To a tamne (19.04.23)
Chětro sylnje wonjacy durian – z Aziskeje pochadźacy płód – je w Mnichowje zasadźenje wohnjoweje wobory zawinował. Pomocnikow běchu wołali, dokelž w běrowowym a nakupowanskim kompleksu za płunom wonješe. Před płunom warnowace nastroje njereagowachu. Najebać to pomocnicy dom přeslědźichu a skónčnje sylnje wonjacy płód namakachu. Tón drje bě alarm zawinował.
Pozdatna ručna granata je na Hannoverskim hłownym dwórnišću chaos zawinowała. Sobujěduca bě policiju informowała, zo je žona granatu mjez sedłami połožiła a ćah wopušćiła. Policija je na to nastupnišća ewakuowała a dźěl hłowneho dwórnišća zaraćiła. Fachowcy za znješkódnjenje municije „granatu“ skónčnje namakachu: Jednaše so wo bateriju za nabiwanje elektriskich nastrojow, tak mjenowanu powerbank.
To a tamne (18.04.23)
Móšeń, w kotrejž bě na wšě tysac eurow, je muž w južnej Hessenskej namakał a policiji přepodał. 70lětny bě pjenjezy njedźelu rano na dwórnišću w Groß-Rohrheimje na ławce wuhladał, policija zdźěla. Starc nochcyše žane myto za portmonej měć, w kotrymž běchu nimo pjenjez tež wosobinske dokumenty a pjenježna karta. Policija móžeše móšeń „zbožownemu“ wobsedźerjej wróćić.
Najnowši magacin „Playboy“ su w Francoskej předawali kaž ćopłe całty: W nim steješe tónkróć statna sekretarka Marlène Schiappa (40) w srjedźišću. W běhu třoch hodźin bě 100 000 eksemplarow rozpředatych. Nětko chcedźa dalšich 60 000 ćišćeć. Byrnjež do toho znate było, zo njebudźe so Schiappa naha pokazać, bě zajim njesměrnje wulki. W rozmołwje wotmołwja wona na wosobinske a intimne prašenja w zwisku z politiku.
To a tamne (17.04.23)
Kónc njewšědneho pospyta: Po 500 dnjach dobrowólneje izolacije je 50lětna Španičanka Beatriz Flamini swój kwartěr w 70 metrow hłubokej prózdnjeńcy w južnošpaniskej prowincy Granada wopušćiła. Slědźerka prózdnjeńcow chcyše zwěsćić, kak ćěło samotnosć pod zemju znjese. Nimo toho chcyše wona nowy swětowy rekord nastajić. Italčanka Christine Lanzoni bě lěta 2007 na wšě 269 dnjow pod zemju wutrała. Po nawróće chcyše Flamini – prěni króć po 500 dnjach – najprjedy raz dušować.
Po 24 hodźinach su wohnjowi wobornicy w zwjazkowym staće USA Floridźe kruwu z błóćaneje dźěry wuswobodźili, do kotrejež bě wona padnyła. Dospołnje wučerpane zwěrjo móžachu pomocnicy skónčnje wućahnyć, dźakowano wobornikam, kotřiž běchu „za wuchowanje wosebje wulkich zwěrjatow“ wukubłani.
To a tamne (14.04.23)
Kradnjene črije na policajskej straži wotedał je paduch w bayerskim Tirschenreuthće. Do toho bě wón we wobchodźe za twarske maćizny dźěłanske črije wuspytał a so z nimi na nohomaj z wobchoda zminył. Stare črije wostaji stejo. Sobudźěłaćerjo wobchoda móžachu pak jeho z pomocu awtomatiskeje kamery identifikować. Jako muž wot susodow zhoni, zo policija za nim pyta, so na policajskej straži přizjewi. Zastojnicy kradnjene črije sćazachu – a mužej stare přepodachu.
Při wohenju w infračerwjenej sawnje na kromje Mnichowa stej so dwě wosobje z kurom zajědojćiłoj a dyrbještej do chorownje. Elektriska sawna bě so z dotal njeznateje přičiny zapaliła, jako chcyše ju 57lětna žona prěni króć scyła wužiwać. Fachowcy tukaja na techniski defekt. Škodu w dospołnje zasazenym bydlenju trochuja na dźesaćtysacy eurow.
To a tamne (13.04.23)
Hněwajo so na bywšeho podružnika je wobsedźer domu w bayerskim Rammingenje wobsydstwo muža, kotrež po poł lěće přeco hišće w bydlenju ležeše, na wjacorych městnach w měsće wotpołožił a podružnikej daty pósłał, hdźe wěcy leža. Te wšak běchu spěšnje namakane, mjez druhim wot ludźi, kotřiž policiju wo namakankach informowachu. Policija před tajkimi akcijemi warnuje, pokazujo tež na prawniske konsekwency.
Stražu zwjazkoweje policije w Frankfurće nad Wódru je sej muž wupytał, zo by tam swój mobilny telefon nabiwał – a přińdźe na to do jastwa. Zastojnicy zwěsćichu, zo za mužom wjacorych njeskutkow dla z wukazom zajeća pytaja. Nimo toho je pólskemu staćanej zakazane, do Němskeje přińć. Zastojnicy dowjezechu 37lětneho do jastwa. Swój mobilny telefon muž w jastwje wužiwać njesmě.
To a tamne (12.04.23)
Zatłusnjena wjewjerčka je jutry póndźelu w Dortmundźe zasadźenje wohnjoweje wobory zawinowała. Žona bě při přechodźowanju zwěrjo we wěku gullyja wuhladała. Podarmo wona spyta, wjewjerčku sama wuswobodźić. Na to wołaše wohnjowu woboru. Pomocnicy mějachu swoju lubu nuzu, dokelž „njebě rozpjeršena wjewjerčka kooperatiwna“. Skónčnje so akcija tola poradźi. Mały hrymzak zminy so na přichodny štom.
Z wjace hač 200 km/h je šofer w Badensko-Württembergskej spytał, so kontroli policije wuwinyć. Skónčnje jeho zastojnicy na štomje zajachu. 48lětny bě na nócnej honjeńcy zdźěla bjez swěcy jěł a njejapce borzdźił, zo by zražku z policajskim awtom prowokował. Na kóncu muž pěši ćěkaše. Helikopter policije jeho skónčnje na štomje sedźo wuhlada, sobujěducy chowaše so w kerku. Muž bě wopity.
To a tamne (11.04.23)
Mjeztym hižo třeći raz je so 78lětna žona w USA do banki zadobyła. Kaž nowina The Kansas City Star nětko rozprawja, je ju policija po tym zajała. Minjenu srjedu bě wona maskěrowana do banki zastupiła, za pjenjezami žadała a so pola přistajeneje zamołwiła, dokelž je ju tak nastróžiła. Jako ju zastojnicy na parkowanišću lepichu, zwěsćichu, zo bě staruška trochu wjele alkohola piła. Po rozprawje nowiny bě 78lětna hižo raz w lětomaj 1977 a 2020 spytała banku wurubić. Hakle loni nazymu je na pruwowanje wusadźene chłostanje kónčiło.
Z přetwarjenym kófrom ze złotom w hódnoće 24 000 eurow je muž spytał do Indiskeje zapućować. Tak je wón dźěle kófra kaž na přikład šruby ze złota wuhotował, informowaše wčera indiska powěsćernja ANI. Cłownicy pak su wobšudnistwo pytnyli.
To a tamne (06.04.23)
Dokelž njeměješe 11lětna holca prawdźepodobnje wjace lóšt, ze swójbnym psom so wuchodźować, je wona psa prosće bjez wědźenja staršeju cuzemu na dróze předała. Nan holcy přizjewi pad policiji. Minjenu póndźelu bě holca w Landshuće z Yorkshire-terrierom po puću a narěča cuzeho, hač chce psa za něšto stow eurow kupić. Nimo rjaneho fenka pak ma 11lětna wulke mjerzanje ze staršimaj, kotrajž nětko za njeznatym kupcom pytataj. Policija jimaj pomhać njemóže.
Pilot w Južnej Africe dožiwi na lěće 3 300 metrow wysoko njeluboznu překwapjenku. Dokelž bě pytnył, zo so jeho naraz něšto „zymneho“ dótkny, wuhlada pod swojim sydłom jědojtu kobru. Pilot so tuž rozsudźi spěšnje na přichodnym lětanišću přizemić. Wón a štyrjo pasažěrojo mjeńšeje mašiny móžachu so wuchować. Njelubozny hósć, kobra, wšak bě so mjeztym zminył.
To a tamne (05.04.23)
Dokelž chcyše muž w Praze přitulnu atmosferu w swojej bydlenskej stwě měć, je na swojim telewizoru widejo kaminoweho wohenja nastajił. Kedźbliwy susod pak zawoła wohenja w stwě dla wohnjowu woboru, kotraž je hnydom reagowała a jězdźidło na přizjewjene městno pósłała. Kaž wobornik w stolicy Čěskeje wčera zdźěli, wšak bě to njetrjebawši alarm. Přiwšěm chwala sej tajkich kedźbliwych susodow, wšako móhło tomu tež hinak być.
Betty Buckland w šotiskim Edingburgh je sej nětko són spjelniła. Zhromadnje z nazhonitym pilotom je 93lětna hišće raz sama z lětadłom lećała. Z 240 kilometrami na hodźinu a 600 metrow wysoko zemje lećeć bě jej wulkotne dožiwjenje. Buckland njeje prěni raz za wodźidłom lětadła sedźała. W lěćnych prózdninach přebywaše často pola přiwuznych w USA, hdźež měješe z kuzenkom móžnosć lećeć.
To a tamne (04.04.23)
Policija měješe 77lětneho muža dla trochu dlěšu honjeńcu. W Braniborskej bě wón njezbožo zawinił a z městna njeskutka přez Saksko-Anhaltsku do Sakskeje ćeknył. Na zwjazkowej awtodróze A 9 blisko Lipska su zastojnicy jeho skónčnje zadźerželi, policija dźensa zdźěli. Tola 77lětny nochcyše so podwolić a hrozyše z rozbuchlinu, kotryž měješe w dwěmaj kófromaj w awće. Kaž so wukopa, tomu tak njebě. Muža dowjezechu skónčnje do psychiatriskeje chorownje.
Kuntwory su najwjac ludźom w lěću njepřećel. Tola Doreen Werner z Leibnizoweho centruma w Müncheberg so tele dny jara wjeseli. Kuntwory maja lětsa dobre wuměnjenja so wuwiwać. Tak lubuja włóžnotu a ćopłotu. Dešća drje mějachmy w nalěću dosć a tuž móža jejka we łužach abo włóžnej zemi wotkładować. Nětko su hišće ćopliše temperatury trěbne.
