Aachen (B/SN). Bamž Franciskus swojej cyrkwi do swědomja rěči, ale tež Europje a swětej. Za to dósta wón njedawno Karlowe myto. Štó to hižo móže? Swětej do swědomja rěčeć, porokować, warnować runje tak kaž zmužitosć dawać? Awtorita Franciskusa ma swój zakład we wosobinskej ponižnosći. K tomu přińdźe jeho zmužitosć, wěcy direktnje a jasnje mjenować. Tež jeho gesty maja w přiběracym medialnym času wulki wuznam. A Franciskus tole wobknježi: hłuboki pokłon při modlitwje, myće nohow jatym w romskim jastwje, wobjimanje zbrašeneho muža na Pětrowym naměsće, prěnje pućowanje k ćěkancam na kupje Lampedusa. Před Běły dom we Washingtonje je wón z małym awtom přijěł, z kupy Lesbos je ćěkancow sobu domoj wzał atd. Mjez njewěriwymi je wón runje tak woblubowany kaž mjez wěriwymi.

Film wo swjatym Benje

Z wunamakanej zběrku na dobro noweho kumštneho trawnika na sportnišću sewjerorynsko-westfalskeho Warsteina staj młodostnaj w starobje 13 a 15 lět spytałoj, kapsny pjenjez wuzbytkować. Jedyn z darićelow wšak so w sportowym towarstwje akcije dla naprašowaše, hdźež ničo wo njej njewědźachu. Jako muž młodostneju znowa při zběranju pjenjez lepi, jeju zadźerža a zawoła policiju. Staršemu hrozy nětko skóržba jebanstwa dla.

Z drogowym testom pola policije je 22lětny swojej přećelce w Kölnje dopokazać chcył, zo drogi njebjerje. Jědźeštaj tuž njedźelu na policajsku stražu w Sankt Augustinje, hdźež jemu přeće za testom spjelnichu: Tón pak wujewi, zo bě kokain brał, štož dyrbješe skónčnje při­znać. Dokelž bě pod wliwom drogow z awtom jěł, hrozy jemu nětko sudniske jednanje.

Berlin (dpa/SN). Zwjazkowa kanclerka Angela Merkel (CDU) wuprajenje městopředsydy strony AfD Alexandera Gaulanda hladajo na narodneho koparja Jérôma Boatenga raznje zasudźa. „To je šamała a zrudźaca sada“, komentowaše knježerstwowy rěčnik Steffen Seibert dźensa w Ber­linje wuprajenje Gaulanda we wudaću Frankfurter Allgemeine Sonntagszeitung. Gaulanda tam ze słowami cituja: „Ludźo sej Boatenga waža, dokelž derje kopańcu hraje, ale za susoda měć jeho nochcedźa.“ Wuprajenje bě po wšěm kraju­ rozhorjenje a protest zbudźiło.

Kritizuja planowanu rezoluciju

Istanbul (dpa/SN). Turkowske knježerstwo je planowanu rezoluciju Němskeho zwjazkoweho sejma k masakram Osmanow na Armenjanach w lěće 1915 kritizowało. „Njeje nadawk parlamenta, te­hdyše podawki wuswětlić. To je nadawk stawiznarjow“, rjekny dźensa wicepremier a rěčnik knježerstwa Numan Kurtulmuş. Zwjaz­kowy sejm chce štwórtk rezoluciju­ schwalić, z kotrejž zastopnjuje morjenje Armenjanow jako „ludomordarstwo“.

Nowe lěhwa nastali

Paris (dpa/K/SN). Na wopominanje 100. róčnicy mordarskeje Verdunskeje bitwy njejsu wčera jenož na 300 000 padnjenych na francoskej a němskej stronje spominali, zdobom skedźbnjachu na njedobre wuwića w přitomnosći. Francoski prezident François Hollande warnowaše před strachami za Europsku uniju. „Mocy šćěpjenja a zawěranja zaso dźěłaja“, wón zwurazni. Kanclerka Angela Merkel, kotraž wobdźěli so prěni raz na tajkim zarjadowanju, rjekny: „Verdun njesymbolizuje jenož hrózbu a njezmysł wójny, zdobom je wón znamjo žedźby za měrom, symbol přewinjenja njepřećelstwa a němsko-francoskeho wujednanja. Naležnje warnowaše wona před nacionalno-statnym zmyslenjom a jednanjom w Europje.