Berlin (dpa/SN). Zwjazkowy financny minister Christian Lindner (FDP) je CDU/CSU w zwadźe wo paket rozrosta blokadu wumjetował. Lindner rjekny po posedźenju posrědkowanskeho wuběrka Zwjazkoweje rady a zwjazkoweho sejma, zo trjeba hospodarstwo Němskeje nuznje nowe impulsy. CDU a CSU pak so tutomu žadanju spjećujetej. Unija sej žada, zo knježerstwo planowane šmórnjenje subwencijow ratarskeho diesela cofnje. Tuž je dale wotewrjene, hač móže Zwjazkowa rada paket rozrosta 22. měrca schwalić.
Lauterbach lubi wjace pjenjez
Berlin (dpa/SN). W zwadźe wo wjace transparency za pacientow a financne stabilizowanje chorownjow su rozrisanje namakali. Posrědkowanski wuběrk Zwjazkoweje rady a zwjazkoweho sejma je wobzamknył, blokowany zakoń tola nałožować. Minister za strowotnistwo Karl Lauterbach (SPD) připowědźa wjace pjenjez za chorownje a lěpši přehlad wo jich kwaliće. Tak móhli dalšim insolwencam zadźěwać. Za reformu chorownjow připowědźa minister „fonds transformacijow“ wjacorych miliardow eurow.
Přećiwo legalizowanju
Augsburg (dpa/SN). Konflikt mjez katolikami Němskeje a Vatikanom nastupajo reformy w cyrkwi so přiwótři. Krótko do kónca nalětnjeje hłowneje zhromadźizny Němskeje biskopskeje konferency dźensa w Augsburgu je prezidentka Centralneho komiteja katolikow Němskeje ZdK, Irme Stetter-Karp potwjerdźiła, zo nochcedźa sej lajkojo sobupostajowanje wzać dać. „Wězo w gremijach wo přichodnych kročelach wuradźujemy. Chcu pak biskopam hižo nětko jasnje mjezu zhromadneho dźěła pokazać“, rjekny Stetter-Karp powěsćerni dpa. „Jako prezidij ZdK na tym wobstawamy, zo je naš zaměr zhromadne wuradźowanje a wobzamknjenje. Za ryzy poradźowanje – a pozdatnu synodalitu – njestejimy hižo k dispoziciji.“
New Delhi (dpa/SN). W Indiskej je so konflikt mjez protestowacymi ratarjemi a wěstotnymi mocami dale přiwótřił. Dźesaćitysacy burow su wčera na wuslědk dalšeje rozmołwy mjez nawodnikami demonstrantow a indiskim knježerstwom čakali. Burja žadaja sej garantowane płaćizny za swoje wudźěłki a wjace pjenježneje podpěry.
Ratarjo čakachu po informacijach medijow při barikadach betonowych blokow, železnych elementow a druhich wěcow, z kotrymiž běchu woni dróhi do směra na indisku stolicu New Delhi zaraćili. Ratarjo mějachu bagry, měchi pěska, rukajcy a nahubniki sobu. Wěstotne mocy běchu z elektriskimi šokowymi nastrojemi, sylzopłunom a maskami wuhotowane. Pječa su z trutami sylzopłun na demonstrantow mjetali. Protestowy pochod na New Delhi běchu ratarjo hižo minjeny tydźeń zahajili. Policisća běchu jón stajnje zaso ze sylzopłunom zadźerželi. Po wjacorych njewuspěšnych rozmołwach ze zastupnikami knježerstwa běchu ratarjo rozsudźili, zo z maršom do stolicy pokročuja. Protest wotměje so něšto měsacow do wólbow parlamenta.
Priwatny stawk šofera nakładneho awta na parkowanišću je zasadźenje policije zawinował. Předewzaćel wozydłownistwa bě policiju wo pjanym šoferu na parkowanišću w Ottendorfje-Okrilli informował. Zastojnicy nadeńdźechu woprawdźe 52lětneho pólskeho šofera, kiž měješe wjace hač dwě promile alkohola. Jěć pak wón nochcyše, dokelž swojeho šefa dla stawkowaše, kaž sam rjekny.
Sta litrow piwa na dróze a hromady črjopow: Nakładne awto je wčera po puću na awtodróhu 70 w hornjofrankskim Kulmbachskim wokrjesu sta piwowych kašćikow zhubiło. Rumowanje traješe po informacijach policije wjacore hodźiny. Palety piwa běchu so w křiwicy suwać započeli, přełamachu wobhrodźenje připowěšaka a padnychu na dróhu. Kontrola wunjese, zo njebě piwo porjadne přiwjazane. Škoda wučinja 35 000 eurow.