Serbski komponist Jan Cyž je dotal serbskej „klasiskej“ hudźbje bohaće ­přinošował a tole dale z wulkej akribiju wukonja. Alfons Wićaz je so z nim ­rozmołwjał.

Ličba serbskich komponistow, kotřiž so z často tak mjenowanej klasiskej hudźbu zaběrachu, je so pomjeńšiła. Wy z horstku dalšich tworićelow hudźby na tutym polu dale aktiwnje produkujeće. Što je w minjenym času z Wašeho pjera wušło?

J. Cyž: Pola mnje běžnje nowe kompozicije, nowe twórby nastawaja. Ja tak dźěłam, zo to přesadźu, štož runje začuwam abo štož na doporučenje přećelow hudźby tworju. Nimo toho sym w Braniborskim towarstwje Nowa hudźba, wuhotowarja kóždolětnje wotměwaceho so festiwal za nowu hudźbu pod hesłom „Intersonanzen“. Na tutón festiwal přeproša so stajnje dobri a hinaši mjezynarodni wuměłcy a ćělesa kaž tež ansamble. Čłonojo našeho towarstwa stajnje za wobdźělnikow festiwala nowu twórbu komponuja. Swój lětuši přinošk „pax optima rerum – pokój zgoda“ za violoncello a klawěr sym za Krakówksu dwójku Cracow Duo spisał. Prapremjera budźe 26. apryla w Krakowje.