Iniciatiwa: Demokratija rozpaduje
Berlin (dpa/SN). Wólbne dobyće europsko-kritiskich stron při wólbach parlamenta w Italskej je proeuropskej wobydlerskej iniciatiwje Pulse of Europe jasne znamjo wosłabjeneje demokratije. „Trend dale dźe, zo ludźo etablěrowanym stronam dale a mjenje dowěrjeja“, rjekny załožer iniciatiwy Daniel Röder nowinarjam. Nakromne strony a protestne hibanja pak su dźeń a sylniše. „To su z mojeho wida jasne pokazki na rozpadowacu demokratiju, štož w mnohich krajach dožiwjamy.“
Při wólbach parlamenta je protestne hibanje „Pjeć hwězdow“ z 32 procentami jako najsylniša jednotliwa strona wušło. Zwjazk prawicarskich stron nažnja dohromady 37 procentow hłosow.
Póstniski wóz w Europje po puću
Düsseldorf (dpa/SN). Štož je so něhdy jako kołwrótna myslička započało, je mjeztym přewšo wuspěšna akcija: Póstniski wóz twarca Jacquesa Tillyja „Žrački demokratije“ z lońšeho póstniskeho ćaha róžowu póndźelu w Düsseldorfje je po wjace hač dwanaće měsacach přeco hišće na turneji. „Wóz bě mjeztym w mnohich pólskich městach. Sym wjace hač 30 přinoškow w pólskich nowinach wo nim namakał“, rjekny Tilly powěsćerni dpa w Düsseldorfje. Tillyjowe motiwowe wozy ze šćipatej politiskej satiru zbudźeja hižo wjele lět po wšěm swěće kedźbnosć.
Wozy z papjercowymi motiwami poprawom dźeń po póstnicach zaso wottwarjeja. Z wozom „Žrački demokratije“ bě to hinak. Wobydlerska iniciatiwa bě sej jón wuprosyła a na turneju po wuchodnej Europje pósłała. Na nim so tučne husańcy z mjenami kaž „Putin“, „Orbán“, „Kaczyński“, „Erdoğan“ a wězo njeparujomny „Trump“ přez zelene łopjeno „demokratije“ přežeru.
Wóz bě hižo w Čěskej wulku kedźbnosć zbudźił a warnuje nětko w Pólskej před strachami, kotrež tam demokratiji hroža.
To a tamne (06.03.18)
W kamorje schowany lubkar je w Bremerhavenje dwójne zasadźenje policije zawinił. 38lětna žona bě jeho kónc tydźenja sobu domoj wzała. Jako njedźelu rano jeje žiwjenski partner přińdźe, so wona do njeho da, zo njeby lubkowarja w kamorje wuhladał. Zwada so tak přiwótři, zo dyrbjachu susodźa policiju wołać. Zastojnicy chětro agresiwny porik zajachu. Krótko na to tam policiju znowa wołachu: Njeznaći běchu so do bydlenja zadobyli, zo bychu lubkarja wuswobodźili, kiž njemóžeše ze zamknjeneho bydlenja.
Nakusana makowa całta je dopokazała, zo bě paduch w Kielu handy sobudźěłaćerki pjekarnje pokradnył. Mobilny telefon bě so tam srjedź nowembra z dźěłarnje zhubił. Jako paduch znowa do pjekarnje přińdźe, zawoła žona policiju. Ta móžeše z pomocu DNA dopokazać, zo bě pakostnik w zadnjej rumnosći był, hdźež wot njeho nakusana całta ležeše.
Žana jasna wjetšina
Rom (dpa/SN). Europje napřećo kritisce nastajene protestne hibanje „Pjeć hwězdow“ wobhladuje so jako dobyćer wólbow italskeho parlamenta. „Nětko dyrbja wšitcy z nami rěčeć“, rjekny Alessandro Di Battista, jedyn z najznaćišich zastupnikow hibanja, w Romje. Po prěnim wuličenju dósta wone 33,6 procentow hłosow, štož přiwšěm za wjetšinu w parlamenće njedosaha. To samsne płaći za zwjazk prawicarskich stron, kotryž dósta 36,5 proc. Wobkedźbowarjo liča tuž z wobćežnymi koaliciskimi jednanjemi.
Přećiwo šmórnjenju popłatka
Bern (dpa/SN). Njewočakowano jasnje su so wobydlerjo Šwicarskeje přećiwo wotstronjenju rozhłosoweho popłatka wuprajili. 71,6 procentow ludźi je wčera wotpowědne žadanje iniciatiwy wotpokazało a tak zjawnoprawniske sćelaki zachowało, kotrež tež programy mjeńšin wusyłaja. Sakski ministerski prezident Michael Kretschmer (CDU) wuslědk wita a zamołwitych zdobom namołwja, kwalitu programow zaručić. W Němskej je něhdźe 55 procentow za to, zjawnoprawniske sćelaki zachować.
Wjace wojakow do Afghanistana
W Berlinje a Braniborskej je dźensa rano zalodźenych jězdnjow dla k ...
Komunalna politika w srjedźišću
Połčnica (SN/at). Komunalna politika jako žro stronskeho skutkowanja bě ćežišćo Budyskeho wokrjesneho zjězda Lěwicy sobotu w Połčnicy. Z widom na komunalne wólby 2019 rysowaše wokrjesna předsydka, zapósłanča Sakskeho krajneho sejma a Kamjenska měšćanska radźićelka Marion Junge, naroki sakskeje Lěwicy za tele polo politiki. Wona wabješe za to, z lěwicarskej komunalnej politiku swójske žiwjenske wuměnjenja wobwliwować. W kotrym rozměrje so tajka w komunach serbskeho sydlenskeho ruma z dodźerženjom płaćiwych zakonjow na dobro zachowanja a wuwiwanja serbskeje rěče a kultury dótka, to wosta rěčnica dołžna. Wuwjedźenja předsydki wopokazachu so jako zasadneho razu, bjez toho zo bě tón abo tamny aspekt na wosebitosće Budyskeho wokrjesa sprecizowany.
Steinmeier namjetuje Merkel
Berlin (dpa/SN). Zwjazkowy prezident Frank-Walter Steinmeier je dźensa zwjazkowemu sejmej w lisće namjetował, předsydku CDU Angelu Merkel znowa za zwjazkowu kanclerku wuzwolić. Steinmeier reagowaše tak na wčera wozjewjeny wuslědk wothłosowanja čłonow SPD wo nowej wulkej koaliciji strony z CDU a CSU. Wuzwolenje Merkel za kanclerku a jeje spřisahanje w zwjazkowym sejmje planuja za 14. měrc. Při čłonskim wothłosowanju SPD bě so dobre 66 procentow za wulku koaliciju wuprajiło.
W Berlinje schadźuje so dźensa předsydstwo bayerskeje CSU, zo by wo wobsadźenju ministerskich zastojnstwow wuradźowało. Tam wočakowachu tež zwjazkowu kanclerku Angelu Merkel. Dotal je jenož jasne, zo stanje so stronski předsyda Horst Seehofer z nowym ministrom za nutřkowne naležnosće.
Socialdemokraća chcedźa přichodne dny wo swojich ministrach w nowym kabineće wuradźować, kaž komisariski stronski předsyda Olaf Scholz připowědźi. Dotalny Hamburgski wyši měšćanosta budźe financny minister. SPD přewozmje cyłkownje šěsć ministerstwow.
Tójšto zhromadnych projektow
Ministerski prezident Michael Kretschmer chwali saksko-pólske styki
Wrócław (dpa/SN). Sakski ministerski prezident Michael Kretschmer (CDU) je mjeztym „cyle samozrozumliwe“ dobre poćahi ze susodnym pólskim regionom Delnja Šleska chwalił. Wuspěchi při hospodarskich a infrastrukturnych projektach kaž tež na polu kultury a slědźenja běchu stajnje zaso „móžne přez regionalnu zamołwitosć“, podšmórny sakski premier minjeny štwórtk na swojim prěnim wopyće Pólskeje we Wrócławju. „Dokelž móžachmy sami jednać a njetrjebachmy na centralny stat čakać“, je so poradźiło tójšto mjezu přesahowacych projektow zwoprawdźić, wón rjekny. Tohodla chcył so wón tež pola Europskeje unije za to zasadźeć, zo spěchowanje projektow tež w přichodźe decentralnje organizuja, „zo móžemy my jako region sami rozsudźić, kotre projekty su nam wažne“, Michael Kretschmer na nowinarskej konferency zwurazni.
Hórki puć hrozy
To a tamne (05.03.18)
Pjenjezy w hódnoće 30 000 eurow su bjez swojeho wobsedźerja w Mnichowje z ćahom po puću byli. Muž bě po puću na wiki twjerdych pjenjez ćah wopušćił, drohotny wačok pak jědźeše dale hač na kónčnu staciju. Tam je železnicarka toboły połne pjenjez wuhladała a woteda je na Mnichowskim hłownym dwórnišću. Tam móžeše sej je zběrar pjenjez hišće w prawym času do zahajenja wikow wolóženy wotewzać.
Psycu z liščeje jamy wuswobodźiła je wohnjowa wobora w sewjerorynsko-westfalskim Mühlheimje. Foxterrier „Hope“ bě so při přechodźowanju z wobsedźerku w lěsu njejapcy zminył, po tym zo drje bě něšto wučušlił. Kameradojo trjebachu nimale pjeć hodźin, zo bychu zmjerznjenu zemju wokoło liščeje jamy wotstronili a žałosćacu 16lětnu psycu wobsedźerce skónčnje přepodać móhli.
