Změna klimy wohroža parki
Berlin (dpa/SN). Rostliny w historiskich parkach Berlina a Braniborskeje přiběraceje ćopłoty a suchoty dla ćerpja. Zo móhli zahrodowe kompleksy na změnu klimy lěpje reagować, zahajichu dźensa nowy slědźenski projekt. Wědomostnicy chcedźa přichodne tři lěta změny analyzować a wšelake pospyty z rostlinami přewjesć, zo hodźeli so parki zachować, kaž krajny architekt Berlinskeje techniskeje uniwersity prof. Norbert Kühn powěsćerni dpa rjekny.
Do projekta zapřijate su objekty Załožby pruskich hrodow a zahrodow: hród Sanssouci w Podstupimje, Berlinski hród Charlottenburg kaž tež zahrody w Podstupimje-Babelsbergu a Rheinsbergu. Tam maja wot nalěća 2016 płoniny nastać, na kotrychž móža wopytowarjo dźěła přewodźeć. Wuchadźišćo běchu přiběrace ćeže w Podstupimje, park zachować. Wosebje na štomach su škody wočiwidne. Častodosć so hižo njeradźi, nowe štomy sadźeć. Potrjechene su předewšěm stare domjace družiny kaž buki, duby a lipy, zamołwići zdźěleja.
To a tamne (17.07.15)
Swojimaj wočomaj wěrić nochcyše wodźer nakładneho awta na awtodróze pola Berlina, jako přesćahny swoje priwatne awto, prawdźepodobnje z paduchom za wodźidłom. Šofer alarmowaše policiju, kotraž móžeše awto krótko za namjeznym přechodom w Frankfurće nad Wódru zadźeržeć. 26lětny paduch dyrbi nětko ze skóržbu ličić.
Za zymsku słužbu zwučuje Essenski měšćanski zawod tele dny na wulkim zwučowanišću ze sněhowymi płuhami. Při tym maja so sobudźěłaćerjo na přewšo kompleksnych mašinach wukubłać: Šofer sedźi naprawo a wodźi płuh z małym joystickom. Nimo toho ma awtomatisku připrawu za selenje dohladować. Prěni dźeń wuknjechu na slalomowej čarje jězdźić. W Essenje chcedźa tak 150 šoferow za hotowostnu zymsku słužbu kubłać.
Łužica (17.07.15)
Přepodawaja jězory komunam
Podstupim/Schipkau (dpa/SN/ch). Dźeń a wjace jězorow w Braniborskej je nětko w komunalnych rukach. Ze 128 wodźiznow je kraj dotal 49 přepodał, zdźěli wčera financne ministerstwo w Podstupimje. Samsny dźeń přewostaji financny minister Christian Görke (Lěwica) gmejnje Schipkau (wokrjes Hornje Błóta-Łužica) jězor bywšeje Hanineje hětownje. Kraj chce tomu zadźěwać, zo braniborske wodźizny do priwatnych rukow přeńdu, a je so tuž ze Zwjazkom dojednał, přewzać 128 jězorow w hódnoće cyłkownje 6,35 milionow eurow. Wjetšinu wodźiznow komunam a wokrjesam darmotnje poskićeja. Za 60 z nich wuměnjenja za přepodaće komunam dotal hišće njepředleža.
Žane dojednanje
W Karlovarskej likerowni Jan Becher produkuja wot najnowšeho sławnu ...
Obama a Putin telefonowałoj
Lutowanjam přihłosowali
Tsipras podpěru opozicije trjebał – Schäuble dale za „grexit“
Athen (dpa/SN/K). Z tym zo je grjekski parlament dźensa narano reformam a lutowanjam přihłosował, žadanym wot mjezynarodnych pjenjezydawarjow, je wažny zadźěwk za jednanja wo třećim pomocnym pakeće z puća. Po hodźiny trajacej diskusiji wupraji so 229 zapósłancow z 300 za to, prěnje naprawy zwoprawdźić. 64 zapósłancow bě přećiwo tomu, tamni so hłosa wzdachu.
Ministerski prezident Alexis Tsipras bě při tutej z wulkej napjatosću wočakowanej procedurje pokazany na podpěru opozicije. 32 zapósłancow jeho lěwicoweje Syrizy hłosowaše po wotpowědnym připowědźenju přećiwo paketej zakonjow. Do toho wšak bě Tsipras hrozył, zo wotstupi, jeli so tole stanje. Po wothłosowanju so wón najprjedy jónu njewupraji. Je wočakować, zo premier dźensa swoje knježerstwo přetwori. W parlamenće Tsipras rjekny, zo bu wón wot wěrićelow wudrěwany, program lutowanja akceptować.
