650 lět Wětrow, wot 1898 ze znatej šamotownju – wot 1951 nasta nowe sydlišćo za dźěławych zawoda – 1. pokročowanje
Wětrow a dalše wsy, kaž Smjerdźaca, Spale, Zemicy, Tumicy a Koslow, kiž buchu 1374 prěni króć pisomnje naspomnjene, su wězo wo wjele starše hač 650 lět. Najskerje buchu 150 do 200 lět prjedy załožene. Za Wětrow swědči wo tym njewšědna drohotna namakanka 1942 w pěskowej jamje gmejny mjez Wětrowom a Bóšicami. Pjekar Herman Měrš a jeho syn Günter podaštaj so kónc winowca 1942 do pěskoweje jamy na Wětrowskich płoninach na wyšinje, hdźež je so tehdy transportny pas z hlinoweje jamy do šamotownje skónčił. Syn nadobo pod zemju wulki stary karan wuhlada, w kotrymž běchu zawite stare twjerde pjenjezy schowane. Wón a nan karan sobu domoj wzaštaj a wjesnjanosta, znaty hornčerski mišter Barchmann, namakanku nazajtra na krajnoradny zarjad do Budyšina dowjeze.
Drohotna namakanka blisko Wětrowa