„Dyrbitaj z dopingowej kontrolu ličić!“ W prěnim wokomiku tak prawje njewěm, što to dyrbi. Ste­ju­ ze synom před recep­ciji hotela blisko Ruhpoldinga, dokelž chcemoj sej swětowy biatlonowy cup wobhladać. Ale dopingowa kontrola je tola za profijow a nic za dweju wjesnjanow, kotraž mataj w ćěle snano hišće někajke slědy Koćinskeho Krabatoweho twarožka abo husaceho šmałca z Budyskeho „Wjelbika“!? Šefina hotela pak je hnydom dale rěčała a namaj rozkładła, zo mamoj stwu w pódlanskim twarjenju, w kotrymž je nimo naju jenož narodne biatlonowe mustwo z Kazachstana. W stwach 1, 3, 4, 5 a 6 bydlachu Kazachojo, w stwě čisło 2 Serbaj.

Něchtóžkuli z was, lubi čitarjo tuteje kolumny, zawěsće hižo na lěćo mysli. Snano tohodla, dokelž so na ćopliše temperatury wjeseli abo dokelž swój dowol planuje. Mysli pak snano něchtó z was tež na olympiske hry w Tokiju? Ja wšak to ani hišće sekundu činiła njejsym. Čehodla tež, runje nětko w zymje?

Jako tele dny raz připadnje wječor sportowy sćelak zapinych, njewědźach tak prawje, kotre wolejbulowe wurisanje tam pokazuja. Mišterstwa su tola nimo!? Hakle poněčim sej wuwědomich, zo su to kwalifikaciske hry za lětušu olympiadu. Pola žonow kaž tež pola muži wojuje wosom europskich cyłkow wo posledni tiket za Tokio 2020. Wot 5. do 10. ja­nuara wobhladach sej w telewiziji tuž kóždu partiju muži-wolejbulistow, a to live­ dokelž přewjedźechu je w Němskej. Naši mužojo zakónčichu předkoło na druhim městnje tabulki, podležawši jeno Słowjenskej z 2:3.

Lubi čitarjo našeje kolumny, tež w lěće 2020 směmy so zaso na někotryžkuli sportowy wulkopodawk wjeselić. Prjed hač sportowe lěto zhromadnje přeńdźemy, mam hišće nowosć z medijow za was. Wotnětka njewusyła mjenujcy Serbski rozhłós wšědnje jenož hodźinku dlěje, ale přidatnje směmy so wotnětka tež kóždu srjedu na dalši rańši sportowy přinošk wjeselić.

Prěni wulki wjeršk lěta, 68. turneja sněhakowarjow po štyrjoch skakanišćach, so dźensa kónči. Njewostanje pak to jenički sportowy podawk w zymje. Hnydom tři dalše spočatk lěta na nas čakaja. Hižo štwórtk so swětowe mišterstwa w mjetańcy zahaja. Wone su lětsa w Awstriskej, Šwedskej a Norwegskej. Šansu na do­byće wuličeja sej při tym tež chowancy trenarja Christiana Prokopa. Cil Němcow wšak rěka: znajmjeńša połfinale. Apropos fi­na­le. Mjeztym hižo 54. raz budźe spočatk februa­ra tak mjenowany „super bowl“, potajkim kónčna sezonowa hra w american footballu. A srjedź februara přewjedu w južnotirolskim Antholzu swětowe mišterstwa w biatlonje.

Najwjac w sportowym lěće 2019 drje je so kaž nimale přeco na polu kopańcy stało. Hórke sylzy płakał je zawěsće tón abo tamny přiwisnik ST 1922 Radworja w juniju, jako zestupichu tamniši bulkoparjo po dwěmaj sezonomaj we wokrjesnej wyšej lize zaso do wo­krjesneje ligi. To surowe na tym: W poslednjej hrě přećiwo ST Porchowej by dobyće dosahało klasu dźeržeć – w 90. min. pak trjechichu Radworčenjo jenož łatu a tak zwosta při njerozsudnym 1:1. Wjeselo porno tomu knježeše w Pančicach-Kukowje, wšako bě ST Marijina hwězda suwerenje do wokrjesneje wyšeje ligi postupiła. Młody team zhubi přez cyłu hrajnu dobu jenož mało dypkow, a tak steji wot noweje sezony nětko wjac hač zasłužbnje klasu wyše. Na prěnim hrajnym dnju přichwata do Pančic hnydom stary zajac ligi, Sokoł Ralbicy/Hórki. A tón je derby­ jasnje z 5:1 za sebje rozsudźił, startujo fulminantnje do noweje sezony. Někotři akterojo a fanojo w Delanach po šěsć hrach a 15 dypkach sonjachu hižo tajnje wo mišterstwje, w dalšich dźewjeć partijach pak nažnjachu Sokoljo jenož wosom dypkow a steja tuchwilu na šestym městnje tabulki.