Berlin (dpa/SN). Zakonske chorobne kasy nimaja so za kontrolu móžneje po­wšitkowneje šćěpjenskeje winowatosće přisłušne. Wotpowědnu iniciatiwu skupiny zapósłancow SPD, Zelenych a FDP, kotřiž su wotpowědny naćisk zakonja hižo zdźěłali, je načolny zwjazk zakonskich chorobnych kasow jasnje wotpokazał. Rěčnik zwjazka rjekny nowinarjam, zo su kasy dale zwólniwe, swój nadawk nastupajo informaciju a poradźowanje zawěsćenych spjelnić. „Přesadźenje a kontrola šćěpjenskeje winowatosće je porno tomu nadawk stata“, wón rjekny. Minjene dny běchu tež strowotniske zarjady zdźělili, zo bychu z kontrolu přežadane byli.

Magdeburg (dpa/SN). Prawidło „2G“ we wobchodach, po kotrymž smědźa jenož šćěpjeni a wotchorjeni nakupować, móhło hižo bórze wuběžeć. Wjacore zwjazkowe kraje su připowědźili, zo chcedźa na přichodnych wuradźowanjach koronawirusa dla cyłoněmske wotstronjenje tutoho prawidła přesadźić. Mjez nimi su Saksko-Anhaltska, Sewjerorynsko-Westfalska a Porynsko-Pfalca. W mnohich krajach prawidło 2G na zakładźe sudniskich wusudow wjace njepłaći, dalše kraje chcedźa je přichodne dny wotstronić. Ministerski prezident Saksko-Anhaltskeje Reiner Haseloff (CDU) je připowědźił, zo chcyło krajne knježerstwo wotstronjenje 2G přichodnu wutoru wobzamknyć.

Braniborscy wobchodnicy so nadźijeja, zo so połoženje w drobnowikowanju spěšnje zaso polěpši. Tam smědźa wot wčerawšeho tež nješćěpjeni we wšitkich wobchodach nakupować. Krajne knježerstwo bě to předwčerawšim, wutoru, wobzamknyło. Na městnach z wjele ludźimi pak dyrbja ludźo dale nahubnik FFP2 wužiwać. To płaći hač do 23. februara.

Serbske pomniki jewjachu so jenož na kromje přednoška dr. Sönke Friedreicha. To je zrozumliwe, dokelž wobmjezuje so jeho přepytowanje wo měšćanskej wopominanskej kulturje w Sakskej na čas do 1914. A telko serbskich monumentow – wosebje tež figurowych – tehdy njebě. Znajmjeńša skedźbni wón na „skromne česćowanje“, kotrež dósta Jan Arnošt Smoler 1968 z bustu w Budyšinje. Móžemy tuž na prašeni referenta, kotre skupiny maja prawo widźomne być a štó ma móc, tute prawo zwoprawdźić, ze serbskeho wida wotmołwić: Serbja su zwjetša hakle pod wuměnjenjemi mjeńšinoweje politiki NDR prawo zwoprawdźić móhli, w zjawnym rumje na sebje samych skedźbnić – tež, hdyž so tradicija serbskich pomnikow z postajenjom pomnika za Jana Michała Budarja 1867 zahaji, kaž Trudla Malinkowa pisa. Nětko wuńdźe jeje kniha wo serbskich pomnikach jako rozšěrjena němska wersija. Móžemy wćipni być, što hišće wšo zhonimy. Cordula Ratajczakowa

Berlin (dpa/SN) Zeleni w Berlinje žadaja sej spěšne zběhnjenje popłatka za parkowanje. W koaliciskim zrěčenju mjez SPD, Zelenymi a Lěwicu dojednane podróšenje popłatka za parkowanje wobydlerjow wot dźesać na 120 eurow wob lěto a nowe tarify za parkowanje na krótki čas měli so hišće lětsa přesadźić, žada sej rěčnik Zelenych za modernu mobilitu Werner Graf.

Zdobom wón potwjerdźi, zo móhła to z jeho wida jenož prěnja kročel być. „Za nas Zelenych dyrbi potom dale hić“, Graf rjekny. Zaměr je wuwiće diferencowaneho systema popłatkow, kotryž tež socialne a ekologiske faktory wobkedźbuje. Wón mysli na to, wulkosć awta wobkedźbować. Wažne jemu je, zo wotměwa so wšitko njeběrokratisce.

Frakciska předsydka Zelenych Antje Kapek na to skedźbnja, zo płaći wobchadna změna z wutwarom zjawneho bliskowobchada miliardy eurow. Tuž je nimo předawanja jězdźenkow a statnych přiražkow třeći financny stołp trěbny. K instrumentam, kotrež chcedźa za to wuwić, słuša zawjazowacy hóstny tiket za turistow a kaž w koaliciskim zrěčenju zakótwjene, wyši popłatk za parkowanje.