Personal w hladarnjach trěbny
Maltezojo we Wojerecach zmóžnjeja zajimcam nawrót na dźěłowe wiki
Wojerecy (SN/JaW). Maltezojo we Wojerecach skića dźěłopytacym a přidružnikam wuběrnu móžnosć, na dźěłowe wiki so nawróćić. Hižo dlěši čas poskićeja zajimcam z wukubłanjom na asistenta za chorobne hladanje, na polu hladanja chorych a starych skutkować.
Małe bleše whiskyja „Glen Buchenbach“ předawaja w dworowym ...
W ratarskich zawodach kaž w Zdźěrjanskej Holanskej farmje abo w ...
Krajej wabitej zhromadnje za Łužicu
Sakska a Braniborska prócujetej so zhromadnje wo industrijne zasydlenja we Łužicy. Towaršnosći za hospodarske spěchowanje wobeju krajow stej z wokrjesami Delnjeje a Hornjeje Łužicy kaž tež z městom Choćebuzom nowu brošuru „Łužica – hospodarski region za rozrost a přichod“ wudałoj.
Drježdźany/Podstupim (SN/at). W němskej a jendźelskej rěči zhonja zajimcy najwažniše lěpšiny hospodarskeho stejnišća Łužica. Brošura ma tukrajnych a mjezynarodnych inwestorow přiwabić.
Pomhaja čerwjenemu milanej
Zo ratarjo Róžeńčanskeje agrarneje AG Sorabia při dźěle tež na wobswětoškitne zajimy kedźbuja, maja woni nětko čorne na běłym. Wčera dóstachu požadane wopismo, kotrež jim to wobkruća.
Róžant (SN/MWj). Wuznamjenjenje we wobłuku škitneho projekta „Čerwjeny milan – kraj k žiwjenju“ su wčera Róžeńčanskej agrarnej AG přepodali. Požadane wopismo přepoda Stefan Siegel ze spěchowanskeho towarstwa Njeswačanskeje ptakoškitneje stacije jednaćelej Sorabije Matejej Korjeńkej. Runja dalšim ratarskim předewzaćam w Delnjej Sakskej, Schleswigsko-Holsteinskej, Sewjerorynsko-Westfalskej, Durinskej a Sakskej su Róžeńčanske za jeho angažement za rubježneho ptaka počesćili.
Poradźuja firmy wo inkluziji
Drježdźany (SN/at). Temje inkluzije chce Drježdźanska rjemjeslniska komora wjetšu kedźbnosć wěnować. Tohodla z poradźowanjom k inkluziji sobustawskim zawodam nowu posłužbu poskića, kaž z nowinskeje zdźělenki wuchadźa. Zo by nowy serwis zeskutkowniła, bě komora loni w decembrje zhromadne dźěło z Komunalnym socialnym zwjazkom Sakskeje dojednała. Partnerka jako poradźowarka za inkluziju je rjemjeslniskim zawodam połnojuristka Nora Tinter. Wona informuje tež nastupajo dźěłowe prawo. Zaměr je, zawody jako rjemjeslnistwu bliskich partnerow přewodźeć.
Poradźować budźe Nora Tinter nastupajo inkluziju mjez druhim wo móžnosćach spěchowanja a podpěry kaž tež wo zakonskich žadanjach. „Myslu sej, hdyž zawody wšelake móžnosće podpěry a jich lěpšiny lěpje znaja, su wone tež wotewrjeniše ludźi ze zbrašenjemi přistajić“, rjekny Tinter. Wona chce na to pokazać, zo je zbrašenemu dźěło dać jednorišo, hač sej to firmownicy husto předstajeja. Poradźowarka je zdobom partnerka zbrašenych, kotřiž chcedźa w rjemjesle dźěłać.
Woswjeća dźesaćlětny jubilej
Planuja Łužiski forum
Sakski ministerski prezident Kretschmer strukturnu změnu přewodźa
Hamor (AK/SN). Sakski ministerski prezident Michael Kretschmer (CDU) nima kruty, zawjazowacy termin zakónčenja wudobywanja brunicy tuchwilu za realistiski. „Z mojeho wida je přirodny datum docpěty, hdyž je brunica we wuhlowych jamach přetrjebana“ rjekny wón wčera při swojim wopyće we Wochožanskej brunicowej jamje zastupnikam energijoweho zastaraćela LEAG. „Trjebamy brunicu dale jako zapłaćomneho nošerja energije. Wona zaruča nam spušćomne zastaranje z milinu.“ Z tutym wuprajenjom ministerski prezident zdobom rewěrowy koncept LEAG podpěrowaše, kotryž běchu loni w měrcu předstajili. Po nim chcedźa Miłoraz wotbagrować a 220 wobydlerjow přesydlić.
Tež w zymje nowe městna
Budyšin (CK/SN). Sobudźěłaćerjo Budyskeje agentury za dźěło móža tuchwilu we wuchodnej Sakskej 4 088 swobodnych dźěłowych městnow z winowatostnym socialnym zawěsćenjom sposrědkować. W januaru drje su zawody mjenje swobodnych městnow přizjewili, to pak je typiske za spočatk lěta, měni šef dźěłoweje agentury Thomas Berndt. Najebać zymu su zawody dale zwólniwe nowych sobudźěłaćerjow přistajić.
Tež slěd hospodarskich branšow, z kotrychž poskitki dochadźeja, lědma zadźiwa. Z 902 městnomaj dźěło na čas statistiku nawjeduje. Na druhim městnje steji předźěłace přemysło z 871 městnami. Jeničce w mašinotwarstwje pytaja 160 nowych sobudźěłaćerjow a 150 w metal předźěłacej industriji. Najwjetše wužadanje za dźěłowu agenturu wostanje, za wotpowědne městno prawu wosobu namakać.
Siemens chcył Hornjołužiski koncept
Mnichow (dpa/SN). Nawoda koncerna Siemens Joe Kaeser móhł sej hladajo na planowane zawrjenje Zhorjelskeje twornje za turbiny a z tym zwjazany masiwny wottwar dźěłowych městnow „Hornjołužiski industrijowy koncept“ předstajić. Tole rjekny Kaeser wčera do zahajenja hłowneje zhromadźizny koncerna w Mnichowje. Tak by móžno było, zo Zhorjelska twornja hišće wěsty čas pod třěchu Siemens wostanje. Za něšto lět chcył koncern zawod druhemu industrijnemu zwjazkej přirjadować. W tym zwisku dyrbja tež wo nowych wudźěłkach, na přikład wo technologijach składowanja energije, rozmyslować, šef koncerna doda. Při tym matej zwjazkowe a krajne knježerstwo sobu skutkować.
Najebać to pak Kaeser planowany masiwny wottwar dźěłowych městnow w milinarnjowej wotnožce zakitowaše. Hladajo na woteběracy wobrot w tym wobłuku a na cyłkowny wuslědk koncerna su tute kročele njewobeńdźomne a samo „nuznje trěbne“.
