Waršawa (dpa/K/SN). Jako „hlebja“ wu­tworjena specialna jednotka NATO zwučuje z wjac hač 1 500 wojakami w Pólskej chutny pad. Dźesać dnjow trajacy manewer „Brilliant jump 2016“ (Wusahowacy skok) přewjeduja na zapadźe kraja. Akcija ma dopokazać, zo hodźi so superspěšna zasahowanska jednotka po kraju a morju kaž tež z powětra w běhu jenož někotrych dnjow do wuchodnych čłonskich statow přepołožić. Te čuja so wot Ruskeje wohrožene, po tym zo je sej wona Krim přiswojiła. Rozkaznistwo NATO w nižozemskim Brunssumje akciju koordinuje.

Dźěl spěšneje zasadźenskeje jednotki přizemi­ we Wrócławju a Sczeczinje. Wottam wojakow na zwučowanišćo w zapadopólskim Żaganju přepołoža a jich tam zhromadźa. Ruska je wospjet přećiwo „njetrěbnym“ zwučowanjam tajkeho razu protestowała. Nowina Financial Times wozjewi njedawno měnjenje dweju generalow NATO, kotrajž mataj za to, zo by w padźe wójny ruske wójsko jednot­liwe wotdźěle superspěšneje jednotki bórze­ porazyło.

Lipsk (B/SN). Stoty zjězd katolikow kónc meje w Lipsku ma wobswět a klimu jenož minimalnje poćežować. Wšitke emisije, zawinowane přez zarjadowanja, budu registrowane, rjekny jednaćel zjězda katolikow Martin Stauch. Za kóždu pře­trjebanu papjeru, kóždy liter wody abo bencina płaći so na kóncu wurunanje, štož budźe po słowach Staucha něhdźe 23 000 eurow wučinjeć. Pjenjezy maja so wužiwać za pomocny projekt w Indiskej.

Křesćanske hódnoty

Schneeberg (B/SN). Za dźěći wokoło Schwarzenberga hač do Zwickauwa wobsteji wot lěta 2000 ewangelska zakładna šula w Schneebergu. Šěsć lět pozdźišo je tamniše šulske towarstwo hišće wyšu šulu wotewrěło. Wothłós je jara dobry, zdźěli farar Frank Meinel z nošerskeho zwjazka za šule. „Wobě stej mjeztym kruty dźěl kubłanskeje krajiny w zapadnych Rudnych horinach. Dohromady 460 šulerjow w Schneebergu wuwučuje 40 pedagogow. Šulske žiwjenje ma swój zakład w posrědkowanju křesćanskich hódnotow, socialneje kompetency, škita přirody a indiwiduelneho spěchowanja. Wosebitosć je wučbny předmjet diakonija.

Policisća dušinje přećeženi

Wopak připrawjena filipinska chorhoj je chinskich rybarjow přeradźiła, kotřiž su ilegalnje před pobrjohom Filipinow ryby łójili. Mórskej straži bě napadnyło, zo su barby chorhoje zawjerćane. Při kontroli­ stražnicy zwěsćichu, zo je łódź jeničce za Chinu registrowana. Cyłkownje­ 25 Chinjanow zajachu. Filipiny a China so hižo dołho wo mórsku mjezu wa­dźitej.

Małej běłej lawaj Magdeburgskeho zwěrjenca dóstawatej wotnětka mloko z pólki. Tole je nawodnistwo zwěrjenca rozsudźiło, po tym zo běštej wobaj tójšto wahi přisadźiłoj a hrožeštej zahinyć. Hladarka so nětko wodnjo a w nocy wo njej stara. Čehodla stej młodźeći takle wotbyłoj, dotal­ njewědźa: Pak njeměješe lawica-mać Kiara mloka dosć, pak stej wonej infekt­ přećerpjeć dyrbjałoj.