Lětsa žane nowe zakonje wjace
Faeser za jednotu EU Syričanow dla
Brüssel (dpa/SN). Zwjazkowa nutřkowna ministerka Nancy Faeser (SPD) žada sej zhromadne europske postupowanje nastupajo móžny nawrót syriskich ćěkancow do jich domizny. „By najwunošniše było, tole zhromadnje organizować“, rjekny Faeser na zetkanju nutřkownych ministrow EU w Brüsselu.
Tež awstriski nutřkowny minister Gerhard Karner (ÖVP) wupraja so za jednotnu liniju EU. Zdobom wón w Brüsselu namołwješe, so w tym prašenju do spěcha měć. Azylowe jednanja ćěkancow přetorhnyć a runočasnje nawrót přihotować, „to njemóžemy dołho čakać“.
Braniborski krajny sejm je so dźensa tohorunja z móžnym nawrótom syriskich ćěkancow do domizny zaběrał. Frakcija AfD bě po powalenju mócnarja Assada a noweho połoženja w Syriskej dla wo wurjadne posedźenje prosyła. Strona sej žada, azylowe jednanja přetorhnyć.
Politikarjo diplomy kupowali
Wrócławski wyši měšćanosta a nawoda sejma do skandala zaplećenaj
Waršawa. Pólska towaršnosć bědźi so tuchwilu z korupciskej aferu, kotraž ma potencial, dowěru ludźi do politikarjow střasć. Dźe wo kupowane diplomy.
To a tamne (13.12.24)
Wjace hač 3,5 milionow eurow nazběrał je José Careras we wobłuku swojeje mjeztym 30. telewizijneje gale na dobro ludźi, kotřiž su na leukemiju schorjeli. „Sym přemóženy a jara dźakowny za trajacu podpěru darićelow. Na prěnim zarjadowanju 1995 njebych sej zwažił, wo tym sonić“, rjekny 78lětny operowy spěwar k wuslědkej akcije w Lipsku, kotryž sćelak MDR wusyłaše. Loni běchu po tutym puću 3,3 miliony eurow nazběrali.
Mysteriozne truty na njebju wuchodneho pobrjoha USA nuzuja Běły dom we Washingtonje k oficialnemu stejišću. „Nimamy žane dopokazy, zo su informacije wo wobkedźbowanych lětacych objektach za wěstotu USA wohrožowace“, rjekny direktor za komunikaciju Běłho domu John Kirby. Swědkojo rozprawjeja stajnje zaso wo wulkich potajnych trutach na nócnym njebju.
Grit Lemke reaguje na přinošk wědomostnikow Serbskeho instituta
Wjeseli mje, zo je so nastupajo prašenja kolonizacije a indigenity Serbow něšto podobne kaž debata wuwiwała, kotruž po mojim měnjenju nuznje trjebamy a kotruž bych sej tež w delnjoserbskich medijach přała. Interview ze sobudźěłaćerjemi resp. sobudźěłaćerkami Serbskeho instituta (14. nowembra), kotryž je debaće polěkowała, pak je mje chětro zadźiwał. Někotre wažne znapřećiwjenja su so w Serbskich Nowinach hižo wozjewili. Někotre dypki chcu wudospołnić. Kaž Robert Lorenc, kotrehož sej wulce wažu, rěču tež ja jako europska etnologowka. Sym na samsnym instituće kaž wón promowowała a tam předewšěm nawuknyła, zo woznamjenja wědomosć kompleksnosć, rozestajenje měnjenjow a diskurs. Za wšěm tym w interviewje podarmo pytam. Město toho so sugeruje – spodźiwneho razu w najrjeńšej jednohłósnosći wšěch interviewowych partnero(k)ow –, zo njejedna so wo nahlady, ale wo wěste wědomostne wěrnosće. Tole mam w postfaktiskej dobje, w kotrejž so hustodosć mjez měnjenjom a faktom njerozeznawa, za problematiske.
Rumunsku a Bołharsku přiwzali
Brüssel (dpa/SN). Bołharska a Rumunska přistupitej wot lěta 2025 dospołnje Schengenskemu rumej bjez pomjeznych kontrolow. Hižo wot měrca 2024 su kontrole na lětanišćach a w přistawach zběhnyli. Nětko je tež nadróžny wobchad do wobeju krajow bjez kontrolow móžny. Tole zdźěla Madźarska, kotraž tuchwilu předsydstwo Rady EU wukonja, po jednohłósnym wobzamknjenju wšitkich 27 čłonskich krajow EU.
UNO žada sej přiměr w Gazy
New York (dpa/SN). Hłowna zhromadźizny UNO žada sej z rezoluciju hnydomny a trajacy přiměr bjez kóždych wuměnjenjow w Gazaskim pasmje kaž tež hnydomne pušćenje wšěch w pasmje jatych zastajencow. Němska je zhromadnje z 157 dalšimi čłonami w New Yorku za naćisk rezolucije hłosowała. Dźewjeć krajow bě přećiwo tomu, mjez nimi USA a Israel. Rezolucije hłowneje zhromadźizny UNO njejsu zawjazowace, maja pak wulki symboliski wuznam.
Weil: Jednanja sprostnjene
Zwjazkoweho prezidenta Franka-Waltera Steimeiera su wčera w stolicy ...
Berger nastupi přećiwo Kretschmerej
Drježdźany (dpa/SN). Čłon Swobodnych wolerjow Matthias Berger chce 18. decembra přećiwo ministerskemu prezidentej Michaelej Kretschmerej nastupić a žada sej politiski nowozapočatk w Sakskej. W rozmołwje z nowinarjemi Berger rozłoži, zo njemóže hižo „dale kaž dotal“ Kretschmera akceptować. „Sakska trjeba politiski nowozapočatk bjez wumjezowanja“, 56lětny Berger rjekny. Wón bě štyri lěta dołho wyši měšćanosta w Grimmje. Ma njewotwisne knježerstwo fachowcow za najlěpše rozrisanje. Z tym nastupi nimo Kretschmera (CDU) hišće dalša wosoba w boju wo najwyše zastojnstwo Sakskeje.
Berger potwjerdźi, zo ma politiske połoženje w Sakskim krajnym sejmje za „kompletnje skepsane“. Tam jedna so jenož hišće wo „stronsku politiku a zachowanje mocy“. Při wólbach ministerskeho prezidenta spušća so Berger na podpěru AfD, BSW a njespokojnych zapósłancow CDU, kotřiž su wot tuchwilneho krajneho knježerstwa přesłapjeni.
Mario Voigt jako premier woleny
Erfurt (dpa/SN). Politikar CDU Mario Voigt je nowy ministerski prezident Durinskeje. 47lětny je dźensa w krajnym sejmje w Erfurće hnydom w prěnim wólbnym kole trěbnu absolutnu wjetšinu hłosow měł, byrnjež jeho nowa koalicija CDU, BSW a SPD tam žanu swójsku wjetšinu njedocpěła.
Móžno tole bě, dokelž je so po wšej Němskej prěnja tak mjenowana koalicija ćernjowki hišće do posedźenja sejma z Lěwicu dojednała. Tak njebě wukónc wólbow wot AfD z jeje předsydu Björnom Höcke wotwisny. Lěwica je připowědźiła, zo chce za Voigta hłosować. „AfD njesmě žane jewišćo dóstać“, rjekny frakciski šef Lěwicy Christian Schaft.
Při wólbach ministerskeho prezidenta hłosowaše w prěnim kole 51 zapósłancow za Voigta, 33 přećiwo njemu, štyrjo so hłosa wzdachu. Koalicija Voigta ma w krajnym sejmje jenož 44 z cyłkownje 88 mandatow. Tajneho wothłosowanja w kabinach dla njeje tuž jasne, hač njeje Voigt tež hłosy AfD dóstał. AfD je ze 32 zapósłancami najsylniša frakcija.
„Njesměmy so wróćo sćahnyć“
Minister Pistorius za sylniše zasadźenje Němskeje na Bliskim wuchodźe
Bagdad (dpa/SN). Zakitowanski minister Boris Pistorius (SPD) chce po powalenju dotalneho režima w Syriskej połoženje na Bliskim wuchodźe stabilizować. Na kromje knježerstwowych rozmołwow w Iraku přilubi politikar SPD sylniše zasadźenje Němskeje, jeli sej kraje regiona tole přeja. Hladajo na polóženje w Syriskej Pistorius rjekny, zo móhł sej zhromadne dźěło z nowymi mócnarjemi pod wěstymi wuměnjenjemi předstajić.
„W přichodnych měsacach dyrbimy nowe formaty wěstotneje kooperacije zdźěłać, zo móhła tež Němska zamołwitosć přewzać, runje hladajo na Syrisku“, wón měni a doda zo tole „spektrum nadawkow jasnje rozšěrja“.
