Negatiwny test žana garantija
Mnichow (dpa/SN). Tójšto tuchwilu wužiwanych testow koronawirusa častodosć infekciju čłowjeka z wirusowej wariantu omikronom njespóznawa. To je skupina slědźerjow wokoło Mnichowskeho wirologi Olivera Kepplera z Ludwiga Maximiliansoweje uniwersity zwěsćiła. Testy dotalnu wariantu delta lěpje spóznawaja hač omikron, rěka w rozprawje fachoweho magacina „Medical Microbiology and Immunology“. „Nichtó njesmě negatiwny testowy wuslědk za garantiju měć“, Keppler warnuje. Runje w žołmje omikrona su po jeho měnjenju škitne naprawy, kaž wotstawk dodźeržeć a nahubnik wužiwać, wažne.
Testować ludźi bjez symptomow skići w aktualnym połoženju skerje jebacu wěstotu a nima po słowach Kepplera wjele zmysła. Lěpje je, při symptomach z wobmjezowanjom kontaktow z dobrymi antigenowymi testami dźěłać. Za to měła so jara spěšnje lisćina najspušćomnišich testow zestajeć a wozjewić – w Němskej je jich mjeztym 580. Tak móhli „slepe testy“ identifikować, Keppler měni.
Habeck: Dlěje dźěłać, štóž chce
Minister za hospodarstwo chcył rentowu starobu fleksibilizować
Berlin (dpa/SN). Hladajo na dale a mjenje fachowcow w Němskej je so zwjazkowy minister za hospodarstwo Robert Habeck (Zeleni) za to wuprajił, zo dyrbjeli ludźo składnosć dóstać tež po docpěću rentnarskeje staroby dlěje dźěłać móc. Habeck rjekny nowinarjam, zo měło so to na dobrowólnym zakładźe stać. Tajke fleksibelne dlěše dźěło by so dwójce wudaniło: Štóž chce, móže swoju wědu, swoje zamóžnosće a swoje nazhonjenja towaršnosći přewostajić. Z toho bychu zawody a towaršnosć profitowali. „Runočasnje činimy něšto přećiwo njedostatkej fachowych mocow“, Habeck zwurazni. Zastup do renty měł so w časowym woknješku stać, nic na krutym terminje.
Putin testuje zapad
Pólske spedicije do Němskeje
Čłonow mafije zajeli
To a tamne (22.02.22)
W paslach tčacy paduch je w Bielefeldźe policiju wołał. 19lětny bě so do lěkarskeje praksy zamknyć dał, zo by ju za pjenjezami přeslědźił. Přez balkony zalěze wón do dalšeje praksy, njemóžeše pak durje běrowa přewinyć. Na to so do prěnjeje praksy nawróći, zwrěšći pak při zamknjenych durjach. Po hodźinach so rozsudźi, nuzowe čisło wolić. Sudnik pósła jeho nablaku do jastwa, dokelž je w jědnaće dalšich tajkich padach podhladny.
Zawěru železniskeho přechoda přełamał je rentnar ze swojim awtom na Rujanach – a je so ze swojim wobškodźenym awtom zminył. Zastojnikomaj, kotrajž 86lětneho krótko po tym w porjedźerni awtow nańdźeštaj wón rozłoži, zo njebě zawěru na přechodźe widźał. Policija chce nětko pruwować dać, hač je starc scyła hišće kmany awto wodźić. Nimo toho dyrbi so zasahnjenja do wobchada dla zamołwić.
Swjeći žane dźiwy njeskutkuja
Vatikan (B/SN). Bamž Franciskus je warnował před formami pobožnosće, kotrež skerje pohansku mentalitu wotbłyšćuja. Na njedawnej generalnej awdiency starosćeše so wón wopačneho zrozumjenja swjatych dla. „Swjeći sami žane dźiwy njewuskutkuja, ale jeničce Boža hnada, kotraž w nich skutkuje.“ Runočasnje pak je bamž česćowanje swjatych pozitiwnje wuzběhnył, dokelž je modlitwa k nim kaž rozmołwa z přećelom. Wón pokaza na to, zo su wšitcy wěriwi „w zhromadnosći swjatych zwjazani, tež po smjerći. Smy přez mjena, kotrež mamy, přez cyrkej, kotrejž přisłušamy, a přez městnosć, hdźež bydlimy, swjatym přez patronow našich mjenow bliscy.“
Połoženje cyrkwje dramatiske
Napjatosće w koaliciji
Berlin (dpa/SN). Zwada wo powšitkownu winowatosć šćěpjenja pře koronawirus wjedźe k napjatosćam w koaliciji SPD, Zelenych a FDP. Zastupowacy frakciski předsyda SPD Dirk Wiese kritizuje zwjazkoweho justicneho ministra Marca Buschmanna (FDP) za jeho skeptiske wuprajenja k předewzaću. Wuprajenja ministra njejsu „prawnisce dopřemyslene“, rjekny Wiese nowinarjam. Buschmann bě dwělował, hač je šćěpjenska winowatosć scyła hišće trěbna.
Přeja bórzomne wustrowjenje
London (dpa/SN). Po pozitiwnym tesće britiskeje kralowny Elizabeth II. na koronawirus su jej politikarjo a dostojnicy po wšěm swěće bórzomne wustrowjenje wupřeli. Buckinghamowy palast bě wčera zdźělił, zo je 95lětna na koronawirus schorjeła a zo ma snadne symptomy. Najebać to chcyła wona wšelake lochke dźěła wukonjeć a na přikład knježerstwowe dokumenty čitać. Kralowna je wjackróć šćěpjena.
Aktiwisća móst zaraćili
