Wuknyć na jeničkim wukubłanišću rybarjow wuchodneje Němskeje w Rakecach zaruča powołanski přichod

Wukubłanje rybarjow korjeni w starym rjemjesle a ma so po starodawnych tradicijach. Kak pak so na šuli za rybarjow w Rakecach z wukubłanjom młodych rybarjow postupuje? Milenka Rječcyna je so z rybarskim mištrom za wobhospodarjenje hatow (Fischwirtschaftsmeister) Stefanom Wornarjom ze Sakskeho krajneho zarjada za wobswět, ratarstwo a geologiju rozmołwjała.

Kelko wukubłancow tuchwilu maće? A su mjez nimi tež młode žony?

S. Wornar: W aktualnje nowym lětniku mamy 15 wukubłancow. Podobnje je to w 2. a 3. wukubłanskim lěće. Nažel je ličba młodych ludźi za tute powołanje woteběrała. Někotre lěta po přewróće bě tež hižo 40 nowačkow, tak zo dyrbjachmy dwaj lětnikaj zarjadować. Stajnje pak su mjez nimi młode žony, kotrež powołanje rybarki nawuknu.

Zwotkel młodostni přichadźeja?