Stawiznarka z ćěłom a dušu była
Zrudna powěsć je k nam dóšła, zo je něhdyša županka našeje župy „Michał Hórnik“ Trudla Kuringowa 84lětna na prawdu Božu wotešła. Narodźiła bě so 28. januara 1940 do serbskeje swójby w Kanecach. Wuchodźiwši šulu we Wotrowje a susodnych Pančicach kaž tež po wopyće wyšeje šule w Budyšinje nawukny powołanje tekstilneje chemikarki. Přemóžaca pak bě jeje žadosć, stać so z wučerku. Tuž nawróći so po dwěmaj lětomaj z Limbacha-Oberfrohny do Łužicy, zo by na Budyskim Pedagogiskim instituće serbšćinu a němčinu studowała. Wot 1968 do 1991 běše wona wučerka w Šuli Ćišinskeho w Pančicach-Kukowje. Mjeztym zabsolwowa dalokostudij chemije. Dalši puć powołanskeho žiwjenja wjedźeše ju jako wučerku na Budyski Serbski gymnazij hač do lěta 2000.
Zmandźeliwši so z Janom Pohončom, narodźi so mandźelskimaj w přichodnych lětach pjeć dźěći. Ćežke horjo je swójbu trjechiło, jako mandźelski a nan 1991 zemrě.
Trudla Kuringowa bě hižo z časa swojeje młodosće aktiwna čłonka Domowiny. Nimale 50 lět skutkowaše w předsydstwje Domowinskeje skupiny w Kanecach, wjacore lěta z toho jako předsydka.
Znowa nadźija na přiměr
Tel Aviv (dpa/SN). Po dlěje hač lěto trajacej wójnje w Libanonje maja pokazki na bližacy so přiměr mjez Israelom a pro iranskej milicu Hisbollah. Israelski ministerski prezident Benjamin Netanjahu je za dźensa wječor wěstotny kabinet zwołał, zo by 60 dnjow trajacy přiměr z Hisbolluh potwjerdźił. To zdźěli rěčnik knježerstwa israelskim nowinarjam. Powěsćernje rozprawjeja, zo chce kabinet dojednanju, kotrež běchu USA sposrědkowali, přihłosować.
Pytaja za přičinami zražki
Vilnius (dpa/SN). Po zražce nakładneho lětadła w Litawskej pytaja dale za přičinami njezboža. Za konkretne wotmołwy je po informacijach zamołwitych hišće přezahe. Dotal nimaja žanych pokiwow na sabotažu abo teroristiski nadpad na mašinu předewzaća Swift-Air, kotraž bě w nadawku DHL po puću z Lipska do Vilniusa. Zwjazkowy kancler Olaf Scholz (SPD) wčera rjekny, zo je to móžny teroristiski nadpad Ruskeje.
Tež Němcy mjez zhubjenymi
Tradicionalny 45 metrow wysoki štom Dortmundskich dohodownych wikow ...
Planuja koncept škitnych bunkrow
Trump chłosta susodow
Wuradźuja wo wupućach z krizy
Berlin (dpa/SN). Hospodarski minister Robert Habeck (Zeleni) je dźensa na industrijnej konferency ze zastupnikami hospodarskich zwjazkow a dźěłarnistwow wo wupućach z krizy wuradźował. Při tym wuradźowachu wo tym, kak móhła Němska kmanosć mjezynarodneho wubědźowanja zesylnić. Hospodarstwo žada sej spěšne rozsudy politiki a wosebje skutkownu pomoc hladajo na płaćizny miliny.
Habeck bě so runje tak kaž zwjazkowy kancler Olaf Scholz (SPD) za to wuprajił, ze statnymi srědkami milinu potuńšić. Tuchwilne knježerstwo SPD a Zelenych nima po zwrěšćenju amploweje koalicije w Němskej wjace žanu wjetšinu.
Industrijna konferenca wotměwa so we wobłuku zwjazka „Přichod na dobro industrije“. Temy rozmołwow su mjez druhim sćěhi dobyća Donalda Trumpa w prezidentskich wólbach w USA. Trump bě wyše cła na importy europskich tworow do USA připowědźił. Olaf Scholz bě hakle srjedź nowembra w kanclerskim zarjedźe industrijny wjeršk přewjedł – tola bjez Habecka.
Hižo žadyn regionalny konflikt
Zakitowanski minister Boris Pistorius chcył Ukrainu dale podpěrować
Berlin/Brüssel (dpa/SN). Po najnowšej eskalaciji we wójnje mjez Ruskej a Ukrainu chcedźa Němska a druhe čłonske kraje NATO produkciju brónjow w Ukrainje dale zesylnić. Financować chcedźa tole najprjedy raz z danjemi blokowaneho ruskeho zamóženja. To je zakitowanski minister Boris Pistorius (SPD) po zetkanju ze swojimi kolegami z Francoskeje, Wulkeje Britaniskeje, Pólskeje a Italskeje připowědźił. Ukraina běše dźensa tež hłowna tema wuradźowanjow wurjadneho posedźenja rady NATO a Ukrainy w Brüsselu kaž tež na zetkanju wonkownych ministrow sydom demokratiskich industrijnych krajow (G7) w Italskej.
Mjezsobne nadpady trajachu runočasnje dale. Ruska je minjenu nóc ukrainsku stolicu Kijew znowa z trutami nadběhowała, měšćanosta Witalij Kličko zdźěli. Do toho bě ukrainske wójsko ruske wojerske lětanišćo njedaloko Kurska z daloko sahacymi ameriskimi raketami typa ATACMS nadběhowało.
Radšo hnydom wumrěć
To a tamne (26.11.24)
Swoje awto mylnje sam zapalił je muž w badensko-württembergskim Konstanzu. Kaž policija zdźěla, chcyše 62lětny włóžnoće w awće zadźěwać. Wón staji elektriski sušak pod wodźidło a so wotsali. Kak dołho bě nastroj zaswěćeny, njeje znate. Susod je palace so awto wuhladał a wohnjowu woboru zazwonił. Płomjenja zničichu hišće dalše awto a moped. Susodne twarjenje su wobornicy škitali. Wěcnu škodu njejsu hišće wuličili.
Sydom hodźinow na pomoc čakała je žona po njezbožu na awtodróze A 39 njedaloko delnjosakskeho Salzgittera. 78lětna bě w twarnišću do wobhrodźenja prasnyła a na to awto na kromje wotstajiła. Dokelž bě mobilny telefon skóncowany, njemóžeše na nikoho zazwonić. Zadwělowana čakaše, doniž so policisća jeje njedohladachu. Tamni šoferojo njeběchu starušce pomhali.
Serbskemu ewangelskemu towarstwu předsydarił
Jako štwórty syn serbskeho superintendenta a Njeswačanskeho fararja Gerharda Wirtha narodźi so 23. nowembra 1954 Měrćin Wirth jako dwójnikowy porik zhromadnje z dźowku Madlen. Nětko w Budyšinje-Třělanach bydlacy, wjelelětny bywši předsyda Serbskeho ewangelskeho towarstwa, je sobotu swoje sydomdźesaćiny woswjećił.
Po wopyće Njeswačanskeje šule chcyše Měrćin Wirth kaž jeho starši bratřa Pawoł, Arnošt a Handrij Serbsku wyšu šulu wopytać. Politiskich přičin dla pak so jemu to znjemóžni. Jubilar nawukny tuž w Lutobču powołanje ratarskeho zamkarja z abituru. Po słužbje w armeji delegowaše zawod Měrćina Wirtha na štyrilětny studij na inženjera za ratarsku techniku do Berlina. Tam spožčichu jemu, kotrehož njeběchu na rozšěrjenu wyšu šuli přiwzali, za wurjadne wukony jako student čestny Wilhelma Pieckowy stipendij.
