Wittenberg (B/SN). Bamž Franciskus je za ewangelskeho teologu a něhdyšeho wojowarja za čłowjeske prawa w NDR Friedricha Schorlemmera „woprawdźity křesćan“. W interviewje nowiny Zeit wu­zna Wittenbergski farar: „Někotři mje kritizuja, zo sym pjany za bamžom. Ja praju: Ně, ja so horju za bamža!“ Franciskus wukonja swoje zastojnstwo bjez nadutosće. „Tohodla respektuju bamža jako swojeho ,Romskeho biskopa‘.“ Bamž njeskutkuje jeno w zastojnstwje – wón je tež čłowjek a móže so tuž tež mylić. „My křesćenjo mamy zrozumić, zo njejsmy wěrnosć ze łžicami jědli.“

Zhromadnje wustupować

Lipsk (B/SN). W globalnych prašenjach měli cyrkwje po měnjenju Erfurtskeho starobiskopa Joachima Wanki doraznišo zhromadnje wustupować. „Ekologiske prašenja a prašenja za sprawnosću a měrom su za nas wšěch palace – to móhło nam wšěm tyć“, rjekny Wanke na Dnju katolikow w Lipsku. Wěste hospodarske modele njehodźa pak so křesćansce wujasnić. „Stary socializm je na ludźoch zaprajił – snano móhł so wón ze swjatymi zdokonjeć, ale nic z ludźimi herbskeho hrěcha, kaž my wšitcy smy.“

Lipsk za kadźidłom wonjał

London (dpa/K/SN). Amnesty International libyskej přibrjóžnej straži wumjetuje, zo nałožuje přećiwo ćěkancam samowólnje namóc. Tak rozprawjachu mnozy z nich, kiž běchu so do Siciliskeje wuchowali, zo bu na nich třělane. Na morju popadnjeni buchu tež bići a do jastwow tyknjeni. Raz je přibrjóžna straža nurjacy so čołm z 120 ludźimi prosće ignorowała.

Gauck za stajny dialog

Berlin (dpa/SN). Najebać rozdźělne pozicije w němsko-pólskich poćahach so zwjazkowy prezident Joachim Gauck za intensiwnu a zažnu wuměnu měnjenjow mjez Berlinom a Waršawu zasadźuje. „Byrnjež starosće susodow nje­zrozumili, dyrbimy jich měnjenje wobkedźbować a stajnje w dialogu z nimi wostać“, rjekny Gauck składnostnje 25. róčnicy němsko-pólskeho zrěčenja wo dobrym susodstwje nowinarjam pólskeho časopisa Polityka. Při wšěch diferencach njeměło so pozabyć, što je so minjene štwórć lětstotka docpěło.

Altmaier připowědźa rozmołwy

Wo brunych wodźiznach so na městnje informowali

Wjelcej (SN/BŠe). Škitarjo přirody wumjetuja šwedskemu předewzaću Vattenfall, zo sfalšuje měrjenske hódnoty wodźiznow we łužiskim brunicowym re­wěrje wokoło Wjelceje. Tole běchu tež rešerše magacina Klartext sćelaka rbb wobkrućili. Wčera běchu sej zapósłanc Braniborskeho krajneho sejma Benjamin Raschke (Zeleni), předsydka wobswětoweho wuběrka Wjelcejskeho měšćanskeho zhromadźenstwa Hannelore Wodtke kaž tež jednaćel Wobswětoweho zwjazka Braniborska (BUND) Axel Kruschat poměry na městnje wobhladali. „Woda wokoło Wjelcejskeje brunicoweje jamy je přeco hišća bruna, byrnjež loni při­prawu k čisćenju wody brunicowych jamow zarjadowali“, wujasni Benjamin Raschke­. Předsydka wobswětoweho wuběrka měnješe, zo bě woda před dźesać lětami hišće jasna. Vattenfall pak bě zašłe lěta započał wodu z wuhloweje jamy přez wodźizny wotwodźować, tak zo je woda nětko masiwnje zanjerodźena.

Njebjelčicy (SN). Iniciatiwna skupina za serbske­ ludowe zastupnistwo – Serbski sejm chce so na zakonskim zakładźe spěšnišo swojemu zaměrej zbližić: wu­tworić Serbski sejm. Kaž informuje rěčnik iniciatiwy Alfons Wićaz w nowinskej zdźělence, je cyłk na swojej sobotnej klawsurje w Njebjelčicach, na kotrejž so tež zapósłanc Sakskeho krajneho sejma Hajko Kozel (Lěwica) a předsyda Drježdźanskeho towarstwa „Stup dale“ dr. Andreas Kluge wobdźělištaj, wobzamknył, hač do lěća 2017 załožić předparlament. Žane dołhe powědanje hižo a čakanje na politiske­ rozsudy, běše měnjenje přitomnych.