Němske sportowcy tež na wodźe wuspěšni
Němski kajak ze štyrjomi mužemi je so w Parisu znowa jako olympiski dobyćer krónował. Do toho běchu sej žony wupadlowali.
Jako Max Rendschmidt, Tom Liebscher-Lucz, Max Lemke a Jakob Schopf w finalu 500 metrow cilowu liniju přeprěčichu, bě wysk hišće łahodny. Napjate sekundy dyrbješe němski kwartet čakać, prjedy hač bě dobyće rozsudźene. Ze štyrjomi stoćinami předskoka přesadźi so němski kajak přećiwo Awstralskej, po 1:19,80 mjeńšinach. Bronzu wudoby sej Španiska. Hižo do toho bě zwjazkowy trenar Arndt Hanisch prěni wuspěch na tutym dnju swjećił. Z 1:32,62 mjeńšinami docpěchu němske žony w kajaku ze štyrjomi 2. městno we wubědźowanju přez 500 metrow. Spěšniši hač němski Kwartet, wobstejacy z Paulinu Paszek, Jule Marie Hake, Pauline Jagsch a Sarah Brüssler, padlowaše jenož Nowoseelandska. Němski kwartet je w mjezyčasu samo nawjedował. Do cila pak mocy pobrachowachu a z diferencu jeničce 0,42 sekundow Němki podležachu. Posledni raz dobył je němski team žonow w tutej disciplinje 2008 w Pekingu.
Sport (09.08.24)
Wobornicy so wubědźuja
Po lěćnej přestawce sćěhuja slědowace wurisanja wohnjowych wobornikow w hašenju: 9. awgusta Sernjany, 18. awgusta Sulšecy (měšćanski pokal), 23. awgusta Pěskecy, 24. awgusta Róžant, 1. septembra Smjerdźaca a 13. septembra Ralbicy (pod swětłomjetakami). Wubědźowanje w Sernjanach započnje so dźensa wječor we 18 hodź.
Motocross w Rownom
Motorsportowe towarstwo Offroad Rookies wuhotuje 31. awgusta w Rownom tak mjenowany Rownjanski motocross po šćernišću. Wubědźowanja přewjedu so na 2 km dołhej čarje při Trjebinskim a Mułkečanskim puću. Sćěhowace rozrjadowanje klasow tam změja: bobbycar, běhanske koleso, Simson, pitbike, kwad, dźěći, žony, youngstery, seniorojo, hobby a profi.
Kopańca w Sernjanach
Wjesny klub Sernjany přeprošuje wšitkich wólnočasnych a tež dalšich koparjow na tak mjenowany soccer cup do Sernjan. Jutře hraje so tam třo přećiwo třom, a to stajnje wosom mjeńšinow dołho. Započatk budźe w dwěmaj, maksimalnje 10 mustwow smě so wobdźělić. Přizjewjenja su pod telefonowym čisłom 0162 7624029 abo pod e-mejlowej adresu móžne.
Mjetarjo olympisku hru přećiwo Francoskej dobyli
Tutych wosebitych wokomikow dla je telko ludźi na swěće wo olympiskich hrach fascinowanych. Dokelž je sport tak njewobličomny a krasny. Němske narodne mustwo mjetarjow je w dramatiskim štwórćfinalu přećiwo europskemu mištrej z Francoskeje 35:34 po podlěšenju dobyło a połfinale docpěło. Tak hraje wubranka DHB pjatk přećiwo Španiskej. Wosebje napjate běchu kónčne sekundy regularneho hrajneho časa štwórćfinalneje hry w Lille. Francoska nawjedowaše mjenujcy 29:28. Poprawom bychu Francozojo bul jeničce w swojich rjadach dźeržeć dyrbjeli, wšako mějachu jenož hišće šěsć sekundow hrać. Hač dotal wusahowacy hrajer Dika Mem pak ćisny bul Sebastianej Heymannej do rukow. Na to přihra so hrajny nastroj Renarsej Uscinje, kotryž jón ze zynkami kónčneje sireny mjez noze francoskeho wrotarja do saka zapali. Z kónčnym wuslědkom 29:29 so do podlěšenja podachu.
Přihoty z treningowym lěhwom zakónčili
Koparjo prěnjeho koparskeho mustwa ST 1922 Radwor su minjene dny wjacore razy testowe hry přewjedli. Tak na přikład přećiwo mustwu Jednoty Kamjenc. Mustwo z wokrjesneje klasy móžeše so 2:1 přesadźić. W Lessingowym měsće mějachu Radworscy koparjo wjele hrajnych podźělow, tola na kóncu běchu před wrotami přechwatni. Tola wšo to da rum dalšemu wuwiću, štož měješe so minjeny kónc tydźenja w treningowym lěhwje trenować a polěpšić. Pjatk bě so potom prěnja treningowa jednotka kónca tydźenja přewjedła, w kotrejž kładźechu trenarjo přiwšěm wažnosć na kondiciju. Taktiske elementy běchu stajnje zapřijate. Sobotu steješe dalša treningowa jednotka na programje a popołdnju přihotowanska hra, w kotrejž dyrbjachu koparjo młodźiny A wupomhać.
ST 1922 Radwor –
SJ Chrósćicy 3:2 (3:0)
Zestawa domjacych: Matik – B. Grubert, Omran, Dźisławk, Wjesela, Wjacławk, Nuk, Šnajder, Mička, Glücklich, Wróbl, Elsner, A. Schulze, Buša, Adam
Zestawa hosći: Škoda – T. Donat, Zynda, Zahrodnik, Handrik, Graf, Wornar, Wencel, Matik, Młynk, Rätze, Cyž, B. Donat, K. Mark, Bjeńš, Sćapan, Budar
Němskim konjam so w Parisu spodoba
Po hižo wjacorych medaljach w dresurje a w mnohostronskim jěchanju, wudobychu sebi jěcharjo Němskeje wutoru dalši drohometal při olympiskich hrach. Jěchar Christian Kukuk je w jednotliwym wubědźowanju we Versaillesu sensacionelnje 1. městno docpěł. W rozsudnym kole bjez zmylka přesadźi so 34lětny ze swojim žrěbcom Checkerom 47. Kukuk wudoby sej za Němsku w disciplinje skakanskeho jěchanje za jednotliwcow prěnju medalju po Marcu Kutscheru 2004 w Athenje. Posledni němski olympiski dobyćer bě Ulrich Kirchhoff 1996 w Atlanta.
Šansu na jednu z horco požadanych olympiskich medaljow mataj nětko tež bičwolejbulistaj Nils Ehlers a Clemens Wickler. Němskaj mištraj přesadźištaj so w štwórćfinalu přećiwo Nižozemjanomaj Stefan Boermans a Yorick de Groot 2:0 po sadźbomaj.
Ralbičanskich Sokołow počesćili
Dwě mjeńšinje pobrachowałoj
FC Energija Choćebuz –
Arminia Bielefeld 1:2 (1:0)
Zestawa FC Energije Choćebuz: Bethke – Rorig, Kusić, Campulka (80. Kaizer), Bretschneider, Putze, Möker, Proničew (63. Krauß), Cigerci (80. Hofmann), Halbauer (63. Shcherbakovski), Thiele
slěd wrotow: 1:0 Halbauer (42.), 1:1 Oppie (68.), 1:2 Großer (90.+2)
FC Energiji Choćebuz radźi so w předsezonje wjacore razy wrota w kónčnych mjeńšinach abo samo w přidatnym hrajnym času třělić. Tónraz pak dyrbješe nowačk třećeje ligi sam hórkosć poražki w přidatnym hrajnym času přiwzać.
Energija dźeržeše po startowej fazy dołhi čas derje sobu. Wosebje po wrotach Phila Hallbauera, po wulkotnej dołhej přihrawce Tolkayja Ciğercija z třělwu do dołheho róžka. A njeby-li Ciğerci w 61. min. jenož žerdź trjechił a njeby Timmy Thiele w 88. min. na hóstnym wrotarju Jonasu Kersku zwrěšćił, by tola za dypk dosahało. Tak pak poradźichu so hosćom w 92. min. wrota a z tym dobyće třoch dypkow.
Wuslědki (07.08.24)
Regionalna liga muži
FSV Zwickau – Greifswaldski KK 0:2 (0:2)
Halleski FC – VFC Plauen 1:1 (0:1)
SV Babelsberg – BFC Dynamo 1:1 (0:1)
Jena – Hertha Zehlendorf 6:2 (5:2)
1. FC Carl Zeiss Jena 2 9 : 4 6
2. BSG Chemija Lipsk 2 4 : 2 4
3. FC Čerwjeno-běli Erfurt 2 3 : 1 4
4. FC Viktoria 1889 Berlin 2 4 : 3 4
5. Lok Lipsk 2 2 : 1 4
6. Kamjeničanski FC 2 1 : 0 4
7. Hertha 03 Zehlendorf 2 7 : 6 3
8. Greifswaldski KK 2 2 : 1 3
9. Hertha BSC II 2 1 : 1 3
10. FSV 63 Luckenwalde 2 3 : 3 2
11. SV Babelsberg 03 2 2 : 2 2
12. Halleski FC 2 1 : 1 2
13. BFC Dynamo 2 3 : 4 1
13. VFC Plauen 2 3 : 4 1
15. VSG Altglienicke 2 2 : 3 1
16. ZFC Meuselwitz 2 3 : 5 1
17. FC Eilenburg 2 2 : 4 1
18. FSV Zwickau 2 0 : 7 0
Stopnjowanje spóznajomne
Po njespokojacymaj testowymaj hromaj přećiwo Porchowej a Marijinej hwězdźe wočakowaše Sokołow znowa dwójny test přećiwo mustwomaj z wokrjesneje ligi.
FSV Łuty – Sokoł Ralbicy/Hórki 0:4 (0:1)
Zestawa hosći: Schöne – B. Heidorn (46. Matka), Rachela, Schultz, Wałda (46. Mikławšk), Woko (46. L. Heidorn), Korjenk (46. Šiman), Gloxyn, Hicka, Mjechela, Bejmak (46. Domaška)
Pjatk podachu so Ralbičenjo do Łutow. Tamniše mustwo wotzamkny minjenju sezonu w hornjej třećinje tabulki wokrjesneje ligi.
Hosćićel wězo z połnej paru zakitowaše, štož dyrbjachu Sokoljo hrajersce rozrisać. To so jim tež poměrnje derje zešlachći. Po sydom hratych mjeńšinach zwrěšći Křesćan Bejmak ze stroprocentnej šansu na wrotarju. Tež Pawl Rachela po běrtlk hodźinje dobru składnosć njewuži. Po někak poł hodźinje Sokoljo po dobrym wuhratym nadběhu Bejmaka skónčnje wyskachu. Po dalšej dobrej kombinaciji młody Tim Hicka wótru přihrawku Dennyja Gloxyna před wrotami snadnje misny.
Triatlonowa bajka, basketbulowa sensacija a swětowy rekord
Němscy triatleća postarachu so wčera wo jónkrótny wukon a su sej złoto w měšanej stafli dobyli. Němski kwartet Timo Hellwig, Liza Tertsch, Lasse Lührs a Laura Lindemann skónči wubědźowanje z wuběrnym wukonom po 1:25,39 h před staflomaj z USA a Wulko Britaniskeje. Kónčna starterka Lindemann přesadźi so w napjatym sprinće ze sekundu předskoka. Faworit Francoska zhubi po njezbožu wšitke šansy na dobyće. Za němskich triatletow je to hakle třeća medalja na olympiskich hrach scyła.
Dalša sensacija slědowaše póndźelu wječor. Němske 3x3-basketbulistki Svenja Brunckhorst, Sonja Greinacher, Elisa Mevius a Marie Reichert pisachu olympiske stawizny a zawěsćichu sej z dobyćom 17:16 přećiwo Španiskej złoto. Połfinale, kotrež bu hakle tři hodźiny do finala zakónčeny, su 16:15 přećiwo Kanadźe dobyli. Za Němsku je to scyła prěnja olympiska basketbulowa medalja.
