Wjedro zymne a mokre
To a tamne (24.11.23)
Škrěčenje a harowanje wokoło kompjuteroweje hry je njedaloko Lübecka zasadźenje policije zawinowało. Susodka bě pohladnych zwukow dla zastojnikow informowała. Do toho bě wona podarmo wo durje a wokna susoda kłapała. 21lětny syn słuchatkow dla ničo njesłyšeše. Tež zastojnicy njemějachu z kłapanjom a swěcu kapsnych lampow žadyn wuspěch. Bjezmała bychu wohnjowi wobornicy durje namócnje wotewrěli. W poslednim wokomiku přińdźe nan z klučom.
Mario Balotelli, bywši italski narodny kopar, je awtowe njezbožo njezranjeny přetrał. 33lětny, kiž hraje aktualnje w Turkowskej, je ze swojim awtom w sewjeroitalskim Brescia do sćěny prasnył. Po tym je pječa test alkohola wotpokazał. W Němskej maja Balotellija w špatnym pomjatku: Wón bě 2012 němske mustwo při EM z dwojimi wrotami z turněra třělił.
Prawicarski populist dobył
Den Haag (dpa/SN). Nižozemska steji před historiskej politiskej změnu do směra na prawicarstwo. Populist Geert Wilders je wólby parlamenta dobył. Politikar na samym prawicarskim boku chce nětko ze swojej islam wotpokazowacej stronu knježerstwo wutworić a so z naslědnikom rozžohnowaceho so ministerskeho prezidenta Marka Rutteho stać. Njejasne je, hač móže Wilders woprawdźe zwjazk z druhim politiskimi stronami wutworić.
Zwjazkowy zjězd Zelenych
Berlin (dpa/SN). Po wliwom tuchwilneje etatoweje krizy hromadźuja so Zeleni wot dźensnišeho w Karlsruhe na swój zwjazkowy zjězd. Hač do njedźele chce 825 delegatow nowe zwjazkowe předsydstwo a dalše gremije wuzwolić. Wobaj přesydaj, Ricarda Lang a Omid Nouripour znowa kandidujetaj. Prašenje njerozrisaneho etatoweho problema amploweje koalicije 60 miliardow eurow dla drje na spočatku wobjednawaja.
Tójšto satelitow w swětnišću
Rjadniska sotra steji ze swojim mobilnym telefonom na Pětrowym ...
Wotpokazuja socialny wottwar
Reichsbürgerow přepytowali
Pušćenje zastajencow so dliji
Tel Aviv/Gaza (dpa/SN). Mjez Israelom a islamistiskej Hamas wujednane pušćenje zastajencow z Gazaskeho pasma so dliji. „Dojednanu akciju móžemy drje hakle pjatk přewjesć“, zdźěli israelski wěstotny poradźowar Tzachu Hanegbi wčera wječor medijam. Dokładny termin wojerskeje přestawki chcychu dźensa wozjewić. Hamas bě wčera připowědźiła, zo chcychu dźensa wojować přestać, zo móhli zastajencow přepodać. Na druhim boku wočakowachu Palestinanjow, kotrychž chcyše Israel ze swojich jastwow pušćić. Pječa pak pobrachuja pod wotpowědnym dokumentom hišće wjacore podpisma israelskeje strony a zastupnikow Hamas. Nětko so nadźijeja, zo wobě stronje dokument přichodne hodźiny podpisatej. Israelske medije rěča wo „komplikacijach w poslednjej mjeńšinje“.
W zwisku z Hamas stejaca a z israelom tohorunja znjepřećelena milica Hisbollah w Libanonje, kotraž po spočatku Gazaskeje wójny stajnje zaso israelske wójsko nadběhuje a z raketami wobtřěla, njeje wobstatk zrěčenja.
To a tamne (23.11.23)
Wisajo pod nakładnym awtom je wopity Awstralčan na wšě 400 kilometrow sobu jěł. Poprawom chcyše so na tute wašnje darmotnje hač do přichodneho městačka předrěć a tam při čerwjenej ampli „wotskočić“. Truck pak měješe na swojim puću jenož zelene ample a hakle po štyrjoch hodźinach w měsće Gold Coast w susodnym zwjazkom staće pozasta. Policisća napisachu mužej chłostanku 170 eurow a dowjezechu jeho na dwórnišćo.
Pytajo za pokładom je muž na polu w Hohenlindenje pola Mnichowa ze swojim metalowym detektorom kwasny pjeršćeń 81lětneje žony z Awstriskeje namakał. Žona bydleše po kwasu 1964 we wsy a je tam pjeršćeń zhubiła. Pozdźišo přesydli so wona do Awstriskeje. Namakar, bywši policist, móžeše žonu z pomocu zadypaneho kwasneho datuma a stawniskich zapisow wsy wuslědźić.
Zastajencow spěšnje pušćić
Washington (dpa/SN). Knježerstwo USA dźěła po swójskich informacijach z wotmachom na tym, zastajencow w Gazasskim pasmje spěšnje wuswobodźić. Po słowach komunikaciskeho direktora Narodneje wěstotneje rady Běłeho domu John Kirbyja prócuja so „bjez přestawki“ wo rozrisanje, kotremuž su pječa „wo tójšto bliše přišli“. Při tym dźe wosebje wo pušćenje dźěći a žonow z rukow Hamas, „a wězo tež wo Američanow“.
Nowe brónje USA za Ukrainu
Washington (dpa/SN): Ukraina dóstanje nowy paket bróni z USA. Posyłka w hódnoće sto milionow dolarow je wobstatk pomocneho programa, kotremuž je kongres USA hižo přizwolił. Konkretnje jedna so wo rakety za wotwobaranje lětadłow, nastroj za mjetanje raketow a municiju za artileriju. Knježerstwo USA je nimo toho ruskimaj oficěromaj zakazało, do USA přińć, wumjetujo jimaj „ćežke ranjenje čłowjeskich prawow“.
Planuja nowy satelit
