Waršawa (dpa/SN). Pólski wonkowny minister Witold Waszczykowski sej žada, zo měła so móc w Europskej uniji ze stron komisije EU statnym a knježerstwowym šefam jednotliwych čłonskich krajow přewostajić. „Dźěl wjednistwa EU dyrbjał wotstupić“, rjekny Waszczykowski wčera po zetkanju ze šefdiplomatami dźewjeć krajow we Waršawje. Zdobom sej wón žadaše, zo měło so nowe zrěčenje EU zdźěłać. Kaž pólska ministerska prezidentka Beata Szydło w tym zwisku namjetowaše, měli zastupnicy komisije politisku zamołwitosć za wuslědk referenduma Wulkeje Britaniskeje za wustup z Europskeje unije přewzać. EU dyrbjała so tak přetwarić, „zo bychu Europjenjo składnosć měli, sami wo swojich naležnosćach rozsudźić móc“.

Tež nawoda narodnokonserwatiwneje strony Prawo a sprawnosć Jarosław Ka­czyński je za wosobinske konsekwency. Z Pólskeje pochadźacy předsyda Rady EU Donald Tusk je po jeho słowach za brexit wosobinsce zamołwity a dyrbjał so „z europskeje politiki zminyć“.

Dieselowu lokomotiwu pokradnyć spytał je 21lětny w Halle nad Solawu. Tam bě so wón do porjedźernje lokomotiwow na ležownosći Němskeje železnicy za­dobył, hdźež chcyše ćežke jězdźidło startować. Sobudźěłaćer železnicy jeho lepi a zawoła policiju. Kaž muž zastojnikam wuzna, chcyše wón lokomotiwu měć, zo by z njej jězdźić móhł. Při tym njesteješe ani pod wliwom alkohola ani drogow. Nětko wšak dyrbi ze skóržbu ličić.

Nachribjetnik z 30 000 eurami je 61lětny w ćahu zabył. Muž bě po puću z Frankfurtskeho lětanišća do Wiesbadena. Po tym zo bě wón ćah na hłownym dwórnišću we Wiesbadenje wopušćił, jemu po někotrych mjeńšinach napadny, zo nima nachribjetnik při sebi. Jako so do ćaha nawróći, pak bě tón hižo fuk. Podarmo muž za nim pytaše. Za čo telko pjenjez trjebaše, nichtó njewě.