To a tamne (06.03.23)
Poprawom bě w Hamburgu připowědźene, zo maja so zawčerawšim drasty markow darmotnje zajimcam rozdźělić. Powěsć je so po socialnych medijach rozšěriła a wjele młodostnych je wězo přišło. Kaž so na městnje wukopa, bě powěsć wopačna. Dokelž běchu přitomni přesłapjeni, započinachu randalěrować. Młodostni přichwatanych zastojnikow samo nadběhowachu. Kaž policija informuje, dotal jasne njeje, štó je wopačnu powěsć w interneće rozšěrił.
W składźišću za twarožk su so w Šwicarskej něhdźe 11 000 twarožkowych pokrutow zničili. Přičina njezboža minjeny štwórtk južnozapadnje Berna je njeznata. Něhdźe połojca twarožka słušeše towaršnosći Migros. Přiwšěm budźe w kupnicach Migros přichodnje dosć šwicarskeho twarožka Gruýere k dispoziciji, rěčnik towaršnosće kupcow změruje.
To a tamne (03.03.23)
To a tamne (02.03.23)
Přewšo zajimawy astronomiski zjaw je hišće hač do dźensa wječora na njebju widźeć: „Napřemoběh jaskraweju hwězdow našeho słónčneho systema Jupitera a Venus. Minjene dny běštej so hwězdźe wšědnje zbližiłoj. Dźensa ma Venus Jupitera „přesćahnyć“. Změna pozicije zwisuje ze zemskej perspektiwu na słónčny system. We woprawdźitosći stej wobě hwězdźe daloko wot so zdalenej.
Lód ze sušenymi insektami poskićuja wot najnowšeho w lodarni w badensko-württembergskim Rottachu nad Neckarom. Wumyslił je so njewšědnu kreaciju 33lětny předewzaćel Thomas Micolino. W swojim wobchodźe při hłownym torhošću historiskeho stareho města zbudźa wón tak wjele kedźbnosće. Přiwšěm dóstanješ tam tež cyle normalny lód.
To a tamne (01.03.23)
Pasant w Podstupimje je zawčerawšim spytał, dweju rubježnikow zadźeržeć. Do toho běštej we wobchodźe juwele pokradnyłoj. Rubježnikaj chcyštaj poprawom spěšnje twochnyć, tola pasant so jimaj do puća stupi. Jednoho rubježnika je wón kruće dźeržał, tola skónčnje móžeše so wuwinyć. W šmjatańcy z pasantom pak je rubježnik nimo juwelow tež hamor, titku a jedyn čriji zawostajił. Kriminalna policija pad nětko přepytuje.
Na dowolowej kupje Mallorca bědźachu so minjene dny ze sněhom, kiž je zymska nižina z mjenom „Juliette“ wobradźiła. Nětko pak warnuja meteorologojo před powodźenjemi a sylnym wichorom. Dowolnicy a domoródni měli tuž w domach wostać.
To a tamne (28.02.23)
Dlěje hač 30 lět bě muž ze Schwerina bjez jězbneje dowolnosće awto jězdźił. Dokelž bě wón přehnawał, jako je druhe jězdźidło přesćahnył, je so tole skónčnje wukopało. Kaž policajska rěčnica minjeny štwórtk zdźěli, jedna so wo 57lětneho muža, kiž bě 6. februara blisko hrodu ze swojim awtom po puću. Jako jeho druhi šofer přesćahny, dóńdźe k zražce, na kotrejž ma 57lětny snadnu sobuwinu. Při přepytowanju njezboža wón hišće potwjerdźi, zo nima jězbnu dowolnosć sobu. Pozdźišo policija zwěsći, zo dyrbješe muž papjery hižo w lěće 1992 wotedać.
Lětuša zyma w Němskej bě po słowach meteorologow znowa jasnje přećopła. To je dwanata ćopła zyma zasobu.
To a tamne (27.02.23)
Na tropiskim sewjeru Awstralskeje je hoberski krokodil muža při rěce nadběhował a na to jeho psa morił. Ataka bě minjenu srjedu w Bloomfieldźe w zwjazkowym staće Queensland, hdyž je 37lětny při rampje za čołmy ze swojej psycu „Magic Molly“ šoł, kaž powěsćernja AAP rozprawješe. Rangerojo su 4,2 metraj dołhi reptil štwórtk wječor 200 metrow wot městna nadpada namakali a zatřělili, dokelž běše „inakceptabelne riziko“.
Dźiwadźelnica Heike Makatsch podawa nětko tež yoga-hodźiny w Berlin-Charlottenburgu. Tydźensce jónu wona wuwučuje wotměnjejo so z dalšej wučerku, kaž yoga-studij minjeny pjatk na Instagramje piše. Po tym je Makatsch tam w lěće 2021 zakładne wukubłanje absolwowała. Tuchwilu wona swoju wědu w natwarnym wukubłanju pohłubša. Z yoga je kluč do wjace hač jenož ćělneje strowoty namakała, dźiwadźelnica měni.
To a tamne (24.02.23)
Swoje dźěćo je mać na socialnym zarjedźe w Berlin-Neuköllnje porodźiła. Dokelž hižo dwě dźěsći ma a jej hrozy bydlenje zhubić, dóstanje nětko wosebitu pomoc wot zarjada. Žona bě wutoru w prawidłownej rěčnej hodźinje wo strowotniskich problemach skoržiła. Krótko na to su hrona započeli. Hdyž nuzowy lěkar přichwata, je hłójčka hižo widźeć była. Kaž sćelak RBB rozprawješe, traješe porod 15 minutow. Mać a ćěšenk do chorownje dowjezechu, jimaj so derje dźe.
Zmylk druheho šofera při přesćěhowanju je so zahubnje za muža w Schwerinje wuskutkował. Tón bě wjace hač 30 lět bjez jězbneje dowolnosće jězdźił. 57lětny bě 6. februara blisko hrodu z awtom po puću. Hdyž druhi šofer jeho přesćěhaše, sta so njezbožo z pječa snadnej sobuwinu Schwerinjana. Při zwěsćenju njezboža rjekny zastojnikam, zo papjery sobu nima. Policija na to zwěsći, zo bu jemu 1992 jězbna dowolnosć na přeco sćazana.
To a tamne (23.02.23)
Młodostny z Bangladeša je so po njewotpohladanej jězbje we łódźnym kontejneru zaso do domizny nawróćił. 16lětny njeje so při chowance z přećelemi w januarje z kontejnera na łódźi w Chittagongskim přistawje wuswobodźić móhł, rjekny sobudźěłaćer wonkowneho ministerstwa w Dhaka powěsćerni dpa. Po wjacorych dnjach na morju su hólčeca w Malajziji zesłabjeneho w swojim kontejneru našli. Wottam su jeho do kliniki dowjezli, hdźež bu hladany.
Po spektakularnym zadobyću do drohotneje butiki w nutřkownym měsće Hamburga su 48lětneho na Essenskim hłownym dwórnišću zajeli. Muž je njeskutka nuznje podhladny, zdźěli wčera policija w Hamburgu. Po přepytowanjach je z kradnjenym awtom loni 18. oktobra rano do wukładneho wokna nobel-wobchoda jěł a na to drohe toboły spakosćił.
To a tamne (22.02.23)
Najlěpše sambašule Rio de Janeira su na kóncu swětoznatych ćahow w Sambodromje brilěrowali. Šěsć top-šulow ćehnješe na poslednim dnju wubědźowanja hač do wutorneho zaheho ranja z kostimami bjez mjezy, spektakularnymi wozami a inowatiwnymi wosebitymi efektami po stadionje samby z wjace hač 70 000 přihladowarjemi. Mnohe sambašule su swoje ćahi tež historiskim brazilskim temam abo figuram wěnowali. Tak je šula „Paraíso do Tuiuti“ stawiznu prěnjotnje z Indiskeje pochadźacych buwołow na kupje Marajó powědała.
Mału holčku, kotraž bě so po raznym zemjerženju w Syriskej pod rozwalinami narodźiła, staj jeje ćeta a teje mandźelski adoptowałoj. „Wona budźe kaž jedne z mojich dźěći. Budu wšitko za nju činić“, rjekny nowy adoptiwny nan, Chalil Sawadi, wčera powěsćerni dpa. Ćeta a wuj mataj samaj štyri dźowki a dweju synow. Swójba je swoju chěžu při žałostnym rženju zhubiła a bydli nětko w stanje.
To a tamne (21.02.23)
Něšto měsacow do krónowanja Charlesa III. zahaji so předań suweněrowych artiklow. Britiske hornčerske předewzaće Emma Brigdewater liči z wulkim naprašowanjom za šalkami, talerjemi a čajowymi kanami. Motiw – krónu z lawom a jednorohačom jako znamjo britiskeje monarchije – z hubicowym kołkom nanjesu a potom z ruku wudebja. Krónowanje je 6. meje w Londonskej Westminster Abbey.
Druha wulka technoparada „Rave The Planet“ z dźesaćitysacymi wobdźělnikami je za 8. julija w Berlinje planowana. Hišće hač do kónca februara móža so zajimcy za wobdźělenje z wótřerěčakowym wozom požadać. Lětuše moto je „Music is the Answer“ (hudźba je wotmołwa). Parada ma demonstracija za zachowanje elektroniskeje hudźbneje kultury za měr na swěće być.
