Priorita projektow postajena
Nowy modelowy projekt sakskeho ministerstwa za nutřkowne naležnosće móhł přetwar a saněrowanje twarjenja zarjadniskeho zwjazka Při Klóšterskej wodźe w Pančicach-Kukowje podpěrać.
Zhorjelc (AK/SN). Regionalny planowanski zwjazk je so jednohłósnje za požadanje wo prioritne projekty w zwisku z namołwu sakskeho ministerstwa za nutřkowne naležnosće wuprajił. To płaći za modelowy projekt k regionalnemu wuwiću a polěpšenju zhromadneho dźěła komunow. „Přidatny spěchowanski program je za inwesticije předwidźany“, wujasni sobudźěłaćer regionalneho planowanskeho zwjazka Thomas Brade. Termin přizjewjenja bě 30. junij. Dźeń do toho je zwjazk wo projektach wuradźował. Wob lěto maja 500 000 eurow k dispoziciji. Cyłkownje je to hač do lěta 2020 potajkim 1,5 milionow eurow.
Ćahi z Budyšina do Awstriskeje
Budyšin (SN/BŠe). Kanadiski koncern Bombardier chce wulki nadawk z Awstriskeje na Budyskim stejnišću zhotowjeć. Hač do lěta 2021 natwarja w sprjewinym měsće dwaceći regionalnych ćahow za awstrisku zwjazkowu železnicu. 21 ćahow pak zhotowja w braniborskim Henningsdorfje, hdźež chcedźa so přichodnje bóle na wuwiće a hladanje jězdźidłow specializować.
„Wažne znamjo to za Budyski zawod“, zdźěli wčera rěčnik předewzaća Andreas Dienemann. Cyłkowna hódnota skazanki wučinja něhdźe 188 milionow eurow. Snano móža awstriski nadawk hižo klětu w Budyšinje zwoprawdźić započeć.
Hakle w juniju je Bombardier w sprjewinym měsće nowu produkcisku halu wotewrěł, za kotruž bě wosom milionow eurow nałožił. Runje tak chce koncern dalše 30 milionow eurow inwestować, zo móhł tudy mjez druhim testowy centrum za ćahi nastać. Po chětro špatnych powěsćach za Budyski zawod, zo chcyše Bombardier tu sta dźěłowych městnow šmórnyć, pak steja signale nětko na nowowusměrjenje z nowymi nadawkami.
Zo bychu rozšěrjacu so twornju baterijow Accumotive na kromje ...
Stejnišćo wobstajnje zawěsćić
Předewzaće itelligence zhladuje na 20lětne wobstaće
Budyšin (SN/BŠe). Po wotewrjenju noweho ličenskeho centruma loni ma koncern itelligence na Budyskim stejnišću znowa přičinu swjećić. Zawčerawšim zhladowaše předewzaće na 20 lět wobstaća. Zajutřišim změja sobudźěłaćerjo přiležnosć, ze swjedźenjom na minjenej lětdźesatkaj zhladować. „Budyšin je naše najwjetše stejnišćo we wobłuku digitalneho managementa Managed Cloud. Inwestujemy dale do aktraktiwneho rozrisanja za wužiwarjow našich posłužbow po cyłym swěće“, zdźěla nawoda předsydstwa itelligence AG Norbert Rotter. Region skići za to najlěpše wuměnjenja, předewšěm hladajo na zarjadnistwo, politiku, infrastrukturu a zdobywanje fachowcow. Hač do dźensnišeho dóstawa koncern wot města Budyšina wulku podpěru w zwisku z hospodarskim spěchowanjom.
W Hamoru miliony inwestuja
Na terenje milinarnje planuja připrawu za sušenje błóta twarić
Hamor (CK/SN). Třećinu wšěch wotpadkow błóta z komunalnych wodočisćernjow woža na pola. Z teje přičiny chcyło Lipšćanske předewzaće za wodu a wotpłóčki OEWA na teritoriju Hamorskeje milinarnje připrawu za sušenje błóta natwarić a do njeje šěsć milionow eurow inwestować. Za sušenje błóta chcedźa zbywacu ćopłotu milinarnje zasadźić. Granulat móhli pozdźišo w cementowej industriji zasadźić. Předstajomne je pak tež wužiwanje maćizny jako narunanske paliwo w milinarni koncerna LEAG.
Manufaktura swětłownja Łužicy
Industrijne předewzaće w Cersku zhotowja škleńcu za fotowoltaikowe připrawy
Škleńcowa manufaktura Braniborska tzwr so dale a bóle zjawnosći wotwěra. Njedawno je Zwjazkowe zjednoćenstwo srjedźostawskeho hospodarstwa k rozmołwnemu kołu z jednaćelom manufaktury Torstenom Schroeterom přeprosyło. Wón dopominaše na wuwiće industrijnišća a předstaji dźensniši produkciski profil předewzaća.
Mnohe twarske naprawy nuznje trěbne
Slepo (AK/SN). Gmejna Slepo chce zaměrnje dalše dróhi a puće saněrować. Tole podšmórny nawoda zarjada za planowanje, twarstwo a hórnistwo zarjadniskeho zjednoćenstwa Slepo Steffen Seidlich na njedawnym posedźenju tamnišeje gmejnskeje rady. Jednohłósnje radźićeljo rozsudźichu, wjesnjanosće wjac prawomocy spožčić. Přichodnje smě wón w zwisku z wupisanjemi předewzaćam nadawk dać, su-li najlěpši hospodarski poskitk předpołožili.
W jednotliwych padach dźe to, ponowić Běłowodźanski puć we wjesnym dźělu Mułkecach, lěsny puć w Rownom, zajězd Rownjanskeje Witaj-pěstowarnje „Milenka“, dźělny wobłuk puća w Slepom a komunalnu kolesowansku šćežku w Mułkecach. „Mamy za to financy Sakskeho krajneho zarjada za dróhotwar a wobchad. Za lěto 2018 je jich cyłkownje 56 578,73 eurow“, Steffen Seidlich rozłoži. „W techniskim wuběrku smy so dorozumili, za kotre naprawy chcemy srědki zasadźić.“ Pjenjezy su ze směrnicy wo komunalnym dróhotwarje. Naprawy, tak Steffen Seidlich wuzběhny, su nuznje trěbne.
Struchła bilanca po 20 lětach wjelka w Sakskej
Dźěže (UM/SN). Zhorjelski krajny rada Bernd Lange (CDU) ma, po tym zo bu w februaru blisko Krušwicy wjelk zatřěleny, 210 skóržbow na blidźe. To rjekny wón wčera wječor we wobłuku wot frakcije krajneho sejma swojeje strony organizowaneho zarjadowanja „20 lět wjelki w Sakskej“ w Dźěžach (Diehsa). Zdobom Lange zwurazni, zo statnemu rěčnistwu mjeno hajnika, kiž bě wjelka třělił, njemjenuje. „Sym jim rjekł, zo ja zamołwitosć přewozmu.“
Woprawnjene wočakowanja na přichod
Čorna Pumpa (JoS/SN). Łužiski region hotuje so na puć dalšeho strukturneho wuwića. Tu zahaja so mjezy přesahowacy proces Sakskeje a Braniborskeje, kotryž zwjazkowe knježerstwo podpěruje. To wobkrući wčera zwjazkowy hospodarski minister Peter Altmaier (CDU) na Łužiskim dialogu 2018 w Čornopumpskej klubowni koncerna Łužiska energija a milinarnje (LEAG). Přitomnaj běštaj tohorunja sakski ministerski prezident Michael Kretschmer (CDU) a jeho braniborski kolega Dietmar Woidke (SPD). Podłu přijězda je wšak něhdźe 500 sobudźěłaćerjow a energijowych poradźowarjow předewzaćow LEAG a Mibrag za swoje dźěłowe městna a za strukturnu změnu wuchodoněmskich brunicowych rewěrow demonstrowało. Politikarjo so z nimi rozmołwjachu a přihłosowachu jim, zo maja woprawnjene wočakowanja hladajo na přichod w domiznje. Dalši strukturny łamk měli wotwobarać.
Komisija dźěłać započała
Wuradźuja nětko wo přichodźe brunicoweho hórnistwa w Němskej
Berlin/Wjelcej (SN/BŠe). Dźensa je so w Berlinje wuhlowa komisija prěni raz schadźowała. 23 ludźi chce nětko prawidłownje wo přichodźe brunicoweho hórnistwa w Němskej wuradźować. Mjez nimi stej zastupjerce z Łužicy. Jónu Grodkowska měšćanostka a rěčnica Łužiskeho kruha Christine Herntier (njestronjanka) a Hannelore Wodtke z wolerskeho zjednoćenstwa „Zeleny přichod Wjelcej“ tamnišeje měšćanskeje rady. „Změjemy tójšto dźěła so přesadźić“, zdźěli Wodtke do konstituowaceho posedźenja. Wona zasadźa so předewšěm za to, žane nowe brunicowe jamy njezarjadować. Dotal je planowane wobydlerjam Prožymja hakle w lěće 2020 rjec, kak tam dale póńdźe. „To je přepozdźe. Ludźo njemóža z tajkej njewěstosću dale žiwi być.“
