To a tamne (09.05.18)
Koči hajzl z bydlenja pokradnyła je žona w sewjerorynsko-westfalskim Hückeswagenje. Při přesłyšowanju policije wona přizna, zo bě so namócnje do bydlenja zadobyła, dokelž chcyše za durjemi žałosćacej kóčce pomhać. Mějićel bydlenja drje něšto pozdźišo čiłu a strowu kóčku namaka, koči hajzl pak bě preč. „Što ludźi do kriminality ćěri, wostawa druhdy wulke potajnstwo“, policija piše.
Młodźi policisća w Posaarskej njetrjebaja za najlěpšu znamku w sporće hižo spěšniši być hač sprintar Usain Bolt. Wotpowědne směrnicy su nětko změnili, kaž krajne knježerstzwo zdźěla. Dotal bě plan předpisał, zo maja 30 metrow w 3,49 sekundach běžeć. Bolt wšak bě při swětowym rekordźe 2009 na sto metrow za prěnje 30 metrow 3,79 sek. trjebał.
Ludźo w Ruskej přesłapjeni němskeje politika dla
Cyril Pjech z Berlina je w ruskim Krasnodarje wo Serbach přednošował a rozprawja wo swojich dožiwjenjach:
W jednej sekciji Němsko-ruskeje konferency městow-partnerow w južnoruskim měsće Krasnodar běch loni wo zwiskach mjez Ruskej a Serbami přednošował. To je nawodnicu fakulty němskeje rěče na Kubańskej uniwersiće pohnuło mje přeprosyć na seminary a čitanje, zo bychu jeje studenća, kotřiž intensiwnje němčinu wuknu a so wo Němskej informuja, wědźeli, zo bydla w Němskej tež Serbja. Tohodla přebywach wot 15. do 22. apryla w ruskim wulkoměsće, kotrež ma wjac hač milion wobydlerjow.
Namołwjatej Trumpa Irana dla
Berlin (dpa/SN). Němska a Francoska namołwjatej prezidenta USA Donalda Trumpa, atomowe zrěčenje z Iranom dodźeržeć. „Starosćimy zo, zo móhło zwrěšćenje k nowej eskalaciji wjesć, kotraž nas do doby do lěta 2013 wróćo ćisnje“, rjekny zwjazkowy wonkowny minister Heiko Maas (SPD) wčera na zetkanju ze swojim francoskim kolegu Jeanom-Yvesom Le Drianom. Najebać rozsud Trumpa chcetej so Němska a Francoska dale po zrěčenju z Iranom měć. Trump chcyše dźensa wozjewić, hač zrěčenje dodźerži abo nic.
Nowowólby w Italskej
Rom (dpa/SN). Dwaj měsacaj po wólbach je italski statny prezident Sergio Mattarella oficialnje zdźělił, zo su jednanja zwrěšćili, wutworić nowe knježerstwo. Nětko měło „neutralne knježerstwo“ kraj k nowowólbam wjesć, rjekny Mattarella wčera po rozmołwach z politiskimi mocami w Romje. Te běchu jemu zdźělili, zo njejsu k mjezsobnej koaliciji zwólniwe. Po wólbach 4. měrca so strony wadźa, štó měł Italsku nawjedować, a politiske bloki sej njepřećelsce napřećo steja. Žadyn z nich pak nima wjetšinu.
Wujednawanje zwrěšćiło
Na předwječoru dźensnišeho dnja wuswobodźenja wot ...
Po znjezboženju ćaha železnicarja zajeli
Aichach (dpa/SN). Po ćežkim znjezboženju ćaha w bayerskim Aichachu je policije dźensa železnicarja zajała, kiž měješe wčera wječor słužbu we wuhibkarni. Po prěnich přepytowanjach je čłowjeske zaprajenje njezbožo z dwěmaj mortwymaj zawinowało. Wosobowy ćah bě wčera wječor do stejaceho nakładneho ćaha zrazył. Lokomotiwnik wosoboweho ćaha a sobujěduca staj zemrěłoj. Štyrnaće zranjenych dowjezechu do chorownje. Železniska čara mjez Ingolstadtom a Augsburgom bu zawrjena.
Bě to druhe železniske njezbožo wčera w Bayerskej. W Seeshaupće nad Starnbergskim jězorom je ćah na železniskim přechodźe do wosoboweho awta zrazył. Tež tu dwě wosobje zemrěštej.
Pjenjezy za twar swójskeho domu
To a tamne (08.05.18)
Katolske žony jako duchowne přeje sej generalna sekretarka CDU Annegret Kramp-Karrenbauer. Bjezposrědnje do jutře zahajaceho so zjězda katolikow w Münsteru wona w rozmołwje z přiłohu nowiny Zeit „Christ und Welt“ rjekny: „Přeju sej měšnisku swjećiznu za žony.“ Hižo nětko su wone wažny wobstatk wšědneho dźěła w cyrkwi. To měło so tež w zastojnstwach wotbłyšćować.
Grilowansku party ze 150 ludźimi a dwanaće nad wohenjom pječenymi wowcami je Berlinska policija w Friedrichshainskim ludowym parku rozpušćiła. Žehliwe wuhlo ležeše prosće na łuce. Dokelž knježeše strach zapalenja, alarmowachu wohnjowu woboru. Wobdźělnicy party běchu kooperatiwni a swoje wěcy zrumowachu. Přiwšěm hrozy jim chłostanka města hač do 5 000 eurow.
Wjace wučby nabožiny
Berlin (B/SN). Ewangelska cyrkej Berlin-Braniborska-šleska Hornja Łužica zasadźuje so za wjace hodźin nabožinskeje wučby. Wona namołwja krajnu cyrkej w Berlinje, Braniborskej a Sakskej, „spěchować židowsku, křesćansku a muslimsku nabožinu, zo by so dialog w šuli na tutu temu zawjedł a dale pěstował“.
Towaršnosć LEO w kritice
Magdeburg (B/SN). W zwisku ze znowa w kritice stejacym towarstwom za žiwjensku orientaciju (LEO) w SakskoAnhaltskej wujasnja Ewangelska cyrkej Srjedźoněmskeje (EKM), zo njejedna so na posedźenjach wo poskitk cyrkwinskeho razu. Towarstwo steji w kritice, dokelž poskićuje seminary k wuhojenju homoseksualnych, zdźěli Zwjazk lesbow a homoseksualnych (LSVD) Saksko-Anhaltskeje. Před štyrjomi lětami su zwjazkej LEO nastajenja k homoseksualiće dla zjawne spěchowanje šmórnyli. Předsyda LEO, farar Bernhard Ritter, bě wuspěšnje přećiwo tomu skoržił, tak zo je LEO nětko zaso jako swobodny nošer Pomocy dźěćom a młodostnym we wokrjesu Mansfeld-Južny Harz připóznaty.
EU chce deeskalaciju
Sakska za Tilicha so wuprajiła
Drježdźany (SN). Sakska je so za to wuprajiła, zo předsyduje bywši ministerski prezident Stanisław Tilich (CDU) planowanej komisiji, kotraž ma w Zwjazku wo kóncu wudobywanja wuhla rozsudźić. Po słowach knježerstwoweho rěčnika Ralpha Schreibera je Tilich „prawy prawiznik“ za Saksku w naležnosći, wón ma mnohe nazhonjenja a tójšto wědy, kaž dpa minjeny pjatk rozprawješe.
Po słowach Lěwicy w Sakskim krajnym sejmje je Tilich wopačny muž za tule komisiju. Klimopolitiski rěčnik frakcije Marco Böhme ma bywšeho knježerstwoweho šefa za wuprajeneho přećiwnika nastupajo kónc wudobywanja wuhla.
Wotewrjene je, hač koaliciski partner SPD Tilicha jako kopředsydu komisije akceptuje. Tajka móhła hač do třoch předsydow měć. Komisija „rozrost, strukturna změna a dźěło“ ma bórze dźěłać započeć a hišće lětsa datum za kónc wuhloweje miliny w Němskej mjenować. Njerozrisane dale je, štó dokładnje w gremiju sobu dźěła a hač budźe opozicija w zwjazkowym sejmje zastupjena. Tež wobydlerske iniciatiwy z potrjechenych kónčin žadaja sej městna.
Klawsura na horje
Zugspitze (dpa/SN). Čoła frakcijow unije a SPD su so dźensa na najwyšu horu Němskeje Zugspitze podali, zo bychu tam rozjimali, kak chcedźa wažne předewzaća koaliciskeho zrěčenja zwoprawdźić. Volker Kauder (CDU), Andrea Nahles (SPD) a předsyda skupiny CSU Alexander Dobrindt rěčachu mjez druhim wo nuznje trěbnych nowych bydlenjach a wo naprawach přećiwo spochi přiběracym podružam w městach.
Israel hrozy Iranej
Tel Aviv (dpa/SN). Israelski ministerski prezident Benjamin Netanjahu je Iran wojerskeje prezency w Syriskej dla raznje kritizował. „Nochcemy z Iranom konfrontaciju. Dyrbjało-li pak k tomu dóńć, da radšo nětko hač pozdźišo“, rjekny 68lětny na posedźenju kabineta. Kraj je rozsudźeny, „iransku agresiju přećiwo Israelej“ wotwobarać. W Tel Avivje su sej wěsći, zo spyta Iran w Syriskej nowu frontu přećiwo Israelej wutworić.
Wolij tak drohi kaž lěta 2014
