To a tamne (23.05.19)

štwórtk, 23. meje 2019 spisane wot:

Njeznaći su kolesa awta šefrěčnika wusyłanja­ Tagesschau Jana Hofera wot­šrubowali a pokradnyli. Foto, kotrež bě Hofer w interneće wozjewił, pokazuje małe čorne awto w Hamburgskej štwórći Eimsbüttel bjez kolesow. Zo su sej paduši runje jeho Smart wupytali, 69lětneho dźiwa. Dale zady na hasy stejachu dróše limuziny: Porsche a samo Bentley. „To drje bě zaměrna skazanka.“ Hofer wužiwa nětko za jězbu na dźěło nětko taksi, doniž njeje awto sporjedźane.

Šěsć dźěći naraz je so minjenu póndźelu w Krakowje narodźiło. Po informacijach uniwersitneje chorownje, hdźež běchu lěkarjo dźěćatka z maćerneho žiwota wurězali, jedna so wo prěnje šěsćniki w Pólskej scyła. Staršej staj přewšo zbožownaj. Štyri holčki a dwaj hólcaj, kotrež narodźichu so hižo w 29. tydźenju samodruhosće, leža nětko w inkubatorach.

To a tamne (22.05.19)

srjeda, 22. meje 2019 spisane wot:

Přemało mnichow na wideju dla chcedźa w Thailandskej oficialny film wo narodnej hymnje znowa nawjerćeć. Premierminister Prayut Chan-o-cha je widejo skazał, kotryž pokazuje wjace mnichow, kak swoju wěru praktikuja. Film, hakle spočatk meje znowa nahrawany, pokazuje zastupjerjow wšelakich worštow thailandskeho ludu při spěwanju hymny. Buddhistiska organizacija je so na to hóršiła, dokelž­ su na wideju lědma mniša widźeć.

Wjace hač 300 hudźbnikow a skupin je so lětsa za požadanu dowolnosć hudźenja w New-Yorkskej podzemskej železnicy přizjewiło. Něhdźe 70 z nich změje składnosć, swoje hudźbne kmanosće komisiji předstajić. 20 skupin a jednotliwcow přiwozmu potom do kruha něhdźe 350 hudźbnych cyłkow, kotrež smědźa na 30 wuzwolenych podzemskich dwórnišćach koncertować, štož je 7 500 wustupow wob lěto.

To a tamne (21.05.19)

wutora, 21. meje 2019 spisane wot:

Runje narodźene dźěćo staj staršej w Hamburgu po puću z chorownje domoj w taksiju zabyłoj. Hakle po tym zo bě awto wotjěło, staršej to pytnyštaj. Ani šoferej taksija dźěćko njenapadny, dokelž kruće spaše. Po wobjedowej přestawce jědźeše wón k lětanišću po dalšeho pasa­žěra, a tón ćěšenka wuhlada. Policija móžeše jeho skónčnje dospołnje zadwělowanymaj staršimaj přepodać.

Za wodźidłom wusnjeneho šofera je policija w Nižozemskej lepiła, jako awtopilot elektrojězdźidło typa Tesla po nocy wodźeše. Dokelž jědźeše 50lětny napadnje wusko za dalšim awtom, policija jězdźidło­ přesćahny a spjaceho wuhlada. Z policajskej sirenu jeho wubudźi. Muž bě wopity a dyrbješe jězbnu dowolnosć wotedać. Tesla stajnje zaso na to skedźbnja, zo ma šofer najebać awtomatiski system­ kontrolu wobchować.

To a tamne (20.05.19)

póndźela, 20. meje 2019 spisane wot:

Kokoš na hłownej dróze je w pfalcskim Frankenecku zasadźenje policije a wo­hnjoweje wobory zawiniła. Swědk bě wobkedźbował, kak kokoš po dróze błudźi, a wołaše policiju. Zastojnikam, kotřiž chcychu wěstotu ptaka kaž tež nadróž­neho wobchada zaručić, pak so njeporadźi, jeho popadnyć. Hakle přiwołanym wohnjowym wobornikam so to ze­šlachći. Woni dowjezechu kokoš na to do zwěrjatownje.

Cyłe polo truskalcow wotšćipali su paduši w porynsko-pfalcskim Lambsheimje. Policija z toho wuchadźa, zo běchu wjacori skućićeljo na akciji wobdźěleni, a pyta nětko za swědkami. Paduši su w nocy na pjatk­ wjacore jězdźidła wužiwać dyrbjeli, zo móhli rubiznu wottransportować. Snano je něchtó podhladne hibanja wokoło pola truskalcow wobkedźbował. Nastata škoda wučinja 700 eurow.

To a tamne (17.05.19)

pjatk, 17. meje 2019 spisane wot:

Swojeju staršeju „zajała“ je třilětna holca w sewjerorynsko-westfalskim Viersenje. Jako běštaj mać a nan w spanskej stwě, jeju dźowčička wotwonka durje zamkny. Dokelž je bydlenje na štwórtym poschodźe a holčka durje wjace wotamknyć nje­móžeše, zawołaštaj staršej policiju. Jako ta přijědźe, wonaj kluče bydlenja a domu z wo­knom ćisnyštaj. Tak mó­žachu policisća „jateju“ wuswobodźić a zadwělowanu holčku tróštować.

Z wotłamanej piwowej blešu w ruce je muž w Berlinje-Lichtenbergu spytał dwě awće pokradnyć. Tak wočini na přikład durje awta, kotrež při čerwjenej ampli čakaše, a hrožeše šoferej z blešu. Tón pak při zelenej swěcy dale jědźeše a tak paducha wotby. Do toho bě sej muž na samsne wašnje wot sobudźěłaćerja firmy kluče­ słužbneho awta žadał. Jako so tón spjećowaše, dźěše paduch dale.

To a tamne (16.05.19)

štwórtk, 16. meje 2019 spisane wot:

Kóń na awtodróze je w bayerskim Illertissenje tójšto njeměra zbudźił. Tón bě wobsedźerjej twochnył, jako chcyše jeho na pastwu wodźić, a bě na to cyłu hodźinu na awtodróze A 7 we wo­krjesu Neu-Ulm po puću. Wjacori policisća spytachu jeho popadnyć, a dyrbjachu awtodróhu nachwilnje zawrěć. Šoferka skónčnje pomhaše. Kóń drje jej do awta kopny a načini tak škodu 300 eurow, nichtó pak so njezrani. Kóń sam wšak poćerpje někotre wobodrjeńcy.

Z dejnerowym špisom w ruce je předawar w Berlinje-Marzahnje rubježnika wućěrił. Njeznaty bě 39lětneho sobudźěłaćerja dejneroweho předawanišća na Gothaskej z nožom wohrozył a sej dochody dnja žadał. Město toho zo by jemu pjenjezy přewostajił, da so předawar ze špisom bjez mjasa do rubježnika, kiž je so chětro spěšnje z procha měł.

To a tamne (15.05.19)

srjeda, 15. meje 2019 spisane wot:

Z přewšo drohim Ferrarijom ćeknył je muž w Düsseldorfje. Do toho bě so wón w předawarni awtow jako móžny kupc wudawał. Na probowej jězbje so jemu poradźi ćeknyć, jako z předawarjom městno za wodźidłom měnješe a jeho na puću stejo wostaji. Chětro rědki Ferrari 288 GTO z wjace hač 400 PS poskićeše wikowar­ oldtimerow za dwaj milionaj eurow.­ Paduch pak ma hišće wěsty problem, dokelž bě so do jězby fotografować dał. Policija nětko za nim pyta.

Po wjele lětstotkach maja so w Kölnskej katedrali wotnětka tež žony wo porjad starać. Dotal bě to kruta domena muži. Wčera su štyri dohladowarki w starobje 35 do 55 lět zjawnosći předstajili. Dohladowarjo su dołhi čerwjeny płašć woblečeni a maja čornu čapku na hłowje. Jich nadawk­ je, so wo ćišinu mjez wšědnje 30 000 wopytowarjemi katedrale starać.

To a tamne (14.05.19)

wutora, 14. meje 2019 spisane wot:

Z nimale 190 km/h staj młodostnaj w starobje 14 a 19 lět před policiju z awtom ćěkajo po Berlinje smaliłoj. Wobaj běštaj zastojnikam w nocy na póndźelu přespěšneje jězby dla napadnyłoj. Jako chcyše policija jeju zadźeržeć, jědźeštaj wonaj hač do 188 km/h, zo byštaj twochnyłoj. Wopušćiwši awtodróhu smaleštaj w Neuköllnje ze 130 km/h po dróze, na kotrejž je jeničce 30 km/h dowolene. Na parkowanišću jeju skónčnje dosahnychu.

Do dweju kontejnerow zakwartěrowali su jebacy turistow w Amsterdamje, kotrejž běchu do toho na chódnik stajili. Turisća, kotřiž běchu nóclěh přez internetneho posrědkowarja Airbnb za 134 eurow knihowali, nochcychu swojimaj wočomaj wěrić. W kontejneru běchu tři łoža, blido a nuznik. Hosćo z Jendźelskeje dźěchu tola radšo do praweho hotela. Pjenjezy je jim Airbnb wróćił.

To a tamne (13.05.19)

póndźela, 13. meje 2019 spisane wot:

Nahi drje, ale z telefonom a cigaretu je 34lětny w Rotenburgu we wokrjesu Wümme sawnu wužiwał. Muž bě so spočatnje spjećował, trjenjo sobu wzać a je po tym w sawnje telefonował, štož tamnych wopytowarjow chětro rozhněwa. Jako­ sej tež hišće cigaretu zapali, dyrbješe sawnu wopušćić. Dokelž njeměješe za to dowidźenje, dyrbjachu policiju wołać, a ta jeho ze sawny přewodźeše. Wotnětka ma muž tam přistup zakazany.

Plastowy kóń wosrjedź dróhi je w nocy na njedźelu policiju w Mannheimje zaběrał. Po prěnim telefonaće zastojnicy skoćo z plastiki, wulke kaž woprawdźity kóń, z dróhi zrumowachu. Bórze po tym zo jich znowa wołachu, dyrbjachu plastikoweho konja zaso z dróhi wotnjesć. Hakle po třećim zasadźenju wostajichu konja na městnje. Štó je za jeho nócny „wulět“ zamołwity, dotal nichtó njewě.

To a tamne (10.05.19)

pjatk, 10. meje 2019 spisane wot:

Kćějaty bóz bě prawdźepodobnje na tym wina, zo dyrbješe wohnjowa wobora w Hamburgu přijěć. Žona bě nuzowe čisło woliła a rjekła, zo chětro za wohenjom smjerdźi. Jako wobornicy přijědźechu, njewuhladachu ani kur ani woheń. Po dokładnym přepytowanju wšak napadny jim blisko domu kćějaty bozowc, kotryž sylnje wonješe. Žona bě jeho wóń po wšěm zdaću z wohenjom zaměniła.

Sprawnosć wupłaćiła je so mandźelskimaj: Po wopyće w Mnichowskej cyrkwi Našeje knjenje dósta por z Kamjenicy namakansku mzdu 700 eurow. 35lětny turist z Južneje Koreje bě móšeń z wjace hač 20 000 eurami w katedrali ležo wostajił. Mandźelskaj ze Sakskeje pjenjezy namakaštaj a wotedaštaj je policiji. Wot zastojnikow­ informowany turist so sprawnymaj Kamjeničanomaj na to ze 700 eurami podźakowa.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND