Berlin (SN/at). Nastupajo projektowe spěchowanje je rada Załožby za serbski lud na swojim wuradźowanju wčera w Berlinje wutworjenje fachoweje přirady rozjimała. Gremij je namjet k tomu schwalił. „Mamy jeje kompetency definować, koncept zdźěłać a wo zestawje rozmyslować“, rjekny předsyda załožboweje rady Jan Budar našej nowinje. Postupowanje je konkluzija z pruwowanja Sakskeho zličbowanskeho zarjada wo hospodarjenju Załožby za serbski lud w lětach 2010 do 2012.

Čestnohamtskemu předsydźe załožboweje rady płaća přichodnje 300 eurow posedźenskeho pjenjeza. Tež to gremij wčera wobzamkny. Z tym reaguja na widźomnje wjetši nawal dźěła předsydy w přihotach na posedźenja rady, kotryž w swojim wólnym času wukonja. Čestnohamtscy čłonojo załožboweje rady dóstawaju 50 eurow posedźenskeho pjenjeza, štož je dotal za předsydu sobu płaćiło.

Runja projektowym manageram serbskich towarstwow spěchuje załožba po wobzamknjenju rady lětsa prěni raz centralne městno „Kulturny management delnjoserbskeje kultury“ w Choćebuzu.

Na swoje 6 000. pokročowanje měri so wuspěšna serija sćelaka RTL „Gute Zeiten, schlechte Zeiten“ (GZSZ). Po informacijach sćelaka budźe jubilejne wusyłanje 18. meje tak dołhe kaž hrajny film. Tola tež druhe wusyłanja RTL maja tón dźeń w znamjenju serije stać. Tak chcedźa mjez druhim dokumentaciju z Podstupimsko-Babelsbergskeho studija pokazać, hdźež filmy produkuja. GZSZ wusyłaja mjeztym nimale 24 lět. Je to najstarša wšědnje pokazowana serija Němskeje.

Pawk w awće je w Zwickauwje wobchadne njezbožo zawinił. 24lětna šoferka chcyše wčera za čas jězby zwěrjatko z wodźidła awta wotsunyć. Při tym přewidźa před njej stejace awto před amplu, policija zdźěli. Při chětro sylnej zražce so 24lětna kaž tež w tamnym awće sedźaca 49lětna zraništej. Cyłkownu škodu trochuje policija na 14 000 eurow.