Blinken namołwja Israel
Washington (dpa/SN). Wonkowny minister USA Antony Blinken je Israel znowa namołwjał, wjace za škit ciwilistow w Gazaskim pasmje činić. Na zetkanju ze swojim britiskim kolegu Davidom Cameronom we Washingtonje Blinken rjekny, zo njeńdźe jenož wo to, wěstotne pasma zarjadować. Runje tak wažne je, ludźom tole tež posrědkować, zo bychu wědźeli, kak móhli sej do tuteje kónčiny wućeknyć. Nimo toho dyrbjeli ćeknjeni we wěstotnych pasmach žiwidła, wodu a medikamenty měć.
Israel dyrbi sej wulkeje ličby ciwilnych woporow mjez Palestinjanami jako sćěh wojowanjow přećiwo islamistiskej Hamas raznu kritiku lubić dać. USA su prěnje tydźenje Gazaskeje wójny ze zjawnym poradźowanjom Israela wójny dla zdźeržliwje wobchadźeli. Tole je so mjeztym napadnje změniło.
SPD stronski zjězd zahajiła
Ludźo z knježerstwom njespokojm
Berlin (dpa/SN). Jasna wjetšina ludźi w Němskej je po najnowšim woprašowanju njespokojom z dźěłom zwjazkoweho knježerstwa. 82 procentow, šěsć procentow wjace hač w nowembru, so w tutym zmysle wupraja, kaž z dźensa wozjewjeneho wuslědka woprašowanja instituta Infratest Dimap w nadawku sćelaka ARD wuchadźa. Jenož 17 procentow woprašanych je z dźěłom amploweho knježerstwa spokojom.
Tež nahladnosć zwjazkoweho kanclera Olafa Scholza (SOD) woteběra. 20 procentow ludźi je z jeho dźěłom spokojom, wosom procentow mjenje hač w nowembru. Jenož 27 procentow ludźi hišće do toho wěri, zo je Scholz swojemu zastojnstwu zrosćeny. Bychu-li zajutřišim, njedźelu, wólby zwjazkoweho sejma byli, by 14 procentow SPD woliło (minus dwaj). Zeleni bychu 15 procentow (+1) měli. FDP njeby ze štyrjomi procentami w sejmje wjace zastupjena była. Najsylniša móc je CDU ze 33 procentami (plus dwaj). Za njej přińdźe AfD z 21 procentami(-1). Lěwica ma jenož hišće tři procenty.
Nowa hida wusyta
Postupowanje Israela w Gazaskim pasmje dopomina mje na zubneho lěkarja, kiž pacienta na stólčku prosy, bolosće točenja tola hišće chwilku znjesć, wšako je bórze wšo přetrate. A hdyž israelske wójsko něhdy wozjewi, zo je wšitkich teroristow Hamas moriło a jich infrastrukturu zničiło, wostanu morjeni palestinscy ciwilisća a rozwaliny něhdy wobsydleneho pasma nad Srjedźnym morjom wróćo kaž krawne kompresy w lěkarskej praksy.
„Nječińće samsne zmylki kaž my“, bě prezident USA Joe Biden po nadpadach Hamas na Israel 7. oktobra rjekł. W lěće 2001 běchu so USA po terorowych nadpadach w New Yorku z podobnej logiku do Afghanistana podali kaž nětko Israel do Gazaskeho pasma: Zatřělimy teroristow a potom změjemy měr! Njewěm, hač je štó hdy ciwilne wopory zličił. Wěste pak je, zo njejsu ameriscy wojacy runje tak kaž israelscy wojacy jenož morjenych ciwilistow zawostajili, ale tež symjo hidy, kotrež znowa zeschadźa. Marko Wjeńka
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (08.12.23)
Curryjowu kołbasu w spódnich cholowach je muž we wobchodźe w delnjosakskim Obernkirchenje pokradnyć chcył. Detektiw wobchoda bě 50lětneho wobkedźbował, jako tón dwě tyzy hotoweje jědźe z curryjowej kołbasu do spódnjeje drasty tykaše. Paducha narěčachu, jako chcyše wón nimo kasy hić. 50lětny njeměješe dowidźenja a přistajenych wobchoda ranješe. Muž je tam mjeztym derje znaty: Jemu běchu hižo před dlěšim časom zakazali, do wobchoda přińć.
Drogi wuslědźił je policajski psyk na wuměnku w Stuttgarće při wječornym wuchodźowanju. 11lětne zwěrjo bě ze swojej 34lětnej wobsedźerku, cłownej zastojniču, při milinowym kašćiku nimo šoł a naraz zašćowkał. Zastojniča namaka na to wjacore při kašćiku přilěpjene titki z hašišom. Policija drogi sćaza. Štó bě je tam zawostajił, hišće njewědźa.
Dźěłarnistwa wočakuja poskitk
Rozsudne koło tarifowych jednanjow za zjawnu słužbu w Podstupimje
Podstupim (dpa/SN). Do zahajenja dźensnišeho poslednjeho koła tarifowych jednanjow w zjawnej słužbje krajow su dźěłarnistwa ćišć na dźěłodawarjow wčera hišće raz zwyšili. Předsyda dźěłarnistwa ver.di. Frank Werneke, je kraje namołwjał, dosahacy poskitk předpołožić. „Schowanje dyrbi skónčnje nimo być“, rjekny Werneke powěsćerni dpa w Berlinje. „Rozsudźenosć přistajenych krajow, wo swoje žadanja chutnje wojować chcyć, je we wobłuku tuchwilnych stawkow wjace hač widźomna“, Werneke warnowaše. Dźěłodawarjo dyrbjeli hněw přistajenych skónčnje chutnje brać. Minjene tydźenje běchu mjez druhim přistajeni uniwersitnych chorownjow, wysokich šulow a justicy za lěpšu mzdu warnowanske stawki přewjedli. Jeničce w Düsseldorfje je wutoru wjace hač 15 000 přistajenych we wjacorych demonstracijach po měsće ćahnyło. Wčera zhromadźichu so přistajeni zjawneje słužby před financnym ministerstwom w Drježdźanach. Trěće koło tarifowych jednanjow su dźensa w Podstupimje zahajili.
Projekty Zwjazka njepostupuja
Choćebuz (dpa/SN). Wo „dyrje do žołdka“ rěči zapósłanc zwjazkoweho sejma Christian Görke z dotalneje frakcije Lěwicy hladajo na wotmołwu ze zwjazkoweho ministerstwa za wobchad na swoje małe naprašowanje. Po tym projekty Zwjazka za wutwar kolijow we wobłuku změny strukturow we Łužicy so jara dlija, někotre samo wo dwě do štyrjoch lětow porno 2021 wuwołanym cilam. Tehdy běše kónc planowanjow za elektrifikaciju čary Berlin-Choćebuz-Běła Woda-Zhorjelc za 2031 předwidźany. Nětko maja dźěła hakle 2034 dokónčene być.
Wutwarjena a fungowaca kolijowa infrastruktura je wažne wuměnjenje za radźenu změnu strukturow, zo bychu ludźo do Łužicy přećahnyli a so tam industrija zasydliła. Zwěsćene zapozdźenja kritiku Lěwicarja wubudźa. „To je tola absurdne: Twarja přewšo modernu wuporjedźernju železnicy w Choćebuzu, wutwar kolijow pak njepostupuje“, rjekny Görcke. Wón wupraji so za to, wutworić kraje přesahowacu towaršnosć planowanja, w kotrejž so Braniborska, Berlin a Sakska hromadźe z Němskej železnicu zaměrnje wo projekty we Łužicy staraja.
Putin w arabskimaj krajomaj
Riad (dpa/SN). Ruski prezident Wladimir Putin je so na jednej ze swojich mjeztym jara rědkich wukrajnych jězbow z wolijowymaj krajomaj Sawdi Arabskej a ze Zjednoćenymi arabskimi emiratami wothłosował. W sawdiskej stolicy Riadźe rěčeše Putin předewšěm z krónprincom a faktiskim knježićelom Mohammedom bin Salmanom. Putin potwjerdźi wuske poćahi mjez Ruskej a sawdiskim kralestwom. Wobaj so dojednaštaj, zo wotměje so přichodne zetkanje w Moskwje.
Dojednanje hišće lětsa
Mainz (dpa/SN). Předsyda SPD Lars Kingbeil liči z „politiskim rozrisanjom“ etatoweje krizy hišće w tutym lěće. Byrnjež tuchwilu předewšěm zwjazkowy kancler Olaf Scholz (SPD), zwjazkowy hospodarski minister Robert Habeck (Zeleni) a financny minister Christian Lindner (FDP) wo problemach wuradźowali, je Klingbeilej jasne, „zo njerozsudźa to tući třo, ale zo maja to strony, frakcije a knježerstwo zhromadnje činić“. Tohodla dyrbi naležnosć do koaliciskeho wuběrka.
Zastupnikow EU witał
Dalša pomoc USA blokowana
Kijew/Washington (dpa/SN). Ukraina dóstawa dale wojersku pomoc USA a podpěru EU – tola přełam ze spušćomnymi přilubjenjemi z Washingtona njeje wotwidźomny. Prezident Joe Biden je kongres wčera hišće raz naležnje prosył, nowym pomocnym srědkam na dobro wot Ruskeje nadpadnjenu Ukrainu přizwolić. Nawoda ukrainskeho prezidialneho zarjada w Kijewje, Andrij Jermak, kiž je tuchwilu z delegaciju wodźacych ukrainskich politikarjow we Washingtonje, je wčera zwuraznił, zo je Ukraina bjez dalšeje pomocy USA zhubjena.
