Na wopyće pola serbskeho hudźbnika, producenta a komponista Symana Hejduški

W bywšim bydlenju swojeje zemrěteje wowki w Hórkach wón wot spočatka lěta při tym je, zo by sej w dwěmaj stwomaj natwarił swójske hudźbne studijo. „To je mój dawny són, kotryž chcu nětko skónčnje zwoprawdźić“, powěda mi 28lětny Syman Hejduška. Wobě rumnosći, z kotrejuž woknow do wsy hladaš, wupadatej tuchwilu hišće kaž twarnišćo. Łopač, wjetše sudobjo za změšenje twarskeje malty, wodowaha a dalše twarske graty steja abo leža na wšelakorych městnosćach. Syman powěda, hdźe budźe sej zarjadować rumnosć z mikrofonami za nahrawanje spěwow a instrumentalnych twórbow,  w dalšej chce potom hudźbu produkować. Při powědanju so jeho wóčce błyšćitej. Wučitaš z mjezwoča, zo přewjedźe swój projekt hač do kónca konsekwentnje. „Mi wšak tež mojej staršej, starši bratr a dalši ludźo při přetwarje pomhaja. Njedźěłamy kóždy tydźeń. Tuchwilu čakam na dalšich rjemjeslnikow. Nadźijam so, zo tule hač do kónca lěta prěnje produkcije změju.“