jako argument so wotmjezować wužiwać.“ Najebać to, zo je pěstowanje serbskeje rěče a kultury politiski nadawk a w krajnej wustawje zakótwjene, bjez serbsce wuknjacych, rěčacych a wučacych kaž tež swoju kultury hajacych ludźi by politika bjezmócna była, rjekny Dieter Dombrowski, kotryž bě myta přepodał.