Willi W. Barthold slědźi na polach germanistiki a sorabistiki

Z Washingtona do Łužicy, z germanistiki do sorabistiki – literarny wědomostnik dr. Willi W. Barthold je w swojim žiwjenju hižo tójšto njewšědnych rozsudow tworił. Zo so wón jako promowěrowany germanist ze serbskej literaturu zaběra, drje zda so spočatnje spodźiwne. Tajkeho nastawka dla, mjenujcy wo „šulerju“ Jurja Brězana, zeznach tež ja Bartholda. Seminar nowšeje němskeje literaturje w Erlangenje, hdźež bydlu, měješe tekst mjenujcy jako zakład za diskusiju wo stilistice powědacych tekstow. „Štó je tutón dr. Barthold?“, so prašach.