Před mjeztym dźesać lětami je Marko Bulank-Paška w Halštrowje swoje ­pohrjebnistwo załožił a wot toho časa mnohim swójbam pomhał, so z lubowanym čłowjekom rozžohnować. ­Za tónle čas a za swój mały jubilej, ­kotryž wón 17. decembra swjeći, je dźensa jara dźakowany.

Na kóždeho z nas nječaka jeno smjerć, ale tež wokomik, hdyž dyrbimy so z lubowanym čłowjekom rozžohnować a jeho na poslednim zemskim puću přewodźeć. Štož je za kóždeho emocionalnje wuwzaćna situacija, je za Marka Bulanka-Pašku wšědny chlěb. Wón je z ćěłom a dušu pochowar. Jeho měrne a wurunane wašnje je někotremužkuli pomhał, ćežki čas žarowanja a rozžohnowanja zmištrować.