To a tamne (19.07.22)
Pospytane wotstronjenje wosaceho hnězda je w juhopfalcskim Bellheimje zasadźenje wohnjoweje wobory zawinowało. 39lětny bě spytał, wosy pod třěchu domskeho z bunsenowym palakom wućěrić. Při tym so hnězdo zapali. Přiwołana wohnjowa wobora móžeše woheń zhašeć, prjedy hač tón třěchu wobškodźi. Zamołwići wotradźa, hnězda sami wotstronić. Lěpje je, fachowcow přiwołać.
Kedźbliwy psyk je we Winsenje pola Hannovera wjetšemu wohenjej zadźěwał, swojemu wobsedźerjej pak skóržbu wunjesł. Muž bě woheń w železnym sudobju bjez dohladowanja palić dał, policija zdźěla. Na to so pódla sudobja ležace drjewo zapali. Hakle přez šćowkanje psa so na to dohlada. Susodźa wołachu wohnjowu woboru, kotraž płomjenja podusy. Při tym zwěsćichu, zo paleše so w sudobje wobarbjene drjewo, štož njeje dowolene.
To a tamne (18.07.22)
Pozdatnje znjezboženy parašutist je w sauerlandskim Altena zasadźenje specialistow wohnjoweje wobory za wuchowanje we wulkich wysokosćach zawinował. Swědcy běchu při tamnišim spjatym jězoru błyšćacy so objekt při nahłej skłoninje wuhladali. Dokelž njebě teren bjeze wšeho přistupny, wołachu fachowcow z Dortmunda. Ći zwěsćichu, zo jedna so wo chětro wulki powětrowy balon.
Dwanaće lět stary hólc z Indiskeje je swětowe mišterstwa w ličenju z hłowy dobył. Aaryan Shukla je so wčera w Paderbornje přeciwo 34 konkurentam z 18 krajow přesadźił. Slědowaštaj Japančan Ono Tetsuya a Mohammed El Mir z Libanona. Wobdźělnicy dyrbjachu wjacore nadawki spjelnić. Mjez druhim dyrbjachu dźesać dźesaćcyfrowych ličbow hromadu ličić abo dwě wosomcyfrowej ličbje we hłowje multiplikować.
To a tamne (15.07.22)
Elektriski roler z móžnej maksimalnej spěšnosću 120 km/h je policija w Šwicarskej sćazała. Twarjene su e-scootery poprawom jenož za 20 km/h. Jězdźidło bě policistam napadnyło, dokelž njebě swěca w porjadku. Při dokładnej kontroli so wukopa, zo je w roleru motor z 4 000 wattami zatwarjeny město dowolenych 500 wattow. 23lětneho wodźerja jězdźidła su wobskoržili.
Žarowacu wowcu je policija ze železniskich kolijow w šwabskim Tapfheimje njesć dyrbjała, dokelž njeje so zwěrjo hinak z blaka hibnyło. Wowca steješe spočatk tydźenja při kolijach poboku dweju wowcow, kotrejž bě ćah přejěł a morił. Policist wza zwěrjo skónčnje na ramjo a je wotnjese. Wowcu su najprjedy raz na bliskim statoku zaměstnili. Lokomotiwnicy běchu policistow wo wowcy w susodstwje kolijow informowali.
To a tamne (14.07.22)
Liška je so do zarjadnistwa Berlinskeho senata zabłudźiła. Zwěrjo sedźeše wčera před zarjadom za integraciju, dźěło a socialne w Kreuzbergu a nóžkowaše potom po twarjenju hač do najwyšeho poschoda, senat zdźěla. Sobudźěłaćerjam so poradźi, lišku změrować a do kartona tyknyć, kotryž přepodachu policiji. Ta dowjeze zwěrjo ke skótnemu lěkarjej. Liški so w Berlinje derje rozmnožeja.
Wupyšeny pas swětoweho pjasćowarskeho mištra, kiž bě zemrěty južnoafriski prezident Nelson Mandela něhdy wot pjasćowarskeje legendy Raya Leonarda dóstał, su z muzeja w Južnej Africe pokradnyli. Pas, kotrehož hódnotu trochuja na 3 000 eurow, su njeznaći z muzeja Mandela House Museum w Soweto spakosćili. W domje bě Mandela wot 1946 hač do 1962 bydlił. W nim chowaja wosobinske wěcy bywšeho prezidenta.
To a tamne (13.07.22)
Z dwanaće lětami masterski studij wotzamknył je wulce inteligentny Laurent Simons. W runje jednym lěće je belgisko-nižozemski hólc studij fyziki na uniwersiće w Antwerpenje zmištrował, uniwersita zdźěla. Maturu bě Laurent hižo z wosom lětami zakónčił. Po tym studowaše wón elektrotechniku. Spočatk lěta wobdźěli so wón na slědźenskim projekće Mnichowskeje uniwersity k wuslědźenju nowych srědkow přećiwo rakej.
Zwada mjez šoferom taksija a sobujěducymi je w juhohessenskim Mörfelden-Walldorfje zasadźenje policije zawinowała. 42lětny šofer bě třoch pasažěrow w starobje 22 a 23 lět namołwjał, z awta wulězć, po tym zo běchu so płaćizny dla zwadźili. Na to dwaj młodostnaj awto wobškodźištaj, načinjejo škodu wjacorych tysac eurow. Dóńdźe tež k ćělnym rozestajenjam. Policija pad přepytuje.
To a tamne (12.07.22)
Při skomolenej rubježniskej turje bu paduch w sewjerorynsko-westfalskim Windecku pod wrotami zatłusnjeny a dyrbješe bjezpomocny na policiju a wohnjowu woboru čakać. Pomocnicy jeho wuswobodźichu a policiji přepodachu. 24lětny bě so zhromadnje z kumpanom do hale składźišća zadobyć chcył. Mužojo stłóčichu wrota tak wysoko, zo móžeše so jedyn z njeju předrěć. W tym wokomiku pak so wrota začinichu a muža zatłusnychu. Kumpan so zminy. Susod słyšeše spodźiwne zwuki a zazwoni policiju.
Dospołnje pjany a po seklojtej čarje je šofer taksija w Kölnje swojich pasažěrow po měsće wozył. 64lětny bě policistam napadnył, dokelž měješe wočiwidnje ćeže, runjewon jěć. Při kontroli alkohola zwěsćichu skónčnje 2,5 promilow. Jězbnu dowolnosć a licencu za woženje hosći zastojnicy nablaku sćazachu.
To a tamne (11.07.22)
Papagaj je minjeny kónc tydźenja w münsterlandskim Werne prawdźepodobnje paduchow wućěrił. Kaž policija zdźěla, běchu skućićeljo hižo škleńcu chěžinych duri jednoswójbneho domu rozbili, jako so něšto njewočakowaneho sta. Wočiwidnje běchu papagaja budźili, kiž móže „halo“ a „na ty“ prajić. Po dotalnym stawje su so paduši bjez rubizny zaso zminyli. Papagaj dźeń po tym policistow, kiž chcychu pad dokumentować, tohorunja z „halo“ a „na ty“ witaše.
Hłódny paduch, kotrehož běchu w badensko-württembergskim Stimpfachu w cuzym domje při pječenju kołbasy lepili (SN rozprawjachu) je so dźeń po tym na městno njeskutka nawróćił, hdźež móžachu jeho zajeć. Wobydlerka bě policiju informowała, zo w jeje zahrodźe cuzy muž spi. Zastojnicy zwěsćichu, zo jedna so wo paducha z cuzeho domu.
To a tamne (08.07.22)
Pječena jatrowa pasteta je paducha w cuzym domje w Badensko-Württembergskej přeradźiła. Muž bě so přez wokno w delnim poschodźe do bydlenskeho domu w Stimpfachu zadobył a sej tam rjenje zarjadował. Spočatnje spřihotowa sej městno k spanju, potom dušowaše a dźěše do kuchnje w delnim poschodźe. Jako mjaso pječeše, wobydlerjej w delnim poschodźe wotućištaj. Hłódny paduch so zminy. Policija podarmo za nim pytaše a nadźija so swědkow.
Curryjoweje kołbasy dla staj so hósć a korčmar w piwowej zahrodźe w Neu-Ulmje zwadźiłoj. 56lětny hósć bě so spjećował, kołbasku zapłaćić, policija zdźěli. Pinčnik bě jemu město čerwjeneje kołbasy z kožu běłu bjez kože přinjesł. Mužej so tak dołho wurěčowaštaj, doniž policiju njezawołachu. Tola tež zastojnicy njemóžachu problem rozrisać.
To a tamne (07.07.22)
Ze swojim žiwjenjom zapłaćił je běły kenguru wulět po awtodróze 44 pola Mönchengladbacha. Dokelž njeje so policistam poradźiło, stajnje zaso ćěkace eksotiske zwěrjo popadnyć, dyrbjachu hajnika přiwołać. Tón pak třělbu za pohłušenje njeměješe a so tuž rozsudźi, kenguruwa zatřělić. Kaž so wukopa, bě zwěrjo z priwatneje ležownosće twochnyło.
Po jenož 25 dnjach je ekstremny sportowc Joseph Heß w Rynje płuwajo swój zaměr docpěł a po 1 200 kilometrach Rotterdam nad Sewjernym morjom docpěł, w rekordnym času. Něhdźe dźesać hodźin je hospodarski inženjer z Kamjenicy wšědnje we wodźe był. Dokelž njeběchu jemu dowolili, w Rotterdamje płuwać, dowjezechu jeho w motorowym čołmje po měsće. Poslednjej dwaj kilometraj hač k Sewjernemu morju Heß sam płuwaše, přewodźany wo wodoškitneje policije.
