Scholz wo dobrym signalu rěčał
Moskwa (dpa/SN). Ruska sćele wosrjedź krizy Ukrainy dla z dźělnym cofnjenjom swojich jednotkow signal wotputanja. Prezident Wladimir Putin je na swojim wčerawšim zetkanju ze zwjazkowym kanclerom Olafom Scholzom (SPD) potwjerdźił, zo Ruska žanu nowu wójnu w Europje nochce. Diplomatiske móžnosće njejsu dawno hišće wučerpane, rjekny Putin po třihodźinskej rozmołwje ze Scholzom na nowinarskej konferency.
Hodźiny do wopyta Scholza bě Ruska započała, dźěle swojich jednotkow z manewroweje kónčiny na juhu a zapadźe kraja wróćo do kasernow přeměstnić. Druhe wojerske zwučowanja pak dale traja, tež w Běłoruskej. Scholz rěčeše na zhromadnej nowinarskej konferency wo „dobrym signalu“. Wón so nadźija, zo Ruska dalše jednotki z pomjezneje kónčiny cofnje. Putin hišće raz potwjerdźi, zo je Ruska k rozmołwam wo wěstotnych garantijach zapada zwólniwa. Mjeztym je prezident USA Joe Biden hišće raz před nadpadom Ruskeje na Ukrainu warnował. To je „přeco hišće móžno“.
Škoda – žana wójna!
To a tamne (16.02.22)
W swojim awće kruće spjacy muž je w Drježdźanach zasadźenje wohnjoweje wobory zawinił. Přećelce njebě so poradźiło jeho w awće wubudźić, kotrehož motor běžeše. Hakle jako přiwołani wobornicy wóz zhromadnje zatřasechu, muž wotući. Njezranjeny wón wulěze a poda so do swojeho bydlenja, hdźež móžeše woměrje dale drěmać.
Powětr z wobručow 150 awtow wotpušćili su wobswětoškitni aktiwisća minjeny tydźeń w Berlinje. Policija je mjeztym dweju podhladneju zwěsćiła. Potrjechene běchu předewšěm wulke a drohe SUVje. Skućićeljo běchu powětr z jedneje abo tež hnydom ze wšěch wobručow wotpušćili. W dwěmaj padomaj wobruče rozkałachu. Na wjacorych awtach zawostajichu cedlu „z wobswětopolitiskim poćahom“ abo z namołwu za „hnydomnej wobchadnej změnu“.
Baerbock w Španiskej
Berlin/Madrid (dpa/SN). Wonkowna ministerka Annalena Baerbock (Zeleni) je dźensa partnerski kraj w NATO Španisku wopytała. W Madridźe wočakowaše ju jeje kolega w zastojnstwje José Manuel Albares. Nimo aktualnych bilateralnych temow chcyštaj wobaj napjate połoženje mjez Ruskej a Ukrainu rozjimać, kaž rěčnik wonkowneho ministerstwa zdźěli. Je to zdobom nastupny wopyt Baerbock.
Ruska cofnje wojakow
Moskwa (dpa/SN). Wosrjedź konflikta z Ukrainu je Ruska po swójskich informacijach po manewrach započała, swoje jednotki na juhu a zapadźe cofnyć. Prěni wojacy mějachu so hišće dźensa do swojich kasernow nawróćić, zdźěli rěčnik zakitowanskeho ministerstwa. Nimo toho su započeli, wojersku techniku na ćahi nastajeć. Někotre dalše manewry so přichodne dny skónča. Rěčnica wonkowneho ministerstwa Marija Zacharowa rjekny: „15. februar zańdźe jako dźeń zwrěšćenja zapadneje wójnskeje propagandy do stawiznow. Zapad je so blamował.“
Nižozemska naprawy zběhnje
Dwaj regionalnej ćahaj stej wčera popołdnju njedaloko dwórnišća ...
Ischinger by Rusku witał
Nuzowy staw w Kanadźe
Scholz pola Putina w Ruskej stolicy
Moskwa/Berlin (dpa/SN). Po swojim krótkowopyće w Kijewje je zwjazkowy kancler Olaf Scholz (SPD) dźensa ze swojimi prócowanjemi wo wottwar napjatosćow w krizy na Ukrainje w Moskwje pokročował. Tam wočakowaše jeho ruski prezident Wladimir Putin na dlěšu rozmołwu, za kotruž su po informacijach Krjemla wjacore hodźiny zaplanowali. Formelnje jedna so wo nastupny wopyt Scholza w času, w kotrymž su němsko-ruske poćahi tak špatne kaž hižo dołho nic.
Zwjazkowy kancler bě wčera w Kijewje potwjerdźił, zo chcył so pola Wladimira Putina za wotputanje krizy zasadźeć.
Jězba Scholza wotměwa so před pozadkom spekulacijow ze stron USA wo móžnym ruskim nadpadźe na Ukrainu hišće tutón tydźeń. Američenjo běchu wčera připowědźili, zo přepołoža personal wulkopósłanstwa ze stolicy Kijewa do Lwowa blisko mjezy k Pólskej. Mjeztym je Ruska wospjet potwjerdźiła, zo žadyn wojerski nadpad na Ukrainu njeplanuje.
Merz drje tež šef frakcije unije
Z napjatosću wočakuja podpěru zapósłancow CDU/CSU za předsydu
Berlin (dpa/SN). Frakcija unije w zwjazkowym sejmje chcyše dźensa předsydu CDU Friedricha Merza za noweho nawodu wuzwolić. Zo Merz wjetšinu hłosow wšěch 197 zapósłancow CDU a CSU dóstanje, je tak derje kaž wěste. Z wulkej napjatosću přiwšěm wočakuja, kak sylna podpěra na dobro 66lětneho hospodarskeho politikarja w frakciji woprawdźe je. Merz bě w lětach 2000 do 2002 hižo raz předsyda frakcije unije. W lěće 2009 so wón na dobro karjery w hospodarstwje ze zwjazkoweho sejma wróćo sćahny a je hakle po wólbach zwjazkoweho sejma 2021 zaso do parlamenta zaćahnył.
Předsyda krajneje skupiny CSU Alexander Dobrindt chcyše Merza za naslědnika dotalneho frakciskeho předsydy Ralpha Brinkhausa (CDU) namjetować. Po informacijach CSU stanje so to w nadawku a po dorěči ze stronskim předsydu Markusom Söderom, kiž wostanje debaty wo koronapolitice dla w Mnichowskim krajnym sejmje. „Njejsym nawoda opozicije, to budźe Friedrich Merz“, je Söder njedawno nowinarjam rjekł.
To a tamne (15.02.22)
Ze 60 lětami zapozdźenja je wužiwar biblioteki w sewjerorynsko-westfalskim Mönchengladbachu wupožčenu knihu wróćił. Wona ležeše w pakćiku z južneje Francoskeje – zhromadnje z dwustronskim rukopisnym zamołwjenjom. Mjeztym 81lětny wupožčowar prosy w swojim lisće „tysac króć wo wodaće“. Jedna so wo knihu Friedricha Engelsa z lěta 1883. Titul móžachu nětko z dołheje lisćiny zhubjenych knihow šmórnyć.
40 lět z falšowanej jězbnej dowolnosću po puću był je muž w Osnabrücku. Wobšudnistwo so wukopa, jako chcychu lěta 1982 wupisany papjerjany dokument na po wšej EU płaćiwu plastikowu kartku zaměnić. Sobudźěłaćerjej zarjada za jězbne dowolnosće napadny, zo drje bě formular originalny, kołki a podpisma pak běchu falšowane. Wobsedźerjej hrozy jednanje falšowanja dokumentow dla.
